Akusilo ihlaya ukuqokwa kukaTrevor Noah kasithupha
Usalokhu eqhubeke njalo ngokuphakamisa igama laseNingizimu Afrika uTrevor Noah phesheya kwezilwandle.
Lo somahlaya uhambela phezulu kulezi zinsuku kulandela ukuqokwa kwakhe amahlandla ayisithupha kuma-Emmy Awards ngemisebenzi yakhe eqokwe abeTelevision Academy.
Eminye yemisebenzi yakhe ehlonishwayo ifakwe eminxeni ye-Outstanding Variety Talk Series ne-Outstanding Writing For A Variety Series.
I-Emmy Award inikwa abantu abasebenza e-USA abenza umsebenzi oncomekayo emkhakheni wezethelevishini.
UNoah wethula uhlelo iDaily Show kanti wedlulise amazwi okubonga kwabaqhubeka nokumeseka. Ubhale ekhasini lakhe kuTwitter wathi: “Ngikhathele kodwa ngizizwa ngibusisekile futhi kufeziwe. Kuyamangalisa ukuthi uhlelo lwami @thedailyshow luqokwe amahlandla ayisithupha kulo nyaka. Ingabe ngempela lokhu kuyiqiniso? Ngiyabonga kakhulu kwabe@TelevisionAcad ngokubona umsebenzi wami.”
Abalandeli bakhe bambongelile uNoah ngokuqokwa kwakhe kanti nosaziwayo bakuleli abafunanga ukusala ngaphandle. UNandi Mngoma ongumculi obuye abe usomabhizinisi uthe uNoah uhlale enza iNingizimu Afrika iziqhenye ngaye. Wamfisela amandla okuqhubeka nokugila izimanga. UJessica Nkosi ongumlingisi weThe Queen kanti phambilini ugqame ku-Isibiya, nomlingisi weThe
River uTsholofelo Matshaba abamdlelanga mona umfo kaNoah.
Lowo owayenguMvikeli WoMphakathi u-Advocate uThuli Madonsela uchaze uNoah njengomuntu oyisibonelo esihle ikakhulukazi entsheni. Uthe lezi zindaba zokuqokwa kwakhe kuma-Emmy ziqhamuka esikhathini lapho abantu bedinga into ezobajabulisa kancane njengoba kubhidlange ukuhlasela kokhuvethe.
Njengoba kuhlasele lesi sifo uNoah ubedudula lolu hlelo lwakhe esithabathabeni somuzi wakhe eNew York City. Ekuqaleni kwalo nyaka kwavela imibiko ethi uNoah nguye okhokhela abantu abali-25 abasebenza ekukhiqizeni lolu hlelo yize izinto zitshekiswe ukuhlasela kokhuvethe.
Ama-Emmy ahlelelwa ukuba mhla zingama-20 kuMandulo kanti umphathihlelo kuzoba uJimmy Kimmel ongumlingisi, usomahlaya abuye abe umphathi wohlelo kuthelevishini.
Uma sibuyela kwezakuleli, umdlalo obukwa kakhulu kuneminye ezweni Uzalo, usulande umakadebona womlingisi iJey Novuka. Uneminyaka esebenza emdlalweni yethelevishini nasengqayini. Indawo alandelwe yona ngeyokuba uKaputeni uYamkea Mpamba. Omunye umlingisi ozobonakala uNomcebo Gumede olingisa indawo kaMumsy owashubisela uMastermind, owayengomunye wemigulukudu ehluphile KwaMashu ngobugebengu.
Kufika oNovuka nje, sekuqinisekiwe ukuthi abanye bazoshiya.
Labo uNomcebo obuye aziwe ngoMamfundisi, odlalwa uNombulelo Mhlongo kanye nezelamani zakwaKhanyile oThulani noSiyabonga, abebelingiswa uThulani Shange noSizwe Khumbuza.
Lezi zelamani zizokhunjulwa ngokuqumba phansi isichwensi nesiqhwaga uNkunzi, odume ngokuba uhodoba wesigebengu kuleli lokishi laseThekwini.
NeGenerations: The Legacy ayifunanga ukusala ngaphandle ngokwenza izinguquko njengoba ilande uJo-Anne Reyneke.
Lo mlingisi useke wabonakala emidlalweni eminingi efana noMuvhango ne-Isidingo. Uzodlala indawo kaRefilwe Zungu oyindodakazi engazalwa uNkaba onguNimrod Nkosi igama lakhe langempela.
URefilwe uchazwe njengomuntu ohlakanaphile, onamaphupho nokwazi ukuyenga kalula umuntu ukuze athole akufunayo. Kuthiwa uyise uDaniel Zungu wayengomunye wabalwa nobandlululo lwamaBhunu wamshiyela ingcebo. URefilwe uzovezwa esetshenziswa uNkaba ukulwa izimpi zepolitiki kanti akabuzanga elangeni njengoba le ntokazi izomgila igoda.