Lungamsiza osebhizinisini ucwaningo yize kukahle
Kunezikhathi empilweni yebhizinisi lapho kungabanikazi kuphela okumele benze izinqumo ngekusasa lebhizinisi. Iqiniso lithi, noma amabhizinisi angaba semkhakheni owodwa, izisekelo akhelwe phezu kwazo azifani ngokunjalo nezinsika ezimise lelo nalelo bhizinisi azifani. Kungakho kungelula ukuwabopha ngabhande linye amabhizinisi uzitshele ukuthi azovala kanyekanye noma ngabe abhekene nempi efanayo. Lokhu uzokubona uma ubheka zonke izinhlobo zamabhizinisi ezikhona ukuthi amanye equmbeka phansi kanti amanye ayatotoba ebheke ilanga lapho isimo siyophenduka khona sibe ngesihle. Kunzima nokho ukulinda ilanga ongalazi ukuthi liyofika nini njengoba kwenzeka emabhizinisini axhumene notshwala nalawa kagwayi.
Uma bewungakaze unake ukuthi ibhizinisi lakho lincike kangakanani kwamanye, ngiyethemba kucace bha ngalesi sikhathi sokhuvethe. Kwabanye abantu kulula nje ukuthi akuvalwe utshwala, akuvalwe lokhuya nalokhuya. Ngithanda sike sibuke ukuthi ibhizinisi okulo lincike kangakanani kwelakho sibheke umthelela wokuvalwa okunawo empilweni yelinye ibhizinisi.
Uma siqala sibuka izindawo ezidayisa utshwala, obuvaliwe kuyimanje, kusobala ukuthi emva kwezinyanga ezine amanye alawo mabhizinisi aseyolala angabe esavuka. Kunabantu okuyibhizinisi labo ukutholela amabhizinisi imvume yokudayisa utshwala. Njengoba kuvalwe izindawo zotshwala amukho umuntu odinga imvume yokudayisa. Lokhu kusho ukuma nse kwalelo bhizinisi elilekelela ukutholakala kwemvume. Lawo mabhizinisi aqashe abantu abenza lo msebenzi bahole inyanga nenyanga.
Kulezi zindawo okudayiselwa kuzo kugcinwe impahla ekhokhelwe izinkulungwane zamarandi ngethemba lokuthi le mali izophenduka ngesikhathi esifushane ikhokhe zonke izindleko, umnikazimpahla naye azondle aphilise nomndeni. Enye kule mpahla egciniwe iphelelwa yisikhathi ngoba kumele idayiswe ngaphambi kwesikhathi esithile, ngale kwalokho seyiyingozi kulowo ozokuyithenga seyidlulelwe yisikhathi.
Imvamisa yosomabhizinisi baqashile ezindaweni abadayisela kuzo. Njalo ngenyanga akubuzwa ukuthi kudayisiwe noma akudayiswanga kumele umnikazi webhizinisi akhokhe intela. Abanikazi bezindlu okudayiselwa kuzo bakhokha imali yokuqasha inyanga nenyanga, okungesiyo imali encane. Le mali ikhokhwa ngokudayiswa komkhiqizo. Uma kungadayiswa le ndawo igcine izindodla zempahla ekhokhelwayo nyanga zonke ibe ingangenisi mali. Njengoba sekuphele izinyanga ezine kwavalwa ukudayisa kuchaza ukuthi imali ayingeni kodwa indawo yokusebenzela kumele ikhokhelwe.
Nakulo leli bhizinisi elithinta utshwala kunochungechunge lweketango okungamele linqamuke. Ukunqamuka kweketango ndawana thize kusho ukufadalala kochungechunge lwamabhizinisi akulelo ketango. Isibonelo salokhu sizobheka ubhiya, lona othandwa kakhulu. Ubhiya wakhiwa ngommbila, okuwumkhiqizo ovela emasimini. Uma kungasaqhubeki ukudayiswa kotshwala kusho ukuthi abalimi bamile, bahlezi nomkhiqizo obekumele ukuba ngabe sewungenise imali. Ukuhlala kwesivuno kungenzeka sidlulelwe yisikhathi, sonakale kube wukulahlekelwa kwabalimi kulo nyaka.
Izimboni ezikhiqiza utshwala zime nse njengoba kungadayiswa. Ngenkathi uHulumeni enza isinqumo sokuvala ukudayiswa kotshwala akanikezanga ithuba ukuthi kungavutshelwa tshwala ezimbonini. Uma wehluleka ukubuka ngeso elibanzi le mboni, ungabheka umuntu othenge imithombo nezinye izithako ukuze avubele utshwala bomcimbi. Uma esezihlanganisile izithako usuke azi ukuthi lobo tshwala buyobe sebuphuzwe baphela emva kwesikhathi esingakanani. Uma kuhlehliswa umcimbi obuningi balobo tshwala sekumele buchithwe. Ebhizinisini-ke kunzima ngoba kusuke kunabantu abalindele ukuhola emva kokusebenza.
Amakhulu ngamakhulu ezisebenzi kumele zihole noma kungasetshenzwanga. Lokhu kusho ukuthi baningi abaphelelwa wumsebenzi ngenxa yalesi simo izwe elidlula kuso. Imboni yotshwala siyisebenzisa njengesibonelo. Nezinye izimboni ezivaliwe zikhahlamezeke ngendlela efanayo nalena yotshwala. Kukhahlamezeke wonke amabhizinisi asochungechungeni lwalelo ketango.
Uma kukhulunywa ngemboni yophuzo oludakayo abantu bavula izindlebe ngethemba lokuthi mhlawumbe kumayelana nokuvulwa kokudayiswa kotshwala. Ukhuvethe luyenzile indaba ngokuba kuvalwe le mboni. Ababhema ugwayi bayabonakala abambalwa bephafuza kuphuma intuthu uzibuze wedwa ukuthi ingabe bawuthathephi ngoba phela wavalwa ngoNdasa. Abaphethe utshwala ababonwa nangokhalo, okungenzeka bufihlwe ezikhwameni buphuzelwe emakhaya.
Kuyo le mboni kunabanikazi bamaloli athutha utshwala buyiswa ezindaweni ezisakazeke kulo lonke izwe ezidayisa ngezindlela nezimvume ezehlukene. Amanye alawo maloli akanawo omunye umsebenzi kanti asengaphansi kohlelo lwesikweletu. Abanikazi balawo maloli bebengalindelanga ukuthi imboni abangene kuyo iyovala ngaphandle kokubanika ithuba lokuzihlela kahle.
Izindawo ezingamathaveni zilele ulwembu ngoba umgogodla wokuphila kwawo wukudayisa utshwala. Abantu abasebenza kulezi zindawo bahlezi emakhaya kanti abanye sebetsheliwe ukuthi sewuphelile umsebenzi.
Kuyaphoqa ukuba noma ngabe ukuliphi ibhizinisi ubhekisise ukuthi ungalizinzisa kanjani, lisabalale ngendlela ethile ezokwenza kuthi noma kuvalwa umgudu osebenzelana nebhizinisi lakho kungabe sekuma konke. Ukhuvethe luphoqa zonke izimboni ukuba zibuke izindlela ezintsha zokwenza ibhizinisi ngaphansi kokhuvethe nangale kwalo. Kubalulekile ukuzinika isikhathi sokwenza ucwaningo ngebhizinisi okulo, ubheke nezindlela ezahlukile ongaqhuba ngazo ibhizinisi.
Ucwaningo lungamenza usomabhizinisi ahluke kwabanye avelele, noma ngabe basembonini efanayo. Asikho isikhathi sokuphumula uma usebhizinisini.