Inkampani yabangcwabi ilule isandla emphakathini
Kuyiqiniso ukuthi amabhizinisi namakhasimende yizinto ezingeke zahlukaniswa ngoba kuyadingana.
Amakhasimende anesandla esikhulu ekukhuleni kwebhizinisi kodwa ngalokhu abathengi basuke bengabenzeli abamabhizinisi umusa ngokubeseka kepha nabo bayahlomula ngoba abakuthenga kulezi zindawo yilokho abasuke bekudinga.
Amabhizinisi anendlela yokukhombisa kumakhasimende noma emphakathini ukubonga kwawo ngokwesekwa ngokuthi kubekhona okuthile akunikelela abantu okuzobasiza okungaba imali, impahla, imifundaze, ukwelekelela ngezikhathi zezinhlekelele nokunye. Lokhu kwenzeka ngaphansi kohlelo olubizwa ngokuthi iCorporate Social Responsibility (CSR).
Ngaphandle kokuthi lokhu kusuke kuyindlela yamabhizinisi yokuveza ukubonga kwawo kepha nawo ayahlomula ngoba lokhu kuphinde kusebenze njengendlela yokuzimaketha.
Abathengi babona ukuthi benza kahle uma besebenzisa imikhiqizo yezinkampani ezibuyiselayo emphakathini.
Uma inkampani noma ibhizinisi lifaka kakhulu isandla emphakathini lithola ukwesekwa okukhulu yilowo mphakathi nabathengi.
Ukubuyisela emphakathini kuphinde kwakhe ukwethembana, ukuqwashisa nokugqugquzela uguquko emphakathini
Nakuba ziningi izinkampani ezenza lokhu kodwa okwenziwa ngezinkulu emhlabeni kuba nemiphumela emikhulu ebonakalayo ezintweni eziyisidingo esihamba phambili njengendlala, isimo sezulu nokunye okuningi.
Njengoba elakuleli ngenyanga edlule beligubha impilo kaMandela owaba nguMengameli wokuqala wedemokhrasi eNingizimu Afrika, kujabulisile ukubona inkampani yabangcwabi i-AVBOB ijoyina umkhankaso wokulwa nodlame olubhekiswe kwabesifazane nezingane. Lokhu ikwenza nje, elakuleli lihlaselwe yisihlava kanti baningi abesifazane asebebulewe kulo nyaka.
Ngendlela udlame olubhekiswe kwabesifazane oludlange ngayo, ngesonto lokuqala lemvalelwakhaya kwabikwa amacala okuhlukunyezwa kwabesifazane angaphezu kwezi-87 000.
Le nkampani-ke ikubone kukuhle ukuba inikelele izinhlangano eziyisi-7 ezingenzi inzuzo kuleli ukuze kuqhutshwe umkhankaso wokuqwashisa ngodlame olubhekiswe kwabesifazane ezowethula ezinsukwini ezimbalwa ezizayo. I-AVBOB ikhiphe umnikelo wezi-R210 000.
Izinhlangano ezihlomulile kulolu xhaso i-Aldabri 99 yasoThongathi ethuthukisa abesifazane ngamakhono nangamaphrojekthi. Lo mnikelo uzosetshenziswa ukuxhasa izinhlelo zokwelulekwa ngokomphefumulo, ngokomthetho nangokwelashwa kwabagilwa bodlame olubhekiswe kwabesifazane. I-Arebueng Community Support yaseRandfontein nayo egxile ekulweni nokuhlukunyezwa kwabesifazane. Lolu xhaso luzosetshenziswa ukuthenga izijumbana zokudla okuzonikwa abesifazane nezingane abahlukumezekile.
I-Empower yaseWorcester eWestern Cape egxile ekuthuthukisweni kobuholi emphakathini, ukuthuthukiswa kwentsha nokwakhiwa kwemisebenzi emalokishini. Imali eyitholile izoyisebenzisa ukuthwala izindleko zendawo yabo yokugcina abagilwa, ukuqoqa izinto zokuhlanza nohlelo lokuthola i-airtime ezosetshenziswa amavolontiya aluleka abagilwa ngocingo.
Ezinye izinhlangano ezihlomulile iHelping
Those in Need (East London), iLetoya Makhene Foundation yaseTladi eSoweto, iVision of Love yaseThabazimbi eLimpopo neKgoro Ya Thuto yaseWaverly eBloemfontein.
ISikhulu Esiphezulu sakwa-AVBOB uMnu uCarl van der Riet sithi: “Abadala nezingane bavaleleke emakhaya nabalingani nabazali abahlukumezayo futhi njengoba kunengcindezi ngakwezezimali ngenxa yokungasebenzi kwabantu isimo siya siba sibi kakhulu. Kukuthina sonke ukuba sisukume sisize ukuqeda lesi sihlava sodlame olubhekiswe kwabangavikelekile emphakathini wethu.”
Uthi inhloso yabo enkulu akusikho kuphela ukuqwashisa kodwa ukwenza okuthile ngalesi simo.
Njengoba sishilo ngenhla ukuthi ziningi izinkampani noma amabhizinisi abuyiselayo emphakathini futhi siyazi ukuthi lena esiyibalulile akuyona eyokuqala neyokugcina kodwa kuhle ukuthi uhlelo lweCSR lulandelelwe futhi kuqinisikiswe ukuthi amabhizinisi ayaluhlonipha. Ngesikhathi kuqala imvalelwakhaya kuvele imibiko eminingi engemihle ngezitolo ebezenyusa amanani ezimpahla ezizidayisayo lokhu zikwenza ngoba zazi ukuthi besiphezulu isidingo saleyo mikhiqizo ngaleso sikhathi. Nokuthi bekwaziwa ukuthi akuzona zonke izitolo ebezivuliwe ngaleso sikhathi ngakho-ke abantu bebephoqeleka ukuthi bathenge kulezo ebezivuliwe.
Okuqaphelekayo ukuthi ezinye zalezi zitolo esingeke siwadalule amagama azo akukho lapho okuke kwabonakala noma kwezwakala zinikela emiphakathini nakuba zinamakhasimende amaningi. Kodwa zibe naso isibindi sokusebenzisa lesi sikhathi esinzima ezweni ukuzihlomulisa zona.
Nokho uhlelo iCSR akufanele ukuba uHulumeni acashe ngalo uma ebalekela ukuhlinzeka izakhamuzi ngezidingo ngoba nawo unesibophezelo ngokoMthethosisekelo wezwe ukubhekela inhlakahle yabantu.