Indluzula kuphoqwa imithetho yokhuvethe eColombia
Ukufika kokhuvethe kwaphoqa amazwe amaningi ukuthi akhiphe isinqumo semvalelwakhaya ukuze azame ukunqanda ukwanda kwalesi sifo. Kodwa iqiniso lalithi kulele kuzo izakhamuzi ukuba zihloniphe konke okwakushiwo abaholi bezwe ukuze kuliwe nokwanda kokuthelelana ngokhuvethe.
Kuleli sonto sekuvele imibiko eqhamuka enhlanganweni iHuman Rights Watch (HRW) ethi amaqembu abantu abahlomile ezweni iColombia asebenzisa izindlela zokubulala kanye nezinye zodlame ukuphoqa ukuthi izakhamuzi zilandele imithetho yazo yemvalelwakhaya.
Umqondisi weHRW esifundeni i-Americas uthe: “Emiphakathini eminingi yaseColombia amaqembu abantu abathize abahlomile nabasebenzisa udlame ayaqhubeka nokuphoqa ukuba izakhamuzi zihloniphe imithetho yemvalelwakhaya ekulwisaneni nokwanda kokuthelelana ngokhuvethe.”
Inhlangano iHRW kula masonto amabili adlule ibike ukwanda kokubulawa kwabantu kanye nodlame kuzakhamuzi okwathi abezomthetho baleliya zwe bakubiza ngendlela yokuziphindiselela kulabo ababengayilandeli imithetho yemvalelwakhaya eyayihlelwe yila maqembu ahlomile.
Lezi zindlela zodlame kubalwa kuzo ukuhlaselwa kwezimoto kanye nokuthunyelwa kwabathile izincwadi zezinsongo.
IHRW ibike ukuthi ukuze ithole yonke imininingwane ngalokhu okwakwenzeka kwadinga ukuba ixoxisane nabantu abangama-55 ezifundeni ezingama-33 eColombia yaphinde yahlangana nabaholi bemiphakathi, abashushisi, amalungu ezinhlangano zosizo, amaphoyisa kanye nezakhamuzi, yaphinde yabuyekeza amapheshana ayesayinwe yila maqembu abahlomile ukuzama ukubheka ukuthi iwona ngempela yini la maqembu ayezibhalile.
Okwavela kwenye yezincwadi ezaziqhamuka kula maqembu isitatimende esasithi: “Labo ababetholakala behluleka ukulandela imigomo babezohlawula ngempilo yabo…Kulele ekutheni uyayihlonipha imigomo noma uyafa.”
La maqembu asolwa ekubeni isandla sesithathu esinonya ekuqinisekisweni kokulandelwa kwemigomo yemvalelwakhaya kubalwa iNational Liberation Army (ELN), iPopular Liberation Army (EPL), iGaitanist Self-Defenses of Colombia (AGC) kanye nabanye abaphuma eqenjini iFARC elalibalwa njengelikhulu labahlomile kuleliya lizwe kodwa lasayina isivumelwano sokuthula noHulumeni ngonyaka wezi-2016.
Kodwa-ke amaqembu athize aphuma kulo leli ayaqhubeka nokusebenza kuleliya lizwe.
Emibikweni yeJohn Hopkins University, iColombia ibekwe njengezwe lesihlanu lilandela iMexico, iChile, iPeru neBrazil esifundeni iLatin America elinezibalo eziphezulu njengoba linabantu abacishe bafinyelele ezi-160 000 asebetheleleke ngokhuvethe.