Udedelwe ejele eMali wayokwelashwa e-Abu Dhabi
Loyo obenguMengameli waseMali uMnu u-Ibrahim Boubacar Keita (osesithombeni) kuleli sonto kuvele ukuthi uselishiyile leli lizwe walibangisa e-Abu Dhabi ukuyothola ukwelashwa. Konke lokhu kwenzeka-nje kuqhubeka izingxoxo mayelana nokubuyisela umbuso ezakhamuzini zaleli lizwe kulandela ukuvukelwa kombuso amasosha oqale ngesiyaluyalu enyangeni edlule.
UKeita, oneminyaka yobudala engama-75, ungeniswe esibhedlela enhlokodolobha iBamaku ngesonto eledlule emveni kwezinsuku eziyisi-6 ekhululwe ejele uHulumeni waleli lizwe oholwa ngamasosha (Junta) owathatha amandla mhla zili-18 kuNcwaba.
Owayeyinhloko yezisebenzi uMnu uMamadou Camara utshele abezindaba ukuthi uKeita ngeledlule uthathe indiza eyayiqashwe yi-United Arab Emirates ngesicelo sikaHulumeni weJunta. “Lokhu ukuvakasha kuhlangene nokwelashwa okungathatha izinsuku eziyishumi kuya kweziyishumi nanhlanu,” kusho uCamara.
Isimo sempilo kaKeita asaziwa kahle kodwa kuzokhumbuleka ukuthi ngonyaka wezi-2016 wakhishwa isimila entanyeni.
Abaholi baseNtshonalanga Afrika ngokwesaba ukuthi lokhu kuvukelwa kombuso okwenzeke kuleli lizwe kungabeka isibonelo esizodicilela phansi amandla kanye nokulwa komhlaba wonke namasosha awenkolo yamaSulumane, esifundeni esikhulu saseSahel, ekuqaleni baphakamisa ukuthi uKeita akabuyiselwe emandleni. Kodwa manje laba baholi sebephakamise ukuthi kube nokhetho kungakapheli unyaka okuyisicelo noma isiyalo iJunta okuyiNational Committee for the Salvation of the People (CNSP), engakazibophezeli kuso. Sekukhulunywa ngezindlela zoguquko esontweni eledlule abantu abangaphezu kwekhulu abamele iJunta, amaqembu ezepolitiki nezinhlangano zomphakathi bahambele umcimbi wokuvuka eBamako Kodwa kungakapheli ngisho ihora lo mcimbi uqalile abasekeli beM5-RFP Coalition, okuyiyo eyayihola imibhikisho ngaphambi kokukhishwa esikhundleni kukaKeita, baqale ukubhukisha ngaphandle besola iJunta ngokubakhipha inyumbazana.
Abalandeli beM5-RFP ehholo lenkomfa bahhahhameza isikhulumi nebesingumqondisi wohlelo kwacaca ukuba umcimbi uyamiswa. Kodwa ngemuvana kwesikhathi umphathi wohlelo umemezele ukuthi iM5-RFP ingalibamba iqhaza kulo mcimbi, okugcine sekudambisa ulaka lwabo umcimbi waqhubeka.
Lezi zingxoxo eziqhubeka nakomkhulu bezifundazwe ezweni lonke kuhlelwe ukuba ziqhubeke kuleli sonto.