Zibalulekile izichibiyelo zomthetho wezobulungiswa
Umthethosivivinywa woMthetho Wezobulungiswa Kwezokuqashwa uNombolo 55 we-1998 usezithebeni zeSishayamthetho emveni kokuphasiswa yiSigungu SikaHulmeni ngoNhlolanja kophezulu. Zibalulekile izinguquko eziza nalo mthetho, okuyikhona okwenze ukuba kesiwubhekisise embhalweni wanamuhla.
Okokuqala, kulesi sichibiyelo umthetho uphoqa abaqashi ukuqeqesha izisebenzi zabo ukuthuthukisa amakhono. Lokhu, umthetho ukwenza ngokulawula izibalo zezisebenzi ezazibandlululiwe ngezikhathi zobandlululo noma lezo zisebenzi eziqagulwe ngumthetho okufanele zenzelelwe zinikwe amathuba emisebenzi.
ESigabeni 15A esisha, isichibiyelo somthetho sinikeza amandla kuNgqongqoshe ukuba eqagule izimboni, kuzwelonke azibekele amanani ayimpoqo, ezisebenzi okufanele kube yilezo ezazibandlululiwe noma ngeziqagulwe umthetho ukuba zenzelelwe. Lokho kuzophoqa ukuba abaqashi bengacashi ngokusweleka kwamakhono ezisebenzini zaboHlanga; zabesifazane; nalabo abakhubazekile; kodwa bethathe izinyathelo zokubaqeqesha ukuze kutholakale leso sibalo semboni esibekwe ngoNgqongqoshe. Phela kuwukwephula umthetho ukuqasha abezinye izinhlanga ezikhundlenii okubalulwe ukuba kuqashwe laba abaqaguliwe.
Okwesibili, umthetho uqinisa isibopho sokujezisa abaqashi abephula ubulungiswa ngokubancisha amathuba amathenda kaHulumeni uma bengenazo izitifiketi ezifakazela ukuthi kabazona izephulamthetho.
ESigabeni 53(6) esisha umthetho ulawula ukuthi uNgqongqoshe uyokhipha lesi sitifiketi kuphela uma enelisekile ukuthi umqashi uqashe izibalo zezisebenzi eziqaguliwe eziyizibalo ezifunwa ngumthetho njengoba sichazile ngenhla. Noma uma umqashi enikeze izizathu ezamukelekile ukuthi uhlulwe yini ukwanelisa lezo zibalo zezisebenzi.
Nokuthi umqashi akanachashaza lesigwebo seNkantolo noma sakwaCCMA sokuthi wake wephula umthetho wobulungiswa ngokubandlulula wahlawuliswa, noma sokuthi wake wehluleka ukukhokha amaholo anqunywe uMthetho Womholo Oyisisekelo Kazwelonke. Umqashi ongenaso lesi sitifiketi akanalungelo lokufaka isicelo sethenda kaHulumeni.
Okwesithathu umthetho uqinisa uhlelo lokwenzelela labo ababebandlululiwe ngezikhathi zobandlululo noma labo basebenzi abaqagulwe ngumthetho okufanele benzelelwe benikwe amathuba emisebenzi.
Masikhumbuzane ukuthi umthetho uchaza ukuthi abasebenzi abaqaguliwe okumele benzelelwe benikwe amathuba ngabayizakhamuzi zaseNingizimu Afrika aboHlanga; abesifazane; nalabo abakhubazekile.
Umthethosivivinyo unikeza uNgqongqoshe amandla okuqagula izimboni kuzwelonke, azinqumele izibalo zazisebenzi kuwona wonke amazinga, okumele kube ngezalezo ezazibandlululiwe noma lezo eziqaguliwe njengazazihlukunyeziwe.
Masikhumbuzane futhi ukuthi umthetho uphoqa bonke abaqashi abaqaguliwe ukuba bethathe izinyathelo zokwenza ubulungiswa emsebenzini ngohlelo lokwenzelela labo ababebandlululiwe ngezikhathi zobandlululo noma lezo zisebenzi eziqagulwe ngumthetho.
Abaqashi abaqaguliwe yilabo abaqashe izisebenzi ezingaphezulu kwamashumi amahlanu sezizonke noma labo abaqashe ezingaphansi kwamashumi amahlanu kodwa amabhizinisi abo engenisa ngonyaka imali engaphezulu kwaleyo enqunyiwe ngokwezimboni ezahlukene eqala emalini eyizigidi eziyisi-R6.
Umqashi uphoqekile ukwakha uhlelo lokwenzelela labo abaqagulwe umthetho. Inhloso yohlelo ukuvumelana ngezinyathelo zokuqeda ubandlululo nemigoqo evimbela intuthuko emsebenzini yezisebenzi eziqaguliwe.
Umthethosivivinywa ulawula ukuthi izibalo zazisebenzi ngokwamazinga nangokwemisebenzi yazo, kufanele kuhambisane nezibalo lezo ezibekwe nguNgqongqoshe njengoba sichazile ngenhla. Ngokwesichbiyelo, sekuwumsebenzi weKhomishana yemiholo esungulwe nelawulwa wuMthetho Womholo Oyisisekelo Kazwelonke, ukuqapha ukusebenza koMthetho Wezobulungiswa. Kanjalo nemibiko yaminyaka yonke yabaqashi mayelana nezinyathelo zokuqeda ubandlululo nayo isithunyelwa kuyo le Khomishana.
Abahloli bezemisebenzi sebenikwe amandla okukhipha incwadi elawula umqashi ukuba makenze uhlelo lokuqeda ubandlululo njengoba sichazile ngenhla. Kunemibandela emine enqala ebekelwe bonke abaqashi abaqaguliwe ukuba mabayihloniphe benze okufunwa ngumthetho.
Okokuqala ukuthi mabaxoxisane nezisebenzi nezinyunyana zazo mayelana nocwaningo lobulungiswa emsebenzini, nokwakha uhlelo lokwenzelela kanye nokwenza imibiko efuneka minyaka yonke edingwa nguMnyango Wezabasebenzi mayelana nohlelo lokwenzelela.
Okwesibili ukwenza ucwaningo lokuqagula ubandlululo nemigoqo evimbela ubulungiswa nokuthuthuka emsebenzini kwezisebenzi eziqaguliwe. Okwesithathu ukwakha ngokubambisana nezisebenzi nezinyunyana uhlelo njengoba sichazile ngenhla, lokwenzelela abasebenzi abaqaguliwe.
Okwesine ukubhala imibiko yaminyaka yonke ebhekiswe kuKhomishana Yemiholo, echaza ngenqubekela phambili minyaka yonke ohlelweni lwesenzelelo sezobulungiswa ezisebenzini eziqaguliwe.
Ngokuxoxisana nezisebenzi nezinyunyana umqashi kumele makenze uhlelo lokwenzelela. Inhloso yohlelo ngukuvumelana ngezinyathelo zokuqeda ubandlululo nemigoqo evimbela intuthuko emsebenzini yezisebenzi eziqaguliwe.
Le migoqo nobandlululo kungaba semaholweni angalingani ngokungenabulungiswa, emibandeleni yokuqashwa engalingani nakuyo yonke inqubo yezokuqashwa ebambezela futhi ithunaze izisebenzi eziaguliwe. Enye inhloso yohlelo ukuhlela kabusha umsebenzi ukuze kuphathwe bonke izisebenzi ngokulingana nangenhlonipho yesithunzi soluntu kuzona zonke izisebenzi.
Futhi inhloso yohlelo ukuqinisekisa ukuthi kuyo yonke imisebenzi nezigaba ezahlukene zemisebenzi zonke izisebenzi eziqaguliwe (aboHlanga, abesifazane nabanokukhubazeka) nabo bamelelekile kusukela koqashelwe ukuthanyela kuye kochwepheshe nezimenenja nabaqondisi benkampani imbala. Lesi sichibiyelo somthetho siqonde ukuqinisekisa ukuqeda ubandlululo nokumeleleka kwabasebenzi abaqaguliwe kuyona yonke imisebenzi emazingeni ahlukene nasemakhonweni anhlobonhlobo.