Imiyalelo nemigomo yokuthethwa kwecala ngesokhuvethe
Sekushiwo kaningi ukuthi unyaka wezi2020 uyohlala emlandweni uwunyaka obe nezigemegeme futhi ofike waguqula izinto eziningi okuhlanganisa izindlela okwenziwa ngazo izinto.
Lokhu akwenzekanga kuphela eNingizimu Afrika kepha umhlaba wonke. Ukuhlasela kwesitha esingabonwa ngamehlo ukhuvethe, kuvulele abanye amathuba angcono kwathi abanye isimo sabo sempilo ebesivele singesihle saqhubeka saba sibi kakhulu.
Sesibona ngisho nendlela izinkampani ezisebenza ngayo isiguqukile. Eziningi sezisebenzela emakhaya kanti kwezinye sehlisiwe isibalo sezisebenzi.
Ngesikhathi uMengameli uRamaphosa ememezela okokuqala imvalelwakhaya kwaba nokudideka kwabaningi ukuthi izinkantolo zona zizosebenza kanjani. Ngesikhathi iqala imvalelwakhaya kube neziqubu lapho imindeni yabebevela ezinkantolo ingavunyelwe ukungena ngaphakathi ezakhiweni zezinkantolo ngenxa yokuqinisekisa ukuqhelelana kwabantu. Lokhu kwashiya ukudideka okukhulu kubantu. Izinkantolo ezifana neNkantolo Yokudluliswa Kwamacala zimemezele izindlela ezizosebenza ngazo kulesi sikhathi.
INkantolo Yokwedluliswa Kwamacala
Mhla zingama-24 Mbasa wezi-2020 uMengameli Wenkantolo Yokwedluliswa Kwamacala eBloemfontein wakhipha umyalelo ngendlela le Nkantolo ezosebenza ngayo ngalesi sikhathi sokhuvethe. Lo myalelo wabuye wachitshiyelwa. Lokhu kwenziwa ngaphansi kwamandla anikwe uMehluleli Omkhulu kanjalo namandla ezinkantolo ngaphansi kweSigaba 8(4)(b) soMthetho Wezinkantolo Eziphakeme uNombolo 10 wezi-2013 esikhuluma ngokuhlalelwa kwamacala kusetshenziswa izindlela zokuxhumana.
Ngenxa yesimo sokhuvethe kube nesidingo sokuthi kuqalwe kwenziwe kube semthethweni indlela okulalelwa ngayo amacala eNkantolo Yokwedluliswa Kwamacala.
Ukusetshenziswa kwendlela yokuxhumana ngobuchwepheshe kube ngenye okuhlonzwe ukuba isetshenziswe kuze kube kukhishwa omunye umyalelo.
Inhlosongqangi ukuqinisekisa ukuqhubeka kokuthi abantu bakwazi ukuthola ubulungiswa emacaleni aphambi kwenkantolo nokuvikeleka ekuthelelekeni ngokhuvethe ngesikhathi kulalelwe amacala lapho bonke abathintekayo kufanele babambe iqhaza ngokugcwele.
Okwenziwa inkantolo
Amacala angalalelwa ngocingo noma ngezindlela zolwebuvidiyo (video-web) uma zikhona. Njengamanje ayikho indlela eyodwa ebekiwe engasetshenziswa ngabezobulungiswa nezinkantolo kepha abathintekayo bangakhetha noma iyiphi okuhlanganisa iMicrosoft Teams efakwe kumalaptop abezobulungiswa, iWebex, iZoom noma iyiphi enye okungaxhunyanwa ngayo ngokuyalela kwenkantolo. Nakuba kusetshenzwa ngale ndlela, imvume yenkantolo ecelwa kumbhalisimacala isadingeka kuwona wonke amacala alalelwa ngale ndlela.
Kungenzeka kube namacala adinga ukuba ahlehliswe ngenxa yokuthi isimo asivumi futhi nokuya kwabathintekayo enkantolo kungaphephile futhi ingekho indlela okungenzeka ngayo.
Lokhu kufanele kuvezwe kahle futhi nesaziso sinikwe umbhalisimacala.
Kuvumelekile ukulalelwa kwecala ngocingo noma ngevidiyo okuhlanganisa abantu abaningi ngesikhathi esisodwa kanjalo nelihlanganisa abameli bodwa.
Esimweni lapho inkantolo iyalela ukuthi olunye uhlangothi luhlele noma lusingathe ukulalelwa kwecala, lolo hlangothi kumele luthathwe njengolugunyaziwe futhi olufanelwe ukwenze njalo.
Indlela okuzolalelwa ngayo icala kufanele kuvunyelwane ngayo ekuqaleni kwecala ngalinye. Ekufakweni kwesicelo zonke izinhlangothi kumele zinike umbhalisimacala amakheli ama-imeyli nezinombolo zokuxhumana zeWhatsapp zabo bonke abathintekayo okuhlanganisa nabameli.
Imigomo elandelwayo
Kunoma iyiphi indlela eqokiwe ezosetshenziswa, kunemithetho okufanele ilandelwe:
Ukulalelwa kwecala ngale ndlela akuguqukile kwejwayelekile yasenkantolo futhi konke okwenziwayo kufanele kwenziwe njengasenkantolo lapho kunabehluleli nakuba bonke abathintekayo besezindaweni ezahlukene.
Indlela okwethulwa ngayo ubufakazi noma okukhulunywa ngayo iyafana ncamashi noma kwenziwa enkantolo, abehluleli nabameli kulindeleke ukuthi bagqoke ngendlela yakhona. Inkantolo inganquma ukusebenzisa ezinye izindlela ezisemthethweni okulindeleke ukuthi abathintekayo bazithobele.
Kulindeleke ukuthi zonke izinhlangothi zilungise izindawo ezizokwenzela kuzona lokhu kuxhumana zibe sesimweni sokuthi kungaphazamiseki ukulalelwa kwecala. Izimo ezifana nomsindo oqhamuka ngemuva kumele zincishiswe noma zigwenye uma kungenzeka.
Abameli nabanye abayingxenye kufanele babe sendaweni ephephile, evalwe iminyango futhi engenabo abanye abantu. Akufanele kube nokukhanya okuzohlaba ikhompyutha esetshenziswayo noma kube nezinto ezizoba ngemuva kwabazokhuluma ezingaphazamisa.
Imikhawulo yezokuphepha kufanele ihlonzwe futhi ilungiswe ngaphambi kokuba kuqale ukulalelwa kwecala. Zonke izinhlangothi kumele zihlole ukuthi izithombe zevidiyo nomsindo kusesimweni esikahle yini ngaphambi kokuba kuqalwe.
Uma kunesidingo abameli kumele baxhumane ngendlela ezosetshenziswa nomahluleli ozohlalela icala ukubonisana ngamalungiselelo ecala.
Icala kufanele liqale ngesikhathi esibekiwe kanti abehluleli bayozilungisela ukuthi babekhona kusukela ngaleso sikhathi. Icala liyabizwa bese kuthi umehluleli abize abathintekayo. Olunye ulwazi oluthe xaxa lungadingeka, kubhekwa nokuthi ngabe lokhu kungenzeka yini ukuze inkantolo izenelise ukuthi konke kuzohamba kahle futhi bonke bayakuqonda okuzokwenzeka, yini okulindeleke ukuthi bakwenze, imikhawulo yezobuchwepheshe nokuthi ezinye izinto zenziwe ngenye indlela ukuze kusizakale wonke umuntu.
Umehluleli nguye oshoyo ukuthi ufisa kwenzekeni ukubhekana nokuphazamiseka. Kungenzeka ukuthi kufuneke ukuthi wonke amakhamera evidiyo avalwe bese evulwa ukukhombisa uma kukhona ofuna ukuphikisa omunye noma ukubeka okuthile. Kungenzeka ukuthi wonke amakhamera evidiyo avulwe ngesikhathi kuqhubeka icala. Uma abameli noma abathintekayo bengakhulumi imibhobho yabo kufanele ivalwe bayivule uma sebekhuluma.
Uma isikhathi sivuma ummeli oyedwa angabhekana nokulawula ukuxhumana nge-imeyli nomehluleli noma umbhalisimacala ukuze izicelo zesikhathi esithe xaxa zisetshenzwe ngokushesha.
Konke ukulalelwa kwamacala okwenziwe ngevidiyo kumele kuqoshwe. Kuye ngomyalelo wenkantolo, umthwalo wokuphathwa kwezinto eziqoshiwe ubekwe emahlombe alabo noma inkantolo ehlele ukulalelwa kwecala ngale ndlela yokuxhumana. Lapho osingethe lolu hlelo kungummeli kumele emuva nje kwecala anike inkantolo indlela yokungena emininingwaneni eqoshiwe okufanele ifakwe kusizindalwebu senkantolo.
Akekho ovunyelwe ukuqopha icala ngaphandle kwemvume yenkantolo.
Esimweni lapho kukhona uhlangothi olungakwazi ukwethamela icala ngendlela yobuchwepheshe (uma bengenawo ubuchwepheshe bokuxhumana noma ukuxhumana nge-inthanethi kungekuhle) lungathamela ngocingo okungahlelwa ofake isicelo noma inkantolo lapho iznhlangothi zingenabo abameli.
Abezindaba bangavunyelwa ukuba yingxenye yokulalelwa kwecala ukuze umphakathi uhlale wazi ngezinto eziwuthintayo. Abezindaba abafisa ukwethamela bangaxhumana nombhalisimacala ukukhombisa izifiso zabo kanti izinhlelo zingenziwa ngunobhala kamehluleli.
Lapho kunezinkinga zobuchwepheshe ezingaphezu kwamandla nezingeke zagwemeka, ukulalelwa kwecala kungamiswa kulungiswe lezo zingqinamba. Esimweni lapho ukulalelwa kwecala kungeke kwakwazi ukuqhubeka, ukuthethwa kabusha kwecala kungahlelwa kuthi abathintekayo balulekwe ngendlela efanele. - nguSabelo Mbatha