Akhonjwe kuZibandlela akaNxamalala nokaKaMajola
Leli sonto eligoqwayo lithele ngehlazo iNational Prosecution Authority (NPA) ngemuva kokuthi amacala abhekwe ngabovu okungelalowo owayenguMengameli wezwe, uMnu uJacob Zuma nowayeyiMeya yeTheku, uNkk uZandile kaMajola Gumede, ehlehlisiwe ngoba lolu hlaka lungakulungele ukubhekana nalaba baholi enkantolo.
Izolo iNkantolo Yemantshi yaseThekwini inqume ukuba ilihlehlisele uZibandlela zili-10 kowezi-2020 icala le nkohlakalo elibhekene noZandile Gumede kanye nasolwa nabo abali-16 enkohlakalweni yezigidi ezibalelwa kwezingama-R400.
Izolo uMbuso ucele ukuba leli cala lihlehliswe ngoba kusamele kuphothulwe uphenyo olubucayi oluyosiza ekutheni ibenecala eliqinile ngoKaMajola.
Lesi sinqumo sinikeze uKaMajola nabeseki bakhe ithuba lokugadla kuNPA beyisola ngokuthi ukuboshwa kwakhe kwakungafanele kwenzeke ekubeni uphenyo lungakaphothulwa.
UMshushisi u-Ashika Lucken uthe umbiko wophenyo olubucayi waseThekwini ukhomba ukuthi kukhona okungazange kuhambe kahle noma okuyizenzo zokungaphathi kahle okwenzeka ngesikhathi uKaMajola eseyiMeya eThekwini.
Kuleli cala uMbuso uhlela ukuba uzenzele wona uphenyo lwawo kulezi zinyanga ezintathu.
Ngakolunye uhlangothi uNxamalala naye elakhe icala le nkohlakalo yokuthengwa kwezikhali lihlehliselwe umhla ziyisi-8 kuZibandlela nonyaka.
Kuleli cala likaNxamalala iNPA ibeke isizathu sokuthi yenzela ukuba nesikhathi esanele ukubhekana naye enkantolo.
UNatasha Kara weNPA KwaZulu-Natal uthe kube isinqumo lesi abasithathe ngokuvumelana nazo zonke izinhlangothi.
Phakathi wezinye izizathu kube wukuthi inkampani yaseFrance nayo ethintekayo kuleli cala okuyiThales ibinemibandela ebithinta ukuphuma nokungena emazweni njengoba kusenemithetho yokhuvethe esavimba ukuphuma nokungena ezweni.
Lesi sinqumo sidale ukuba iJacob Zuma Foundation ikhiphe isitatimende ebigadla kuso lapho ithe kubukeka sengathi iNPA ayazi ukuthi ifuna ukwenzani ngoba ekuqaleni yiyo ebihlale isola uNxamalala ngokuthi udonsa izinyawo ngamabomu ukuze kuhlehle icala.
“Sekukaningi abezindaba neNPA besola uZuma ngokuthi wenza konke okusemandleni ukubambezela leli cala kodwa namhlanje yiyo iNPA esiqhamuka nezizathu ezingazwakali zokubambezela leli cala.”