Lala ngokuthula: Kuwe igatsha lesihlahla samaMboma uMandla
Uhambe emva kokugula isikhathi esifushane uMnu uMandla SA Sikhakhane (75) ozalwa nguRev Dkt u-EZ Sikhakhane noNkk uWinifred MaXaba Sikhakhana (abangasekho). Ubehlala eGeorgetown, e-Edendale. Ubengumuntu wabantu, enonako, enesineke sokulalela wonke umuntu futhi ezimisela engabheke nzuzo ukwelekelela ekusombululeni izinkinga umuntu abezibeka kuye. Ubethanda intuthuko yomphakathi, enengqondo ehlaziyayo ngokuthobeka.
Ubevelele ekubukeni noma yisiphi isimo ngeso elibanzi elicwaninga isithombe esikhulu ngalokho okwenzekile nokufanele kwenzeke. Noma wayesemncane uyise eqamba i-Edendale Lay Ecumenical Centre, kungashiwo ukuthi enabakwabo baba yisisekelo sokuqoqa intsha, ukuyinika ithemba nentshisekelo yokufunda, yokuhleleka nokuziphatha okunekusasa.
UMathula (isithakazelo) wazalelwa eNdwedwe wayesehlala nogogo uMaSithebe nomkhulu eMatiwaneskop. Emva kweminyakana wayeseyohlala nabazali bakhe kuGrey Street eThekwini lapho uyise wayenguMfundisi waseWeseli khona.
Wafunda eCwembe Primary, eLoram Primary, eZwelabantu High School wayesenza umatikuletsheni eClarkbury e-Eastern Cape.
Esomele imfundo waya eSt Francis College eMariannhill lapho athola khona iCertificate in Bookkeeping eyayenganyelwe yiJoint Matriculation Board. Phakathi kweminyaka ye-1977 kuya kowezi-2008 wenza iPost Graduate Accounting Course e-University of Central Florida, iMaster of Science in Management School of Financing. Wenza futhi iBusiness Administration eRollins College Florida.
ENingizimu Afrika wafunda futhi eDUT waqeda ezobu-Estate Agent nezomshuwalense.
Usebenze ezindaweni eziningi okubalwa kuzo iWalt Disney eFlorida USA, naku-University Summer Vacations eNew York.
Wabuya eNingizimu Afrika enokwazi okuningi ikakhulukazi ekwelekeleleni abahwebi, abathuthukisi bomphakathi, nabaziqambela imisebenzi yokuziphilisa. Waze wahlonishwa iNafcoc ngendondo. Kukho konke akufunda uthando lwakhe lwezomhlabathi lwalulokhu lukhona. NoMfundisi Dkt u-EZ Sikhakhana wayezifundele ezolimo. Kwase kuthi e-Edendale Lay Ecumenical Centre ezolimo zaholwa yiqhawe lezindlela zokulima lapho kunesomiso khona. Lowo kwakuNguMnu uRobert Theophilus Mazibuko, owayekade ethuthukisa umphakathi waseBothas Hill.
UMnu uMandla Sikhakhane wajoveka kakhulu ngumbonotalagu kayise ekuqambeni i-Edendale Lay Ecumenical Centre esingawufinqa kanje: ukusiza aboHlanga babuyelwe ukuzethemba, ukulungiselela imiphakathi eyayicindezelwe uholo oluyilo mhla yakhululeka, ukubambisana kwabamabandla mayelana nokuzithuthukisa nokuzimela, ukwenza okusemandleni ukusimama noma uhaqwe ngamaketango abacindezeli, okwakuwuHulumeni wobandlululo, amaBhunu ayenamapulazi, abezimboni ababecindezela aboHlanga bebaholela imali encane ngenxa yebala hhayi ngenxa yamakhono. Leli qhawe ebelifihlwake, ekuthobeni kwalo, ekubeni nesipho esinqala sokulalela, saselekelela ekufundiseni nasekuqeqesheni intsha encane nendala, ekuhlaziyeni izimo, ekuhlelembeni amakhono ayekhona emphakathini, ekulweni ngezikhwepha zengqondo nalokho okwakwenza umuntu athembele ekusizweni ngabanye esikhundleni sokuba azisize yena.
Isibongo sakwaSikhakhana silahlekelwe ukuhamba kukaMandlenkosi Sipho Afrika Sikhakhana. Waba ngomunye wababenemiklamomisebenzi eNkandla naseMnambithi, eyayiphathelene ikakhulu nomlando nokuthungathwa nokugcinwa kwamafagugu ikakhulukazi esibongo sakwaSikhakhana. Miningi imihlangano ayihlela, wayihambela, wagcina iminingwane nokwazi ngalokho okwakuyifagugu loMboma. Isiboniso nje waba ngomunye wokuqanjwa kohlaka lobumbano lwabakwaSikhakhana olubizwa ngokuthi ISIHLAHLA SAMAMBOMA.
Yilapho kwagqama khona umlando ngokhokho walesi sibongo, uMboma kaMqhele. Wayedla ubhedu kwezobunyanga, ubungoma, ukwethwasisa nasekwazini ngamakhambi. Kuthiwa wazibangela isigcwagcwa enkosini ukuba angathobeli umthetho wokuthi inyanga yenkosi yayingabuye yelaphe abanye abantu. Yena kwakuthi lapho kunokhuvethe ezweni elaphe noma ngubani.
Igama elithi imboma ngelesihlahla esinamandla okwelapha izifo eziningi ayesitshalile esivandeni sakhe kanye nezinye. Kukhona futhi abathi lesi sihlahla saselapha nomzimba omubi kanye nozozo. Abanye okhokho bakwaSikhakhana, ngokuphenya kukaMnu uSikhakhana yilaba: oNaka, oMhoshane, oPhenyane, oLembe, oSomangali, oManyingi, oMahashula, oMakhawuka, oZimase, oSicoco, oZombe. Sima la ngenxa yesikhala.
Inkonzo yakhe ibise-Edendale Lay Ecumenical Centre mhla zingama-29 iphethwe nguMfu uVuyo Dlamini.
Wayeganwe uNkk uThandiwe uMaDlomo (osamendulela) wathola izingane ezimbili uNqobile noThuthukani. Ushiye odadewabo ababili uThoko noZanele kanye nabafowabo abathathu uMboniswa, uDumisani noLwazi.
LALA NGOKUTHULA QHAWE.