Kwehlukana imibono kolukaNkk uMakhosi Khoza
Mhleli
Into engafuneki ukuthi ushade neqembu lezepolitiki ngoba uthando lwalo lwenza ungabe usabona noma selibheda. Umsebenzi wamaqembu ukuhambisa izinsiza emphakathini uma engasakwenzi lokho kufanele siwakhiphe okanye siye kwamanye. Lokho kuyilungelo lomuntu ongumvoti. Asingabi nesivumelwano sikasofa silahlane namaqembu epolitiki ngoba sizogcina sihlalela ukuhlukumezeka kuwo. UMakhosi Khoza wenze into encomekayo uma ejoyina uMashaba.
- nguMex X Thabethe Mhleli
Angikezwa lutho ngenkohlakalo abandakanyeka kuyo kule minyaka aseyibambile kupolitiki. Ukubekezelela umbhedo wenkohlakalo sekusenze sabazonda abakhuluma iqiniso futhi belwa nokungcola. Izigilamkhuba zepolitiki, zikhuluma amaqiniso esiwadingayo ngomlando. Uma seziqedile zintshontshe yonke imali yentuthuko.
Okwami ukumfisela inhlanhla, umuntu ohlakaniphile uyabunyanya ububi, ukuntshontshela abantu bakini kubi ukudlula ububi bamaBhunu. Ayesinyanya futhi engafihli, abakithi bona, bayasithanda yini, uma bentshontshela ngisho izintandane nabafelokazi?
- nguPatrick Lucky Ngcobo Mhleli
Amandla aboHlanga ayavithika, i-ANC isenzele phansi siyithanda. Umbuzo-ke uthi le nqwaba yamaqembu akhiwayo ayosenzela yini umehluko? Impendulo ithi: Cha! Isibonelo, ngicabanga ukuthi uHolomisa abanye babaholi abanomgogodla nohlakaniphile, umbuzo uthi angakanani amathuba abe nawo? Iqiniso mancane, abelungu bathi uma ungeke ubahlule bajoyine. Kumele engabe sonke siwuquqaba ngoba sesinayo indlela ehlukile yokucabanga, sikwenza ngaphansi kophahla lwe-ANC njengoZuma owalwa engaphakathi. UMashaba akukho angasenzela khona, mhlawumbe ngingamupha ivoti kuHulumeni Wendawo nakhona ngizobuka amathuba akhe noma engeke aphathe. Omunye engingamupha u-Andile Mngxitama ngiyawuthanda umcabango wakhe abanye anginaso isikhathi sokuchithwa yibo.
- nguDan Ntinga Mhleli
Abanye abantu bafana namaphepha wona ahlale elindele ukupheshulwa umoya bahlale belindele ukujoyina wonke amaqembu ezepolitiki asungulwayo. UMaimane uzobe esungula elakhe naye uzobona sebemlandela.
- ngu-Eric Dube Mhleli
UMashaba useqalile uyamosha ngokuletha laba bantu abaxoshwa kwamanye amaqembu usezofana neCope kanti bengicabanga ukumnika ivoti lami ebesenginqume ukuligodla.
- nguRaymond Grootboom Mhleli
Kona vele kumele sithole okusha manje sikhathele umfudumezo wosopolitiki, laba abaphethe iqembu elibusayo becashe ngegama elithi ANC, abaphume bonke ngoba bayafana bayizinswelaboya kusuka ekhanda kuze kuyofika emsileni (thina bavoti).