Bamakhele uzungu lokuqola ngegama lakhe uManzini
Sekuvele ukuthi kuqolwa ngegama lomholi weSouth African Communist Party (SACP) esifundeni iHarry Gwala (Thembisile Hani), uMnu Nhlanhla Zungu, izitshudeni ezisanda kuphuma emanyuvesi ikakhulukazi lezo ebezenza izifundo zobuthishela.
Lokhu kuvele ngemuva kokuthi abanye balaba begasele ehhovisi loMnyango Wezemfundo esifundeni iHarry Gwala eMzimkhulu lapho uZungu aphinde asebenze kulona njengeMeneja beyofuna ulwazi lokuthi baqala nini ukusebenza nakuziphi izikole njengokwesethembiso.
UZungu uthi ezinye zalezi zitshudeni zikhala ngokuthi sezikhokhiswe imali ebalelwa ezi-R3 000 kuya phezulu, zithenjiswa ukuthi ngeke ziyenze inhlolokhono ngoba sezikhokhile kodwa zizonikwa amagama ezikole ezizosebenza kuzo.
Kuthiwa zifika ehhovisi zifune uZungu. “Imina ngedwa uZungu osebenza kuleli hhovisi okusho ukuthi ukhona osebenza ngegama lami,” usho kanje. Uthe okubuhlungu ukuthi abanye balaba abaqoliwe siyabonakala isimo senhlupheko yabo nokuthi kungenzeka ukuthi imali abayikhokhisiwe bebeyibolekile bathembisa ukuyikhokha uma sebesebenza.
UManzini uphoqeleke ukuthi abize isithangami sabezindaba ukuzama ukukhuza nokuxwayisa abantu ngalo mkhuba ngoba kuyezwakala ukuthi ususabelele nakwezinye izifunda.
“Kusobala ukuthi lo muntu unobuhlakani ngoba asazi ukuthi uzithola kanjani izingcingo zalezi zingane nokuthi azazi ukuthi bezifundela ubuthishela,” kusho uZungu. Uthe kumanje udaba baluxoxa nezikhulu zamaphoyisa njengoba belungiselela ukuvula icala kubhekwe ukuthi kalikho yini ithimba elingompetha ekulandeleni amacala enkohlakalo efana naleli ukuze kucushwe umsolwa avalelwe.
“Siyabaxwayisa abantu ukuthi kawukho umsebenzi kaHulumeni odayisayo, wonke umuntu unelungelo lokufaka isicelo sakhe emisebenzini kaHulumeni ngale kokukhokhiswa imali,” kwexwayisa uZungu. Uthe lokhu ngeke akuhlanganise nepolitiki njengoba abanye bezocabanga ukuthi kunabathile abafuna ukungcolisa igama lakhe.
“Yinkohlakalo nje le ewusizi ngoba enye ingane efike kumina u…(eyigagula ngegama) bekubonakala ukuthi umuntu odonsa kanzima kodwa nakhu usezoqolwa imali ebingenza okuningi ngayo,” usho kanje.
Okhulumela uMnyango Wezemfundo KwaZulu-Natal, uMnu uMuzi Mahlambi, uthe abantu abayibambe ekuthini uMnyango oqasha abantu ubakhokhele amaholo, hhayi ukuthi kukhokhelwe wona.
“Siyabanxenxa abantu futhi kade sakusho lokhu ukuthi uma umuntu ethola ucingo olukhuluma ngokuthi kufanele akhokhe imali akavele anxaphe nje avale ucingo kumbe azame ukuxhumana nabezomthetho ukuze kuboshwe lowo muntu,” kusho uMahlambi.
Uthe kunemigudu elandelwayo umuntu uma efuna ukufaka isicelo somsebenzi eminyangweni kaHulumeni, ayithengwa emakhoneni.
Kuso lesi sithangami obekukhuluma kuso uZungu kugxekwe inkohlakalo edla lubi kuleli.