Bahlaba isiphakamiso ngokhetho lwase-USA
UMengameli wase-United States of America (USA) uMnu uDonald Trump ngesonto eledlule wenze obekulindelwe ngabaningi abangamnambithisisi kahle ngesikhathi edlalisa umqondo wokuthi kuhlehliswe ukhetho lobumengameli kuleliya lizwe lwalo nyaka kodwa lo mbono wakhe uthole imbibizane eqenjini iDemocrats kanye neqembu lakhe iRepublicans.
Abagxeki kanye nabahlobo bakhe uTrump bawuchitha lo mbono njengomzamo wokugqiba izindaba ezingezinhle mayelana nomnotho waleliya lizwe kepha ongoti bezomthetho baxwayisa ngokuthi ukuphawula kwakhe kungagcina kwenza abalandeli bakhe bangayethembi inqubo yokhetho.
Isitatimende sikaTrump enkundleni yokuxhumana uTwitter siqhamuke ngesikhathi leliya lizwe libhekene nenkinga enkulu esizukulwaneni sayo okuwukhuvethe oseludlule nemiphefumulo eyizi-50 000, ukuwohloka komnotho okwakubangelwe ukuqubuka kwemibhikisho ezweni lonke eyayilwa nodlame kanye nokucwasana kwamaphoyisa.
Ocwaningweni olwenziwe kuvela ukuthi uTrump ungemuva kwaloyo aphikisana naye oseqenjini iDemocrats nowayenguSekela Mengameli waleliya lizwe uMnu uJoe Biden. UMengameli uTrump uthe angeke ayethembe imiphumela yokuvota nge-imeyli, okuyithuluzi abaningi abalibuka njengelibalulekile ngenxa yokhuvethe. Ngaphandle kobufakazi obuphelele uMengameli wathi ukuvota ngale ndlela kwakuzogcwala ukukhwabanisa.
“Ngokuvota nge-imeyli unyaka wezi-2020 kuzoba ukhetho olukhulu oluzoveza imiphumela engalona iqiniso futhi ekhwabanisiwe emlandweni. Lolu hlelo luzolethela i-USA amakhulu amahloni, alubanjezelwe ukhetho baze abantu bakwazi ukuvota kahle ngendlela ephephile,” kubeka uMengameli uTrump.
Umlando ukubeka ngokucacile ukuthi leliya zwe selibambe ukhetho iminyaka engaphezu kwama-200 ngisho nangesikhathi sempi yezakhamuzi, sokuzika komnotho kanye nezimpi zomhlaba ezimbili.
Abangamalungu eRepublicans uMnu uMitch McConnell noMnu uKevin
McCarthy bawuchithile lo mbono lapho uMcCarthy ethe: “Emlandweni wokhetho asikaze sibe nokhetho esingalubambi futhi kufanele siqhubeke ngalo nalolu khetho,” kuphetha uMcCarthy.
Oyilungu leDemocrats uNkk uZoe Lofgren naye uphinde wakuchitha ukubanjezelwa kokhetho wathi: “Thina ngaphansi kwanoma yisiphi isimo angeke sivume ukwenza lokhu ukuze kwamukeleke izimpendulo ezingenamqondo zikaMengameli zokuqondana nokhuvethe futhi angeke sinikeze isigqi ebufakazini bamanga akusabalalisayo.”
Isitatimende sikaMengameli kuTwitter sizokwandisa ukwesaba kwabaseki namalungu eqembu iDemocrats ukuthi uzozama ukuphazamisa ukhetho noma anqabe ukuvuma umphumela walo.