IRussia ingaba yiphiko lokukhosela kweSyria
UMengameli waseSyria uMnu uBashar al Assad uthi wayefuna ukwandisa ubudlelwano bezamabhizinisi neRussia ukusiza izwe lakhe ukuthi likwazi ukubhekana nonswinyo olusha oluzobekwa yi-United States of America (USA) emnothweni waleli zwe ovele ukhubazekile.
Lolu nswinyo luzobe lubukela phansi ukuzuza kwezempi leli lizwe elakuthola ngosizo lweRussia. UMengameli u-al Assad ukhulume emhlanganweni abenawo neSekela likaNdunankulu waseRussia uMnu uYuri Borisov kanye noNdunankulu Wezangaphandle uMnu uSergei Lavrov.
ULavrov utshele abezindaba ukuthi iSyria idinga usizo lwamazwe angaphandle ukwakha kabusha umnotho wayo. UBorisov yena uthe iRussia ibisiza iSyria ukulungisa izikhungo zokuphehla ugesi kodwa waphinde wathi ukukhishwa kukawoyela ngeke kuqhubeke njengoba izinkambu zawo zisezindaweni ezingalawulwa uHulumeni. Ukusekela kwayo ezezimpi zaseSyria kusukela ngowezi-2015 kwalisiza leli lizwe ukuthi libuyise ukuzuza komhlaba okwase kuthathwe abenkolo yamaSulumane kanye namanye amavukelambuso empini ecishe ibe yishumi leminyaka. Lezi zinhlangothi zombili, iRussia neSyria, kuke kwabikwa ukuthi zihlela ukukhulisa amaxhama okuhwebelana futhi afuna ukubuyekeza amaphrojekthi kagesi nezokumbiwa.
Ekhuluma nabezindaba uMengameli u-Assad uthe: “UHulumeni uzimisele ukusebenzisana nabahlobo bethu iRussia ukwenza izivumelwano ezisayiniwe kanye nokuqinisekisa impumelelo yotshalomali lwaseRussia kuleli lizwe.”
UBorisov uthe iRussia yethula iziphakamiso ngenyanga kaNtulikazi zokukhulisa ubudlelwano bezomnotho phakathi kwala mazwe futhi ulindele ukuthi isivumelwano ngazo iziphakamiso sitholakale ngenyanga kaZibandlela uma esehambele kuleli lizwe futhi. Uphinde washo ukuthi iRussia izimisele ukulekelela iSyria ukugqiba izijeziso ezibekwe yi-USA
Kubukeka sengathi iSyria isibeke wonke amathemba ayo eRussia okuyilona lizwe elikhulu langaphandle eliwumhlobo wayo, Osomaqhinga basentshonalanga bathi ukuzibandakanya kwamasosha aseRussia eSyria sekubanike amandla amakhulu kulesi sifunda futhi kwaphinde kwabazuzisa indawo enkulu echwebeni lemikhumbi edolobheni iTarturs.
“IRussia yaguqula imiphumela yempi yagcina isinqotswa uyena uMnu u-Assad futhi njengoba umbuso wakhe usubhekene nezinqinamba eziningi, iRussia isisesimweni esingcono kunanoma yisiphi esinye isikhathi sokuqhubeka nokulawula u-Assad,” kuphawula omunye wosomaqhinga.
Nokho u-Assad sawawubuyisa cishe wonke umhlaba owawulahleke ngesikhathi sempi, umnotho waleli zwe uphansi kakhulu ngendlela yokuthi usushiye iningi lezakhamuzi ziphila ngaphansi kobubha njengoba imali yaleli zwe isilahlekelwe ngamaphesenti angama-80 amandla ayo.
IRussia iphinde yagxeka kakhulu unswinyo lwe-USA oluqale ngenyanga kaNhlangulana ngaphansi komthetho obizwa ngeCaesar Act.
I-USA ithi lolu nswinyo olujezisa amafemu angaphandle asebenzisana nezinhlangano zikahulumeni waseSyria luhlose ukunciphisa imali engenayo kuhulumeni ka-Assad okuzomenza agcine esephoqeleka ukuthi aye ezingxoxweni eziholwa yi-United Nations (UN) ukuzama ukuqeda izingxabano kuleli zwe.
Okuvelayo noma okubukekayo kulesi sithombe ukuthi iSyria isetshenziswa ukuzuza okuthile kwamazwe ngenxa yokuthi uma yesekwa yiRussia khona ekuzuzayo futhi uma ilandela izingxoxo eziholwa yi-UN kuzophinde kuzuze kakhulu amazwe asentshonalanga ngoba imibandela yezindlela zokusebenza izohlelwa yiyo i-UN.