Isexwayiso ngokhuvethe oluhlehlisa okwenqama
Ukhuvethe lugadle kwezwakala emhlabeni kodwa ngisho udosi lwalo seluntinyela kancane kuzobaluleka ukuthi abantu banganethezeki kakhulu ngenxa yokwehla kwezibalo zasebethelelekile.
Isikhulu seWorld Health Organisation (WHO), uMnu uTedros Adhanom Ghebreyesus (osesithombeni), kuleli sonto sithe umhlaba kumele uzilungiselele kangcono ubhubhane oluzayo njengoba sinxenxa amazwe ukuthi atshale imali kwezempilo zomphakathi.
Abantu abangaphezu kwezigidi ezingama-27.19 emhlabeni sekubikwe ukuthi batheleleke ngokhuvethe lwabulala abayizi-888 326 kusukela mhla luqala ukubikwa eChina ngonyaka odlule.
“Lolu akulona ubhubhane lokugcina,” kusho uTedros etshela abezindaba eGeneva. Uqhube wathi: “Umlando usifundisa ukuthi ukuqubuka kwezifo yinto ekhona empilweni kodwa uma kufika ubhubhane olulandelayo noma olusha umhlaba kufanele ube usukulungele, ulunge ngaphezu kwalokhu kulungela lolu bhubhane olusithole kukho.”
Iqiniso lithi amazwe amaningi asabhekene nempi enkulu nokhuvethe njengoba kwamanye izibalo zabanalo ziqala phansi njengaseSpain lapho izibalo eziqale kabusha zakhula zabeka leli lizwe njengelokuqala ezwenikazi i-Europe ukuba nabantu abayingxenye yesigidi abanokhuvethe. Ongoti bezempilo beWHO bathi asikho isikhala sokunethezeka nokuzethemba kakhulu. Umqondisi weWHO Emergencies Programme uMnu uMike Ryan uthe:
“Kuhlala kunengozi yokuthi izifo zingaphinde zivele futhi kuthi ezibikwayo zibe ngamaqoqo ngenxa yokuthelelana komphakathi okungaholela ohlelweni lwezempilo olukhungathekile. Sikubonile lokhu kwenzeka engxenyeni yokuqala yonyaka, siyaqhubeka nokukubona kwenzeka kwamanye amazwe. Sidinga ukukugwema lokhu ukuthi kungaphinde kwenzeke.”
Ongoti bezifo base-United States of America (USA) babheke ngeso lokhozi ukuthi kwenzekani ngezinga lokutheleleka kula masonto ambalwa azayo kulandela usuku lwezisebenzi kuleli sonto lapho abantu abaningi begubha ukuphela kwehlobo futhi okuzobe sekuyisikhathi sokubuyela kwabafundi abaningi ezikoleni.