Ziyaqina izinhlaka zokukhankasela ukhetho e-USA
UMengameli wase-United States of America (USA), uMnu uDonald Trump, usememezele ukuthi uzimisele ukusebenzisa noma yini edingekayo ngemali yakhe ukukhokhela umkhankaso wakhe wokufuna isikhundla sobuMengameli kowezi-2020 lapho ezobe ephikisana nomholi weqembu lamaDemocrats uMnu uJoe Biden (osesithombeni).
UTrump ongumholi wamaRepublicans olandela uBiden ngokuthandwa kakhulu ocwaningweni olwenziwe ngaphambi kokhetho lwangoLwezi mhla zintathu, utshele izintatheli ukuthi lo mkhankaso imali oyidingayo nosuyisebenzisile isiphindeke kabili uma kungekho kathathu kuleyo eyasetshenziswa emkhankasweni wangowezi-2016 kodwa ukuqinisekisile ukuthi uma kudingeka uzosebenzisa eyakhe imali.
“Uma kufanele ngizokwenza,” kusho uTrump.
Eqhubeka echaza uTrump uthe: “Sizokwenza noma yini edingekayo. Kufanele sinqobile. Lolu khetho yilona olubaluleke kakhulu emlandweni wezwe lethu.”
Umphathi womkhankaso kaTrump, uMnu uBill Stepien, othathe izintambo kuMnu uBrad Parscale maphakathi noNtulikazi, utshele abezindaba ukuthi manje sekuyilapho asebebhekisisa kahle isabelomali. UStepien uthe umkhankaso lona uzoba nezinsizakusebenza eziningi ezizosetshenziswa kunalokho okwasetshenziswa ekunqobeni ukhetho lwangowezi-2016 futhi uphinde wathi “sikhululekile futhi siyazethemba” ngendlela abasebenzisa ngayo imali kulo mkhankaso.
Okubonakalayo njengamanje ukuthi uTrump ungaphansi kwengcindezi enkulu ngendlela aphathe ngayo udaba lokhuvethe futhi abalandeli abaningi bamaRepublicans basebeqale nokugxeka uParscale ngokusebenzisa imali eningi ngaphambilini kulo mkhankaso kodwa uTrump waphinde wamvikela ngokuthi athi ngenxa yokhuvethe umkhankaso wakhe waphoqeka ukuba usebenzise imali eningi ukuze ulwe nalokho ayethi ukuvezwa kwezindaba ezingezinhle.
“Senze futhi sisenza umsebenzi omuhle kakhulu futhi sinemali eningi esele engaphezu kwaleyo yangowezi-2016.”