Idumela nesasasa kukaJuly kudanjiswe wukhuvethe
Ukuvalwa ukuhanjelwa kwezindawo zokudla nobumnandi ngenxa yokhuvethe kubalimazile abanikazi bazo.
Kuvele kwafana nokuqhamuka komuntu adedele induku ekhanda kuvele udume lwengozi ngesikhathi sekuvalwa nokudayiswa kotshwala.
Kuyinto eyaziwayo ukuthi amanzi amponjwana angenye yezinto ezingenisa kakhulu imali ebhizinisini lokungcebeleka.
Kufuze ukuthi abanikazi bezindawo ezivamise ukumumatha amakhulu abantu bademelayise ngabodwana ngesikhathi sekuphinde kuvalwa utshwala kwaqondana nenyakanyaka yomcimbi iVodacom Durban July (VDJ).
I-VDJ ivamise ukuheha izinkulungwane zabathandi bobumnandi eGreyville. Ngemuva komjaho wamahhashi izimoto ziba ujenga amabombo ebheke ezindaweni ezigcwele umgwaqo uFlorida eThekwini, ikwaMax Lifestyle nakwaMjay eMlazi naseUnder the Moon eNanda.
Lo mcimbi ubizwa ngeVDJ Experience lapho kusuke kuhlangene izinhlobonhlobo zabantu ezisuke zizodlisela ngengqephu nangohlobo oluphambili lweziphuzo ezisuke zidekwe ematafuleni.
Ngenxa yokulandela imigomo kaHulumeni lezi zindawo ziqhubekile nokwenza imicimbi kodwa ngohlelo lobuchwepheshe, lapho abantu bebebuka umcimbi kumathelevishini nasezinkundleni zokuxhumana. Le ndlela ibakhalisile abanikazi balezi zindawo. UMnu uMakhosonke Phungula (osesithombeni) we-Under The Moon uthe baphoqekile ukuthi izinto abavamise ukuzenza ngesikhathi seVDJ bazenze ngohlelo lwedijithali. Uthe yize abantu bengachithanga imali eningi njengaseminyakeni edlul kodwa kumjabulisile ukubona abantu belandela imithetho efana nokuqhelelana nokufaka zimfonyo.
“Angeke safihla ukuthi isimo esibhekene naso sisishayile kodwa besizobuye senze njani? Lesi simo sisiphoqe ukuthi sihambisane nesikhathi sesimanje ukuze liqhutshwe ibhizinisi. Kungijabulisile ukubona abantu befika bezozitika ngenyama eyehla esiphundu esidume ngayo kule ndawo yethu,” kusho uPhungula.
Ubonge uMnyango Wezokuvakasha eThekwini neMetro FM anobudlelwano nayo ngokusebenzisana ngalesi sikhathi esinzima ababhekene naso.
Lo somabhizinisi uthe bayethemba ukuthi lesi sikhathi sizodlula bese isimo sibuyela kwesejwayelekile.
Uthe wasungula le ndawo ngoba efuna ukuthi izivakashi ezisuke zihambele iNanda Heritage zikwazi ukuphola zetshise ngohambo.
“Le ndawo yethu iphakathi nekhaya likaBaba uMafukuzela uJohn Langalibalele Dube oHlange kanye nesonto elibalwa namakhulu emhlabeni lakwaShembe. Uma uvakashela kule ndawo yethu uzothola ukudla kwesintu, ushisanyama kanti sinezindawo iVIP Lounge, iBalcony nePrivate Lounge.”
UNks Zinhle Mqadi oyiMarketing Manager kwaMax Lifestyle uthe nabo bashayekile ngoba iVDJ ifike utshwala sebumisiwe ukudayiswa. UZinhle uthe bafaka isicelo sokuthi abantu abahambela indawo yabo bakwazi ukubhejela amahhashi.
“Asipholisanga maseko ngesikhathi sizwa kuthiwa iVodacom July izokwenziwa ngendlela yobuchwepheshe. Ngenhlanhla sanikwa ilayisense abakwaGold Circle sekusele isonto umjaho wenziwe.
Ukwethenjwa abakwaGold Circle kukodwa nje kusenze sazigqaja safisa ukuhamba sigcwale izitaladi ngenxa yenjabulo. Kakade thina sihlale sifuna ukwehluka kwabanye. Ukwenza abantu abahambela indawo yethu bekwazi ukuzithokozisa ngokubheja bebe bedla inyama eyehla kamnandi esiphundu nokunye kokwehlisa, kuyasijabulisa kakhulu,” kusho uZinhle.
Eqhuba uthe: “Sigqemeke enkulu ingozi ngokuvalwa kotshwala. Labo abavamise ukutheleka kule ndawo bezozithokozisa sebefikela inyama kuphela futhi abasahlali kakhulu.”