KWEZINYE IZINGXENYE
EzaseSaudi Arabia:
Inkantolo yaleli zwe isigwebe abantu abayisishiyagalombili phakathi kweminyaka eyisikhombisa nengamashumi amabili kuleli sonto ngecala lokubulawa kwaloyo owayeyintatheli uMnu uJamal Khashoggi ngonyaka wezi-2018. Lokhu kwenzeke emuva kwezinyanga ezine umndeni kaKhashoggi waxolela labo abambulala okwaphoqa ukuba isigwebo sentambo sibekwe eceleni ekugwetshweni kwabasolwa.
Ukuqulwa kwecala kwathola ukugxekwa okukhulu okuqhamuka ezikhulwini ze-United Nations (UN) kanye nalabo abalwela amalungelo abantu abathi abaholi noma abahleli baleli tulo lokubulala bona ababoshiwe.
EzaseVenezuela:
UMengameli waleli lizwe, uMnu uNicolas Maduro, kuleli sonto uphakamise ukuthi kuhlinzekwe umuthi wokugomela ukhuvethe waseRussia kubantu abayizi-15 000 abazozibandakanya okhethweni lwezomthetho oluzayo, ukuze bakwazi ukukhankasa ngokuphepha. NgoNcwaba iRussia ikhiphe imvume yokusetshenziswa kwekhambi lokugomela ukhuvethe ngemuva kwezinyanga ezimbili lihlolwa kubantu okuyisinyathelo esajatshulelwa uhulumeni kodwa saphikiswa abanye ochwepheshe abaphawula ngokuthi cishe amaphesenti ayishumi kuphela ovivinyo lomthalampilo aphumelelayo ngaleli khambi.
EzaseSouth Korea:
Izinkulungwane zodokotela abaqeqeshwayo kuleli zwe babuyele emsebenzini kulo leli sonto ngemuva kwesiteleka esibengaphezu kwamasonto amabili njengoba leli lizwe liqhubeka nokuthola izibalo eziphezulu zabantu abanokhuvethe ngosuku.
Ezase-Iraq:
UNdunankulu waleli lizwe, uMnu uMustafa al-Kadhimi umemezele ukuthi leli lizwe lizovula imingcele yalo, amahhotela kanye nezemidlalo kodwa ngaphandle kwezethameli. Ngemuva kwezinsuku ezintathu labika isibalo esiphezulu sosuku sabantu abanokhuvethe. Uphinde wathi izindawo zokudlela namahhotela kumele kuhambisane nemihlahlandlela yezempilo yomphakathi futhi izinhlaka zikaHulumeni sezingakwazi ukubuyisa izisebenzi ezingamaphesenti angama-50.
EzaseMyanmar:
Umholi waleli zwe, uMnu u-Aung San Suu Kyi, umise umcimbi wokuqala womkhankaso wakhe wokhetho ngenxa yokuqhubeka kokwanda okukhulu kwezibalo zabantu abanokhuvethe. Lesi sizwe esiseningizimu yezwekazi i-Asia sibike ukuthi ngesonto eledlule ngoMgqibelo izibalo zabantu abatholwa benokhuvethe ngosuku sasimi ekhulwini okwakuyisibalo esikhulu selokhu kwatholakala umuntu wokuqala owayenokhuvethe kuleli zwe. Kanti lesi sibalo siphinde sanda ngama-40 ekuqaleni kwaleli sonto.
EzaseMexico:
Isikhungo iNational Electoral Institute (INE) isinqabe isicelo saloyo owayenguMengameli waleli lizwe, uMnu uFelipe Calderon, ukuba abhalise inhlangano yakhe iFree Mexico njengeqembu elisha lezepolitiki ngenxa yokuthi ithi enye imali yoxhaso etholwa ileli qembu iyangatshazwa. UCalderon wahola leli zwe kusuka ngowezi-2006 kuya kowezi-2012.
Ubelokhu ezama ukuguqula leli qembu eliqondana nenkululeko alihola nonkosikazi wakhe, uNkk uMargarita Zavala, ukuba libe iqembu lezepolitiki elizongenela ukhetho lwaphakathi nonyaka wezi-2021.