Inhlokodolobha ivalwe thaqa yimibhikisho eZimbabwe
Iphupho elihambisana nezinkulumo kuleliya lizwe zazithi ukususwa kwaloyo owayenguMengameli phambilini uMnu uRobert Mugabe kwakuzoba ikhambi elibalulekile ekulweni nenkohlakalo kanye nobubha eZimbabwe kodwa ngemuva kweminyaka emithathu ehla esihlalweni ngempoqo leliya lizwe namanje lisasobishini.
Ukuhlehla kukaMengameli uMugabe esihlalweni kwamukelwa ngenjabulo emazweni amaningi asentshonalanga futhi awujabulela uHulumeni kaloyo owathatha emuva kwkahe kodwa kungenzeka ukuba ukushintsha kompheki akuguqulanga okuphekelwa izakhamuzi zaseZimbabwe.
Ngesonto eledlule ngoLwesihlanu wonke amabhizinisi enhlokodolobha yaleliya lizwe iHarare abevaliwe imigwaqo isele dengwane ngemuva kokuba abezomthetho benyuse izinga labo lokuzungeza imigwaqo behlola isimo ngenhloso yokuzama ukumisa imibhikisho ebiqondiswe kuHulumeni ebihlelwe yizishoshovu ebezikhala ngenkohlakalo kanye nokusokola kwezomnotho.
UMengameli waseZimbabwe uMnu u-Emmerson Mnangangwa ongaphansi kwengcindezi yokuvuselela umnotho ovele ushayekile, uqhubekile nokuthi le mibhikisho “iwukuvukela umbuso” kwamaqembu aphikisayo,
Phakathi enhlokodolobha kanye naselokishini iMbare emuva kokuqubuka kwale mibhikisho kwaphoqeleka ukuba amabhizinisi, amabhange nezitolo ezinkulu kuvalwe njengoba amaphoyisa namasosha abeseqale ukuzungeza imigwaqo. Ongunogada ogama lakhe kunguMartin uthe: “Izisebenzi zitsheliwe ukuthi zingezi emsebenzini namhlanje ngenxa yokusola ukuthi kungenzeka kube nenkinga.”
Abezomthetho bandise izindawo zokuhlola kuyona yonke imigwaqo engena edolobheni iHarare. Kuphinde kwavela nemibiko ethi nasedolobheni elingelesibili ukuba likhulu kuleliya lizwe iBulawayo nakhona amabhizinisi abevaliwe. Lapho okwakunemibhikisho khona ngonyaka wezi-2019 kuzokhumbuleka ukuthi izibalo zabantu abashona laliphezulu.
Le nkinga kwezomnotho waseZimbabwe ebukwa njengenkulu kakhulu esikhathini esingaphezu kweshumi leminyaka, iqukethe ukwanda kwenani lokuthenga izinto kodwa amandla emali ehla ngamaphesenti angama-700, izibhedlela zomphakathi ezithikamezeka ngenxa yeziteleka kanye nokuntuleka kwemithi.
Abagxeki bakaMengameli uMnangangwa bathi usebenzisa umthetho wemvalelekhaya ukuba avimbe labo abaphikisana naye.