Ikhansela ezinsolweni zokudlwengula eMatatiele
Likhipha ingonyuluka ikhansela loMkhandlu waseMatatiele esifundazweni i-Eastern Cape elikhala ngokuthi bacushwa ngesinene ngaphakathi enhlanganweni ngenhloso yokuqeda ngekusasa labanye osopolitiki okungaba manje badonsa iminyaka ejele ukuba bekuya ngokwezifiso zabanye osopolitiki kodwa bayasinda emlonyeni wengwenya ngenxa yamandla kaNkulunkulu.
IKhansela uSibongiseni Bhabha (38) ukukhuluma lokhu nje naye ubhekene necala lokudlwengula owesifazane oyivolontiya le-African National Congress (ANC) egatsheni lakuWadi 14 lapho eyikhansela khona.
Ungaphandle ngebheyili ye-R1 000 emuva kokuboshwa amaphoyisa ase-Avondale eMatatiele ngoMasingana wonyaka odlule.
Kuthiwa waya kubo kwentombazana ebusuku kuyimpelasonto ngesikhathi kweziwa umsebenzi wokubhaliselwa kokhetho lomasipala olwalu ngoNhlaba nyakenye eyobheka ukuthi umsebenzi lo msebenzi wenzekile yini kuleli lungu.
Wathumela muntu thizeni oyisihlobo kubo kammangali nalapho kuthiwa wayenqaba ukuhamba nekhansela ngoba ekhala ngesikhathi kodwa wancengwa ngunina ngoba ethemba ikhansela nokuthi wayefuna umsebenzi kaKhongolose wenziwe ngokuphelele.
Kuthiwa wahamba nekhansela kodwa wabuya masinyane wayozivalela ekamelweni lakhe. Kwaba yilapho-ke unina amxina ngemibuzo ukuthi kwenzekile yini abekuhambele kodwa kwabonakala ukuthi ugcwele udaka emzimbeni futhi akaphathekile kahle. Kwabe sekuthintwa amanye amalungu enhlangano wabe esechaza ngokumehlele.
Noma kunjalo uBhabha uphike wama ngentaba ngesikhathi ebuzwa yiBAYEDE ukuthi kukhona yini obekumhlanganisa nommangali ngezothando kumbe izinkanuko abenazo kodwa esikhundleni sokunika impendulo eqondile uvele wathi: “Yivolontiya nje leli kakukho okunye esihlangene ngako.”
Uqwashise abesilisa ngaphakathi enhlanganweni nasezweni ukuthi basukume, baqine uma kwenzeka bebhekana nezimo zokubhecwa ngamacala ocansi ngoba bangazibona sebegwinywa yingwenya ngenxa yetwetwe, ikakhulukazi uma bengawenzile lawo macala ababhecwa ngawo.
“Ngalokhu kangizami ukudala inzondo phakathi kwabesifazane nabesilisa kumbe ngikhuthaza ukuxhashazwa kwabo kodwa kufanele nathi sizibheke ngoba iningi lamadoda asephenduke izisulu zomthetho ngamacala okunukubeza kumbe okuxhaphaza omama nezingane kodwa bengawenzanga. Ubufakazi balokho nawe uyazifunda izindaba abantu bedonsa iminyaka emajele kodwa kugcine sekuthiwa bayakhishwa ngoba bagwetshwa ngephutha,” usho kanje.
Akananazi ukuthi nakuyena lizovela iqiniso futhi baningi abazojabha uma inkantolo imthola engenacala ikakhulukazi labo abalambele isikhundla sakhe sobukhansela besebenzisa amandla abo ngoba bezwana nozibanibani abasezikhundleni ukuze badicilele phansi izithunzi zabanye abantu badliwe yizembe.
Kulokhu kalipheli igama lelungu leSishayamthetho uNks uNtombovuyo Nkopane onguSihlalo WoZihlalo eSishayamthetho kulesiya sifundazwe okubikwa ukuthi wayephambili ekuhleleni ukuthi kuvulelwe uBhabha icala.
“Lokhu wakwenza ngisho imishini kadokotela yokuhlolwa kwabadlwenguliwe isikuvezile ukuthi kabukho nobuncane ubufakazi bokuthi ummangali uke wahlangana nowesilisa ngokocansi,” kusho uBhabha.
Uthi uzwana nowayeyiKhansela ngowezi-2010 uNks Masechaba Tsolwane ongabuyelanga ebukhanseleni ngowezi-2016 okubhekeke noma okuhlelwa ukuthi uma ephuma uBhabha uzongena.
“Bagijima baya emaphoyiseni aseMaluti lapho bafike batshelwa ukuthi lelo cala kufanele livulwe emaphoyiseni aseAvondale ngokomngcele kodwa nalapho waqhubeka wathinta uKhomishana Wamaphoyisa uLt Gen uLiziwe Ntshinga esifundazweni ngoba inhloso kwakuwukuthi ngivulelwe icala. Ubufakazi balokho isitadimende sathathelwa ezindlini zamaphoyisa aseMaluti uma ningaphazami ngenxa yengcindezi amaphoyisa ase-Avondale ayebhekene nayo futhi amaphoyisa eza kuyona ingane esikhundleni sokuthi omangalayo kube uyena oya emphoyiseni,” kuchaza uBhabha.
Uthe kusetshenziswa umndeni ozilungele olokhu unikwa izijumbana zokudla ngoba kufunwa ukuthi umcindezele kuze kube uyacwila.
UBhabha uthi kuyaziwa ukuthi umndeni womgilwa usukhathele yile nto futhi awusafuni nokuyizwa kodwa ngenxa yokuthi uswele ununuselwa ngakho konke futhi ungaphansi kwengcindezi enkulu uzibona ungenayo enye indlela.
“Kodwa-ke engingakusho bavela obala osomathuba kupolitiki ngoba ngisho neANCWL ayeyisebenzisa ngesikhathi belwa nokuthi ngithole ibheyili kayisayingeni kangangoba usehamba nabanye manje ngoba abokuqala bambona ukuthi ungumuntu onjani,” kusho uBhabha.
Okuthiwa ubhongoza uyaphendula
IBAYEDE ixhumane noNks uNkopane othe: “Konke akukhulumayo uhubhu kabhejane. Mina bengisiza lapho ngicelwe ukuthi ngisize khona njengelungu leSishayamthetho elihola izinhlelo zokuqinisekisa amalungelo abesifazane.”
Uthe udaba lwafikela kuNksz uTsolwane ababesebenza naye emagatsheni enhlangano ngaleso sikhathi. “Samuzwa ekhuluma ocingweni ehayiza saxakeka sonke nalapho wasitshela ukuthi uthola indaba yokuthi ukhansela udlwengulile” kusho uNksz uNkopane.
Uthe uceliwe ukuthi abaphelezele ngemoto lapho bafika umama kamgilwa ekhala ngengane yakhe ethi useyazisola ngoba uyena owayiphoqa ukuba ihambe nekhansela ngalobo busuku ngoba wayecabanga ukuthi kubalulekile ukuthi umsebenzi wenhlangano wenziwe futhi uhambe phambili.
UNks uNkopane uthe umama wakhala ngokuthi ingane wayikhulula ngokwethemba ikhansela engazi ukuthi inhloso kwakuwukuyidlwengula.
“Mina ngaqaphela ngezinwele zayo ezaseziqothukile zikuplastiki, igcwele udaka emhlane nasekhanda ngabuza ukuthi kwenzekeni kuzo ngoba sasiqeda ukuzincoma ngoba zingamadredi,” kusho uNks uNkopane.
Uthe yabachazela intombazana ukuthi zigqashuke ngesikhathi izama ukuphulukundlela idlwengulwa emuva kwalokho uthi wahamba washiya umndeni womgilwa ukuba uthathe isinqumo sokumangala.
“Bathe besesibhedlela ngathola ucingo kowayehamba nabo bethi kade belindile bacela ngibaphathele ukudla. Empeleni ngakuthenga futhi ngafike ngasiza nasezibhedlela endaweni yabadlwenguliwe iThuthukani,” usho kanje.
Uthe wabashiya lapho bahamba ngemoto yamaphoyisa kwayovulwa icala eyayizophinda iba hambise ezindaweni zabo. “Siqhubekile nokweseka omangele nasezinkantolo njengoba sisaqhubeka namanje futhi lokho kasikwenzi ngoba sibheke isikhundla sobukhansela, silwisana nokuhlukunyezwa kwabesifazane okuyinto edlangile kuleli,” usho kanje.
Uqhube wathi empeleni bafuna ikhansela lowesifazane osemncane kuWadi 14 lapho ikhansela elingumsolwa liphethe khona kodwa lona acabanga ukuthi bayamfunela kakuyena ngoba mdala ngeminyaka.
“Ikhansela alibhekane necala lalo ngoba liphinde lavuswa yinkantolo njengoba beselicishiwe kuthiwa kulindwe imiphumela kadokotela eveza ukuthi ngempela kwabakhona ukudlwengulwa yini. Siyazi ke ukuthi kasinayo iLaboratory lapha e-Eastern Cape siyacabanga ukuthi okwenza ihambe kancane ukuthi yathunyelwa eKapa kumbe ePitoli.”
Udalule ukuthi uyazi ukuthi akuyena yedwa umsolwa ocabanga kanjalo ukuthi uyena omele le ndaba bakhona nabanye abakhulumayo emakhoneni kodwa okuxakayo sebeke bafika beyomncenga ukuthi akhulume nomndeni kucishwe icala bethembisa izulu nomhlaba. “Kasazi ukuthi bancengani uma bazi ukuthi umsolwa umsulwa” usho kanje.
Uthe kakulona lodwa lolu daba ngamakhansela aseMatatiele ahlukumezayo, kusekuningi okuzayo futhi kuyalandelwa njengoba bekwenza kubantu basemakhaya abangawazi kahle amalungelo abo.
Uphinde waphendula ngezijumbana zokudla okusolwa ukuthi uzinika umndeni wesisulu wathi: “Yebo kuyiqiniso lokho ngoba ikhansela (umsolwa) livele lasixosha isisulu emsebenzini njengoba njengamavolontiya bebonelelwa ngemisebenzi yeEPWP ukuze bakwazi ukuziphilisa nakuba kukuncane abakutholayo.”
Uthe baye bangenelela ngenxa yokuthi kakukho muntu ozoxoshwa ngoba evule icala abe eseyahlukunyezwa. “Silwile ukuthi akabuyiselwe emsebenzini kwathi ngoba besekunezinyanga ezimbili engatholi iholo ngamcelela izijumbana kuMasipala ngaphinde nganezela isishebo ngemali yami, kangiboni kuyicala lokho ngoba vele sesibenzela abantu,” kuphetha uNksz uNkopane.
Unina kamgilwa uvumelana naye
Unina kamgilwa uNkk uMapuleng Thelejane uthe abakaze basikaze ukusula icala kangangoba babephatheke kabi kakhulu ngesikhathi licishwa yinkantolo becabanga ukuthi sekuthengenwe.
“Okungikhathaza kakhulu yimina engayincenga ingane yami ukuthi ihambe nekhansela ngesikhathi lifikile lizoyicela ngoba ngilethemba kanti ngiyikhululela ukuthi iyodlwengulwa. Sifuna umthetho udlale indawo yawo,” kusho uNkk uThelejane.
Amaphoyisa zinsolweni zokusetshenziswa
Yize uBhabha eveza ukuthi namaphoyisa abanengcindezi ngoba ilungu leSishayamthetho laxhumana noKhomishana wesifundazwe kodwa amaphoyisa esifundazweni athe awathandi ukuphawula ngezinkulumo ezenziwa uKhomishana namalungu omphakathi.
“Yingakho sinqume ukuthi singalungeni lolu daba,” kusho uCaptain uKhaya Tonjeni okhulumela amaphoyisa kulesi sifundazwe.
Nakuba inkulumo kaBhabha iphikiswa nhlangothi zonke kodwa limile ekutheni kunomshosha phansi wokungcolisa amagama abanye ngezigameko zocansi. Ukhulume wadalula nelinye icala eselachithwa yinkantolo oluthinta elinye iKhansela loMkhandlu waseMatatiele, uMnu uZolile Bono, nalo elake labhekana necala lokudlwengula.
“Le nto yami iyinto efanayo nekaMnu uBono njengoba nayo yagcina ichithiwe yinkantolo ngoba yayivele ibonakala ukuthi uzungu nje,” kusho uBhabha.
Ebuzwa ukuthi useke walwethula yini lolu daba enhlanganweni ukuthi bakhelwa uzungu uthe: “Ngenxa yokuthi udaba lusesenkantolo i-ANC iyalazi lonke iqiniso futhi iyazi ukuthi kwenzekani.”
Icala likaBhabha lizoqhubeka ngomhla lulunye kuya mhla zimbili kuMandulo nonyaka.