KWEZINYE IZINGXENYE
EzaseLibya: IRussia yandise ukwesekwa kwayo inkampani yezezimpi ezimele iWagner Group kuleli lizwe ngezindiza ezithile zempi ezingama-338 ezisuka eSyria ezinyangeni eziyisishagalolunye kuya enyangeni kaNtulikazi ukusiza abalwi beWagner esekela umkhuzi wempi wakuleli lizwe ozinze empumalanga uMnu uKhalifa Haftar.
EzaseLibya: Inhloko kaHulumeni owamukelwe emhlabeni jikelele waleli lizwe imise uNgqongqoshe Wezangaphakathi onamandla esikhundleni sakhe ngesonto eledlule, lapho ethe ukuphatha kwakhe imibhikisho kanye nodlame obeludlangile ngesikhathi kuzanywa ukulwisana nale mibhikisho. EzaseNingizimu Afrika: Leli lizwe ngomlomo kaNgqongqoshe Wezangaphandle selibike ukuthi likulungele ukusiza iMozambique enezinkinga zokwanda kokuvukelwa kombuso, ngezinsiza zezobunhloli noma ezempi. Kodwa leli lizwe eliwumakhelwano kufanele kuqala kube yilo elilucelayo lolo sizo.
EzaseSudan: UHulumeni owabelana amandla wakuleli lizwe usayine isivumelwano sokuthula namaqembu abalwi kuleli sonto okube yisinyathelo esihle ekuzameni ukuxazulula izingxabano ezijulile ezaqala embusweni omdala waleli zwe owawuholwa nguMnu u-Omar alBashir.
EzaseKenya: UMengameli wakuleli lizwe uMnu u-Uhuru Kenyatta useyale ukuba kube nophenyo mayelana nezinsolo zokwebiwa kwemali eyayibekelwe ukuhlinzekela impi eyayibhekiswe kukhuvethe.
EzaseTanzania: Ibhodi lezokhetho laleli lizwe seliveze ukuthi okhethweni oluzayo uMengameli uJohn Magufuli uzobhekana nabaphikisi abali-14 okhethweni oluhlelelwe inyanga kaMfumfu. Abahlaziyi kuleli zwe bona bathi ukuphikisana kanye nokuhlukana kwamaqembu aphikisayo kuzochaza ukuthi uMengameli unethuba elikhulu lokunqoba ihlandla lesibili okhethweni.
EzaseMali: Izingxoxo phakathi kwabalamuli baseNtshonalanga Afrika kanye nabaholi bezombutho kuleli zwe ziphele ngemuva kwezinsuku ezintathu lapho isinqumo ngokwakhiwa kukaHulumeni wesikhashana noma wenguquko singathathwanga.