Kumiswe uMphathiswa waseGauteng ngezinsolo zenkohlakalo
Unikwe ikhefu lamasonto amane uMphathiswa Wezempilo eGauteng, uDkt uBandile Masuku, kulandela uphenyo ngezinsolo zenkohlakalo okuthiwa yenzeka kulo Mnyango ngethenda yezinto zokuvikela ukutheleleka ngokhuvethe amaProtective Personal Equipment (PPE).
Lokhu kudalulwe uNdunankulu wakulesi sifundazwe uMnu uDavid Makhura izolo ngesikhathi isigungu sakulesi sifundazwe esibhekele ukhuvethe sinesithangami nabezindaba oveze ukuthi isikhundla sikaMasuku sizobanjwa uMphathiswa Wezokuthutha uMnu uJacob Mamabolo.
Uthe uMasuku uzoba sekhefini kuze kube kuphothulwa uphenyo.
Lokhu kulandela izinsolo ngethenda lemali engaphezu kwezigidi ezili-R125 okuthiwa lanikwa inkampani yeNkosi uMadzikane II Diko iRoyal Bhaca Projects.
INkosi uDiko ingumyeni kaNkk uKhusela Diko ongumkhulumeni kaMengameli Ramaphosa naye osahlabe ikhefu ngenxa yalezi zinsolo.
UMakhura ukhale ngokuthi le nkohlakalo ethinta uMasuku, uNkk uDiko nomyeni wakhe ilahlise ithemba kubantu ngoHulumeni.
I-African National Congress (ANC) kulesi sifundazwe ithe icele uMasuku, inkosikazi yakhe uLoyiso esesiguswini seMeya kuMasipala waseJohannesburg noNkk uDiko osesigungwini esiphezulu sesifundazwe seqembu ukuba bashenxe.
UNobhala we-ANC esifundazweni uMnu uJacob Khawe uthe isigungu sesifundazwe sithathe isinqumo sokuthi laba abathathu bahlabe ikhefu ngesikhathi iKhomishini yeqembu ebheka ukuziphatha kwamalungu alo isaphenya lezi zinsolo zenkohlakalo ezenziwe kwabezindaba.
Kumanje zingaphezulu kwezili-102 izinkampani eziphenywayo nezisolwa ngokuhlomula kungafanele kumathenda okhuvethe.
Ezinye kuthiwa bekubonakala abanikazi bazo sebethenga izimoto nemizi kanokusho kodwa umsebenzi bengawenzanga.
Yilokhu okuvule abantu amehlo kanti ezinye izinkampani kuthiwa zicetshwe yilabo abakhala ngokuthi bathenjiswa iqatha mhla zithola umsebenzi kodwa babalekelwa uma sekungene imali.
KwaZulu-Natal khona kuthiwa kunezinkulungwane zezingubo zokulala esezidliwa amagundane ezathengwa ngezigidi zemali yokhuvethe kungaziwa ukuthi zizoyiswaphi.
Izinsolo ngenkohlakalo esivelile ngokudliwa kwemali ebihlinzekelwe ukulwa nokubhebhetheka kokhuvethe zisabalalise okomlilo wequbula ezweni lonke kanti izifundazwe ezikhonjwa ngenjumbane yiyo iGauteng, iKwaZulu-Natal neEastern Cape.
Njengoba esho uMakhura lezi zinsolo zilahlise ithemba ngemizamo kaHulumeni yokulwa nenkohlakalo kuleli.
Okukhalisa kakhulu izakhamuzi ukuthi udaba lwenkohlakalo ethinta izikhulu zikaHulumeni nosomabhizinisi abasondelene nazo aluqali manje sekunesikhathi kukhulunywa ngalo kwezinye izikhathi kuze kusungulwe amakhomishini aphenyayo kodwa abakhonjwa ngenjumbane bangathathelwa izinyathelo.
Amaqembu aphikisayo nawo awasalanga ngaphandle kolwaseGauteng ukugxeka lezi zinsolo aze aphakamisa ukuthi uMasuku asuswe kulesi sikhundla asiphethe.
NoNgqongqoshe Wezezimali uMnu uTito Mboweni uveze ukuthi uHulumeni usacabanga ukuthi uhlelo lokuthengwa kwezinto zokuzivikela kukhuvethe kwenziwe endaweni eyodwa. Nokho uthe akulona iqiniso ukukholwa ukuthi kunenkohlakalo kuwo wonke amathenda okhuvethe akhishwa uHulumeni.