Izikhalo kunyuka imali yokuthutha abafundi
Njengoba abantu abaningi besathwaliswe kanzima ukuhlasela kokhuvethe olukhahlameze inqwaba abanye baphelelwa ngisho yimisebenzi, kwabanye usizi lufikele kolunye njengoba abanikazi bezimoto ezithutha izingane zesikole eMgungundlovu benyuse amanani okuzithwala ngendlela ethusayo.
Laba ababizwa ngoMalume, eMgungundlovu banqume ukunyusa imali ekuqaleni kukaNcwaba isuka kuma-R650 yaya ku-R1100 ukusuka ezindaweni zakobantu nasemalokishini ukuya eNorthdale. Eyezingane ezifunda ngasemakhaya ikhuphuke ngama-R50. La manani akhomba ukuthi imali yokuthutha abafundi basezikoleni eziseNorthdale ikhuphuke ngamaphesenti angama-69.3.
IBAYEDE ilandele lolu daba emva kokuzwa abazali abaningi bekhononda ezinkundleni zokuxhumana ngokunyuka kwemali ekhokhelwa oMalume.
Leli phephandaba lixoxisane noSihlalo weMgungundlovu Region Scholar Transport ewuphiko lweSANTACO kanti esifundazweni onguMxhumanisi, uMnu uPhendulani Ndlovu, ukuba achaze ngembangela yokwenyuka kwemali ngalolu hlobo eMgungundlovu.
Engxoxweni kuhlale obala ukuthi lokhu akwenzekanga ngephutha futhi abazisoli ngakho.
Uthe: “Imali siyenyusile, uzokhumbula ukuthi kube nokuvalwa kwezwe bonke abantu abasemabhizinisini bebelokhu bebuza ukuthi sizosizakala kanjani thina njengabathutha izingane zesikole okwaze kwafika kuNgqongqoshe Wezokuthutha uMnu uFikile Mbalula. UNgqongqoshe washo into eyangithinta kakhulu njengomholi athi uma eyisho ngibuka nendlela esisebenza ngayo kwacaca ukuthi kumele siyibuke ngeso elibanzi ngoba kuyiqiniso lokhu ayekusho.”
UNdlovu uthe uMbalula waphawula ngenkohlakalo ekoMalume ngokulayisha kwabo izingane ngokweqile ngoba befuna ukwenza inzuzo. Uthe lokhu okwashiwo uMbalula akwehlanga kahle kubo njengabaholi base bebona ukuthi bakwetshise bese bekusebenza ngendlela.
“Yilapho-ke engabe sengibiza umhlangano wozihlalo esifundeni uMgungundlovu savumelana ukuthi izingane sizilayisha ngokweqile ngenxa yokuthi sifuna ukwenza inzuzo. Sabona ukuthi sibiza imali encane kakhulu uma silayisha ngendlela esemthethweni engeke sikwazi ukuphila ngayo, savumelana ukuthi sinyuse imali bese izingane zihlala kahle ezimotweni. Sabe sesisho ukuthi akekho umzali ongathandi ukuthi ingane yakhe ihlale kahle ifike esikoleni inganyathelekile, akhokhele isidingo esisesimweni esihle sabe sesivumelana ngokuthi imali sizoyinyusa ngokwebanga ingane elihambayo,” kusho uNdlovu.
Uqhube wathi bazibophezele ukulayisha ngendlela elungile futhi kuyimanje abazali sebeyayikhokha imali entsha. Udalule ukuthi beyimboni yoMalume bameme uphiko uHLokomela, olubheka ukusebenza nokuphepha ematekisini, ukuba uqaphe nakoMalume ukuthi sebelayisha ngendlela elungile yini.
UNdlovu uthe ngonyaka ozayo umkhankaso wabo wokulayisha isibalo esifanele uzoqina ngoba ukholwa ukuthi izingane zizobe sezibuyele zonke esikoleni, lokhu okunzima ukuthi bakubone kulo nyaka ngoba azifundi nsuku zonke kanti nabo oMalume basalayisha isibalo esincane kunesibekelwe izimoto.
Uphinde waveza ukuthi kunemihlangano eqhubekayo esifundazweni ukulekelela imboni yoMalume ukuthi ibe ngcono.
“Ngithole umyalezo wokuthi uMphathiswa woMnyango Wezokuthutha uMnu uBheki Ntuli uthi ucela sibe sicabanga igama esizobizwa ngalo kule mboni ngoba eloMalume alehli kahle ngakho badinga elizoba nesithunzi imboni okumele ibe naso. Ngibe sengicabanga ukuthi kuzomele sithinte izifundiswa ezihleli emakhaya ukuba sikhethe ukuthi iliphi elingcono, bengikucatshangiswa ukuthi zizokwazi ukucabangisisa kahle njengoba zihleli emakhaya ziphinde zithole okuyinkece,” usho kanje.
Uthi okwamanje imali ikhokhwa ngezinsuku ezingenwe ingane esikoleni. “Labo abafunda umatikuletsheni nabasezikoleni ezizimele bakhokha egcwele ngoba bafunda nsuku zonke.” Okutholwe iBAYEDE ezinkundleni zokuxhumana ukuthi amanani asencike kakhulu kwawamatekisi athutha umphakathi kanti abazali bangena koMalume ngoba befuna ukonga imali.
Ephendula kulokho uNdlovu uthe: “Lapho senza iphutha elikhulu kwasekuqaleni ngoba ngokomthetho kumele engabe sibiza ngaphezu kwemboni yamatekisi ngoba bona bakuthatha emgwaqweni bakubeke erobhothini noma erenki ekubeni thina ingane siyithatha ekhaya siyibeke esangweni lesikole. Kuwumsebenzi wethu ukuthi uma izingane zidedelwa ngaphambi kwesikhathi sekuphele amanzi esikoleni sizilande nothisha bayazi ukuthi baxhuma thina. Umsebenzi esiwenzayo mkhulu kakhulu kunowenziwa abamatekisi ngoba sijika sibe ngababheki bezingane konke okuthinta ingane noma igula siyakwenza ngaphandle kokukhononda. Mina ngithi abazali kumele engabe bayayifaka imali kulo msebenzi uma kungenjalo uHulumeni alekelele ukuba uphucuzeke ngoba ithina esakha isizwe.”