Izihlalo zingazinye nalowo ubeka isinqe eNquthu
Usuphenduke ihlaya uMasipala iNquthu ngezigigaba eziqhubekayo okuvela ukuthi umdonsiswano wamakhansela ohlanganisa nabaholi be-Inkatha Freedom Party (IFP) esifundazweni usudale ukuthi kungaziwa ukuthi ubani oyiMeneja noyiMeya njengoba lezi zikhundla sekufakwe kuzo abantu ngababili.
Kuleli sonto kuthiwa kutheleke izikhulu ezintsha zithi seziyiziMeneja zalo Masipala okwenzeke abaziphethe bekhona.
Izolo uMphathiswa Wezokubusa Ngokubambisana Nezindaba ZoMdabu KwaZulu-Natal, uMhlonishwa uSipho Hlomuka, ufike wehlisa ezikhundleni iMeya nezikhulu okuthiwa zingene ngenkani emahhovisi.
Lokhu kuthiwa kudalwe umdonsiwano okhona phakathi kwamakhansela nabaholi abajutshwe kulo Masipala iPolitical Oversight Committee (POC) ye-IFP abasolwa ngokukhipha umyalelo wokuphoqa amakhansela ukuba athathe isinqumo sokuthi iNhloko Yezimali, iMeneja kaMasipala nabanye abaqondisi besule ezikhundleni kuqashwe abanye.
Amakhansela kuthiwa awayizwa kahle eyalo myalelo okugcine ngokuthi kubonakale sekufike izisebenzi ezintsha ezizothatha lezi zikhundla maqede kwagqekezwa amahhovisi.
Ubuholi be-ANC eNquthu buthe akusasebenzeki ngoba izimeneja sezimbili, izinhloko zezimali ezimbili nezimeya ezimbili. UMnu uJoe Motloung noMnu uLucky Moloi be-ANC bathe lokhu kubadumazile ngoba uMasipala “usuphenduke irenki yamatekisi ngendlela okwenzeka ngayo izinto”.
UMoloi uthe yize bengasho ukuthi izimeneja ezikhona aziqhubeke nezikhundla zazo kodwa ababoni ukuthi lokhu okwenzekayo kunobulungiswa.
“Lokhu kuyasikhathaza ngoba i-IFP isiphethe uMkhandlu njengerenki yamatekisi. Imigomo elawula uMkhandlu ayisalandelwa, kunalokho sekuvele kuqokwe iMeneja entsha kaMasipala kungaladelwanga migudu efanele. Sebephendule iNquthu kwaba kwamazenzele. IMeya ekhona yaqokwa kungaladelwanga migudu kodwa namhlanje ithatha zonke izinqumo ezijulile ngoMkhandlu. Le Meneja entsha asiyazi kodwa esimaziyo uGumbi ngoba waqashwa ngokuvumelana koMkhandlu Wamakhansela,” kusho uMoloi.
Abaholi abasolwa ngalezi zinkinga zaseNquthu uMnu uXolani Ngwezi noMnu uXolani Dube onguNobhala weIFP KwaZulu-Natal.
Ngesonto eledlule uNgwezi utshele elaboHlanga ukuthi akulona iqiniso lokhu ngoba ukungenelela kwabo bekumayelana nokusiza ngemuva kokuba uMasipala usebenzise budedengu izigidi zamarandi.
Udaba lwezikhulu oselususe umsindo luqalwe emuva kokhetho loHulumeni Bendawo obelungowezi-2016 nokuyilapho okuthiwa obeyiMeya, uMnu uMabilabila Kunene, wathatha isinqumo sokuvuselela izinkontileka zazo engaxhumananga noMkhandlu. Luyiswe eNkantolo yaseMgungundlovu walunqoba uMnyango lwabe seludluliswa amakhansela ephikisana nesinqumo.