Ufuna ukugweva nesihlalo owaseGuinea
UMengameli waseGuinea uMnu u-Alpha Conde ngoMsombuluko, ngokusho kweqembu lakhe, ukwamukelile ukuphakanyiswa angenele ukhetho lwangoMfumfu lisebenzisa uMthethosisekelo omusha ukufuna ukuba ahole leli zwe ihlandla lesithathu, abaphikisi bakhe neqembu lakhe abathi akuhambisani noMthethosisekelo wezwe.
UConde, owakhethwa okokuqala ngowezi-2010, waphokophela ekushintsheni uMthethosisekelo owavunywa yinhlolovo ngoNdasa eyadutshwa ngamaqembu aphikisayo. Kuzokhumbuleka ukuthi izinkulumo ngehlandla lesithathu zaqubula imibhikisho eyasabalala izwe lonke kwagcina sekubulawe abantu abangama-30 ngonyaka odlule.
Abaseki bakaConde bathi ushintsho loMthethosisekelo lusebenza njengenkinobho yokusetha kabusha umkhawulo wamahlandla amabili ayebekwe yiwo.
Iqembu elibusayo iRally of the Guinean People (RPG) ekuqaleni kwenyanga uNcwaba likhethe uConde ukuba alimele okhethweni lwangoMfumfu kodwa ngaleso sikhathi uConde wathi wakuqaphela ukukhethwa kwakhe kepha wangakuvuma noma wangakwamukela ngokusemthethweni.
Iqembu elibusayo kanye nemifelandawonye yalo esitatimendeni abasikhipha kuthelevishini bathi: “Sinenjabulo enkulu yokwazisa abantu baseGuinea ukuthi uMnu uConde usesamukelile isicelo sethu. UMengameli uConde uyena ozosihola okhethweni oluzayo.”
UConde usebe umholi ophikisayo isikhathi eside ngakho ukukhethwa kwakhe kwakhuphula amathemba entuthuko eya phambili kuleli lizwe. Imizamo yakhe yokuhlala emandleni isilethe ukukhathazeka kuleli lizwe ngenxa yokwesaba ukuthi lizofana namanye amazwe ase-Afrika abaholi bawo abanqaba ukwehla ezikhundleni isikhathi eside ngemuva kokuphela kwegunya labo kuzo izikhundla.
Kuzokhumbuleka ukuthi leli lizwe liwumkhiqizi omkhulu we-Alluminium Ore, iBauxite futhi linezinqolobane ezibalulekile zensimbi, kufaka phakathi indawo enkulu yaseSimandou, idiphozi enkulu kunazo zonke ezaziwayo zohlobo lwayo enamathani angaphezu kwezigidi eziyizinkulungwane ezimbili ze-Ore esezingeni eliphezulu.