Imibono ngemizamo yokuqeda ngebhange i-Ithala
Mhleli
Isiphukuphuku kuphela esingaboni ukuthi le nto kaKhongolose iwubuqili obuphindiwe, baqhuba yona inqubomgomo yokusihluphekisa yobukhomanisi, besenza izichuse nethuluzi nonopopi babo abayohlale bedansela bona. I-ANC umsangano ukuba kuya ngami njengoba sivela amaqenjini ahlukene ngabe siyahlangana sibe yimbumba sichithe lezi zikhohlakali zamasela ngevoti.
Lapha KwaZulu-Natal ingakhulunywa indaba yalezi zigebengu zikaKhongolose. Ngifisa bangabi nayiqembu eliphikisayo kulesi sifundazwe sethu, ivele iphele nje indaba yayo. Balibulele baliqedile izwe laba bantu, nemithetho yokubuswa kwezwe ungathi yenzelwe ukuqeda konke ngoZulu ngoba nakhu kuliwa noShenge. Siyayazi imisebenzi emihle kaShenge, isintu sethu esizigqaja ngaso ubesiqhakambisa ngaso sonke isikhathi. Ngibona ukuthi singamaZulu siphuma kuzona izinhlangano zethu ezihlukeneyo zezombusazwe, ake sibe nenguyazana ukuthi silwa kanjani naleli chilo. Singathuli sisonge izandla sibukele la maqola azibiza ngabaholi ebulala izwe nobuzwe namasiko ethu.
- nguSibusiso Mbatha Mhleli
Asingalawulwa imizwa uma siphawula kulolu daba. Okuqaphelekayo ukuthi alibazuzisi okufanele bazuze ngokuba khona kwalo kodwa seliphenduke umkhoma lapho osopolitiki nabasondelene nabo bezixebulela khona. Bathenga izikebhe zokutetemuka, amabhanoyi ngingabala okuningi. Kugcwele inkohlakalo ethusayo e-Ithala. Selokhu ngaba khona angikaze ngibone umuntu osemazingeni aphansi owathola usizo e-Ithala kuphela nje ilaba abaxhumene nosopolitiki, bashaya ngezingqovungqovu zezimoto. UMdali kuphela oyosiphendulela kukho konke okwenziwa kithi osopolotiki.
- nguSabelo Senkosi Mhleli
Lesi yisikhathi sokuba uZulu ahlangane avikele isithunzi sakhe kula mankentshane e-ANC, ngikusho kahle lokhu ngoba ngingomunye obewavotela kodwa sengibonile ukuthi akusibo abantu bokuthenjwa laba. Kabanandaba namuntu nangekusasa lesizukulwane esizayo kuphela bazibheke bona, abangani babo nemindeni yabo. Njengalokhu baba nesandla esikhulu ekudicileleni phansi iVBS okwakungeyaboHlanga, sebeyaphinda bafuna ukuqeda nge-Ithala. Yini ethuthukisa owoHlanga kwezomnotho abake bayiphatha yaphumelela?
- nguSizwe Qwabe Mhleli
Eminyakeni embalwa edlule kwake kwaba nezinsolo zokuthi omunye woNdunankulu waboleka imali kuleli bhange wangabe esayibuyisa. Thina boHlanga asikwazi ukuba nezinto zethu sizithuthukise yikho besithatha kancane abelungu. Siyizehluleki noClicks yikho benza nje ngoba bayazi asinakho okungokwethu okusimeme.
- nguMphumeleli Blessing Zulu Mhleli
I-ANC ilwa ngazo zonke izindlela ukuqeda izinto ezafika noMntwana waKwaPhindangene. Ukube kuya ngami bekufanele iKwaZulu-Natal izimele kushintshwe negama.
- nguMxolicy Mxolicy