Kulamule iNkantolo Enkulu uSARS ebhozomela imali kasomabhizinisi
Ekuqaleni kukaNtulikazi nonyaka iNkantolo Enkulu yasePitoli itakule usomabhizinisi imnika ukuphefumula emuva kokuba iSouth African Revenue Service (SARS) ingene ku-akhawunti yakhe yasebhange yazithathela imali ngaphandle kokulandela imigudu efanele.
Le Nkantolo iyalele uSARS ukuba umise ukuqokwa kwebhange i-Absa ebese lithathe imali eyis-R1 300
000 ku-akhawunti yasebhange kalo somabhizinisi iqoqela le nhlangano isikweletu sentela ngokweSigaba 179 soMthetho Wokulawulwa Kwentela [Tax Administration Act (TAA)].
INkantolo iphinde yayalela uSARS ukuba ubuyisele emuva imali ebithathwe ku-akhawunti yasebhange yalo somabhizinisi kanjalo nezindleko zesicelo esikhathini esiyizinsuku ezintathu kukhishwe lesi sinqumo.
Lokhu kwenzeke emuva kwesikhashana kube necala iSIP Project Managers imangalele uKhomishana wakwaSARS lapho inkantolo yalahla umqoqintela mayelana nokuqokwa kwabazoqoqela uSARS imali yentela abayikweletwayo.
Ecaleni ebeliseNkantolo Enkulu yasePitoli, i-akhawunti yasebhange kamkhokhintela yamiswa yaphinde yasala ingenamali lokhu okwenzeka ngaphandle kokuthi lo somabhizinisi aqale aziswe ngabakwaSARS ngalokhu.
Ebona ukuthi uSARS usezithathele emalini yakhe futhi obekungeyokugcina ebikhona, waphuthuma waxhumana nomeluleki wakhe kwezentela efuna ukwazi ngesimo sakhe sentela.
Umeluleki wakhe waxhumana noSARS ebazisa ngalesi simo nomonakalo ngasezimalini osuwenzekile kulo somabhizinisi ekubeni kwakubonakala ukuthi akayikweleti intela. Ngenxa yalokhu, lo somabhizinisi uphoqelekile ukuthi avale izitolo zakhe ezimbili kwezintathu eGoli.
USARS wethembisa ukuthi uzoluphenya lolu daba kodwa kwakungekho okwakukhombisa ukuthi lungase luxazululwe ngokushesha.
Ngenxa yokuphuthuma kodaba lo somabhizinisi wayalela abameli bakhe ukuba baye eNkantolo Enkulu ePitoli bayofaka isicelo esiphuthumayo.
Ngesikhathi salesi sicelo esiphuthumayo nangaphambi kokuba uSARS aqoke ozomqoqela imali, lo somabhizinisi ubengayikweleti intela ayikhokhayo okuyi-Income Tax neValue Added Tax.
Eqinisweni kwavela ukuthi uSARS nguye okweleta lo somabhizinisi imali ethile.
Okulindeleke kuSARS
Ngalesi sikhathi esinzima kwezezimali, uSARS kulindeleke ukuthi asebenzise amandla akhe ukuqoqa imali yentela ezosiza isikhwama sezwe. Kodwa lokhu akusho ukuthi akwenziwe noma yikanjani kungalandelwa umthetho kuqokwe amabhange njengabazokwenza lo msebenzi.
Kunemithetho ecacile okumele ilandelwe futhi lokhu kuzuzisa umphakathi okudinga indlela efanele yokuqoqa imali kodwa kungasetshenziswa budlabha amandla kaSARS.
NgokweTAA, umkhokhi wentela kumele aziswe ngesikweletu sentela anaso nokuthi kuzoqokwa ozosiqoqa okungaba yibhange uma kungekho okwenziwe okweletayo ukulungisa lokhu.
Uma uSARS engamazisi ngendlela efanele okweletayo ngokuthi amubhalele incwadi yokugcina yokufuna imali ekweletwayo, akakwazi ukuthatha izinyathelo zokuqoqa imali.
ITAA ikwenza isidingo esisemqoka ukuthi uSARS ukhiphe incwadi yokugcina yokufuna ukuthi okweletayo akhokhe. Lokhu kumele kwenziwe esikhathini esiyizinsuku ezili-10 ngaphambi kokuba uSARS uqoke ozoqoqa isikweletu kanti lokhu kwagcizelelwa esinqumweni secala elalifakwe iSIP Project Managers.
Kubalulekile ukuthi abakhokhintela baqinisekise ukuthi amalungelo abo avikelekile ikakhulukazi kulesi sikhathi sokhuvethe lapho okubonakale uSARS uqinisa isandla ekuqoqeni izikweletu zentela.
Kunokungaqondile kahle emithethweni yentela engazivumeli izikhulu zakwaSARS ukuba ziphoqwe ukuphendula ngezikwenzile
Amandla kaMxazululi Wezentela (Tax Ombudsman) anqindiwe njengoba kubonakala embikweni wabo wakamuva lapho uSARS unqabele uMxazululi ukuba afake imibuzo izikhulu zayo ezithinteka ezenzweni ezithile. Akucaci ukuthi ngabe zikhona yini izinyathelo zangaphakathi uKhomishana wakwaSARS azithathela izikhulu.
Okwamanje okubonakala kungasiza abakhokhintela abanezikhalo noma abanganelisekile ngokwenziwa uSARS, ukuthi bakhalele eNkantolo Enkulu. Kula macala amabili abalulwe ngenhla abelalelwe aBehluleli uLingenfelder no-Avvakoumides ngokwehlukana, abakhokhintela bakutholile ukuvikelwa kwamalungelo abo akuMthethosisekelo wezwe kuSARS.
Nakuba kubonakala ukuthi izinkantolo ziyakwazi ukuvikela abakhokhintela kodwa kubalulekile ukuthi nabo baqinisekise ukuthi amagama abo mahle kwaSARS futhi bayakuqikelela ukuthi bayayithumela imininingwano yabo yentela ngesikhathi esifanele njalo ngonyaka.
Kwesinye isikhathi ayenzeka amaphutha ngasohlangothini lwakwaSARS kodwa okuvelayo ukuthi esikhathini esiningi lokhu kudalwa ubudedengu bezisebenzi zakhona futhi ngeke yabalekelwa eyenkohlakalo edla lubi eNingizimu Afrika.
Ngaphezu kwalokho kubalulekile ukuthi abantu bawaqonde amalungelo abo avikelwe uMthethosisekelo.
- nguSabelo Mbatha