Lizinzile irandi yize umbiko weStatsSA ngomnotho umubi
Liqale kahle isonto irandi likhombisa ukusimama ezimakethe zemali uma liqhathaniswa nalezo esijwayele ukukhuluma ngazo ezithinta kakhulu isimo saleli lizwe somnotho. Leli sonto siliqale silindele umbiko wakwaStatsSA mayelana nesimo somnotho waseNingizimu Afrika esigamini sesibili salo nyaka ophezulu. Kuyinto esobala ukuthi akusetshenzwanga ngesigamu sesibili sonyaka ngenxa yokhuvethe kanye nemvalelwakhaya ehambisana nalo. Umbiko uveze obekulindelwe, okwethusayo, kokuthi umthamo womkhiqizo weNingizimu Afrika wehle ngama-51%. Nokho irandi alikhombisanga ukushayeka okukhulu ezimakethe zomhlaba.
NgoMsombuluko ziyisi-7 kuMandulo 2020
Kuvule izimakethe ngoMsombuluko idola lase-USA lilingana namarandi ali-16,69. NgoLwesihlanu sasigcine kudingeka amarandi ali-16,72 ukuze sikwazi ukulinganisa irandi lethu nedola elilodwa lase-USA.
Savuka ngoMsombuluko uPondo waseBritain ulingana namarandi angama-22,04 okuthokozisayo ngoba kunezimpawu zokusimama kwerandi.
NgoLwesihlanu kwakudingeka amarandi angama-22,21 ukuze silinganise irandi lethu noPondo waseBritain. Selokhu lagcina emasontweni ayisihlanu edlule irandi ukuba kuleli zinga.
Ngempelasonto irandi lithole amandla okududula iYuro kwavukwa ngoMsombuluko iYuro lilahlekelwe ngamasenti ayisishiyagalombili lilingana namarandi ali-19,74. Irandi liyasimama lithathe indlela ebuyayo lafinyelela lapho lalikhona emasontweni ayisihlanu edlule.
Intengo yegolide ilokhu iqhubeka yehla kancane kancane. NgoMsombuluko kuvule izimakethe i-awunsi legolide libiza amadola ase-USA ayi-1 930.
Intengo kawoyela yehlile ngempelasonto kwathi ngoMsombuluko kwavukwa umphongolo kawoyela ubiza amadola ase-USA angama-42,01. NgoLwesihlanu umphongolo kawoyela wawubiza amadola ase-USA angama-43,71.
NgoLwesibili ziyisi-8 kuMandulo 2020
Njalo uma kunombiko obucayi othinta ezomnotho emhlabeni kuyaye kubanjwe umoya ngoba ivamise ukulinyakazisa irandi lethuke ligcine lehlela ngezansi. NgoLwesibili bekulindelwe ngabomvu umbiko ovela kwaStatsSA wokusebenza kweNingizimu Afrika esigamini sesibili sonyaka. Akwethusanga kangako ukubona irandi lilahlekelwa wukuzethemba kwavula izimakethe kudingeka amarandi ahlangane abe yi-16,75 ukuze kulingane nedola lase-USA elilodwa.
Kuthe uma libhekana noPondo waseBritain irandi lathola umdlandla kwavukwa ngoLwesibili uPondo waseBritain ulingana namarandi angama-22,00. Uma sibheka isizathu salokhu kukhula kwerandi wukuqhubeka kwezinkulumo ezithinta ukuphuma kweBritain ekubambisaneni namazwe ase-Europe.
IYuro likwazile ukubuyisa amasenti amane emshikashikeni walo nerandi, kwavula iYuro lilingana namarandi ali19,78.
NgoLwesithathu ziyisi-9 kuMandulo 2020
Irandi liqhubekile lakhombisa ukwehla uma libhekene nedola lase-USA. NgoLwesithathu kuvule izimakethe idola lase-USA lilingana namarandi ali-16,95.
UPondo waseBritain uqhubeka nokucindezeleka lokho kwanika ithuba lokuba irandi lisimame. Kuvukwe ngoLwesithathu uPondo waseBritain ulingana namarandi angama-21,97, okubuyisa injabulo kwabaningi.
Ebusuku bangoLwesibili irandi lilahlekelwe ngamasenti ali-18 ngenkathi libhekene neYuro, kwavukwa ekuseni iYuro lisimeme lalingana namarandi ali19,96 ekuseni ngoLwesithathu.
NgoLwesine zili-10 kuMandulo 2020
Kuyathokozisa ukuthi noma sewuphumile umbiko weStatsSA oveza isithombe somnotho weNingizimu Afrika emuva kwengxenye yesibili yanonyaka, irandi likhombise ukuba namandla uma libhekene nezimali ezimakethe zomhlaba.
Kuvule izimakethe ngoLwesine irandi lisimeme esimweni ebelikuso uma liqhathaniswa nedola lase-USA. Idola lase-USA kuvukwe lilingana namarandi ali-16,68 ekuseni ngoLwesine.
Kuvukwe ekuseni uPondo waseBritain ulingana namarandi angama-21,67. Noma kusewumqansa ukuhlanganisa amarandi alingane noPondo owodwa, kuyajabulisa ukubona kuqhubeka izinsuku irandi lilokhu lisimama uma siliqhathanisa noPondo waseBritain.
Likhombise ukusimama irandi ngenkathi siliqhathanisa neYuro langoLwesithathu. Kuvule izimakethe iYuro lilingana namarandi ali-19,69 ekuseni ngoLwesine.
Kusukela ngoMsombuluko intengo yegolide beyilokhu yehla, kodwa kwaletha ithemba ukuthi ngoLwesine ekuseni i-awunsi legolide belibiza amadola ase-USA ayi-1 943, lisimama kulokho elaliyikho ngoLwesithathu lapho lalingamadola ase-USA ayi-1 928.
Iphinde yenyuka kancane ngoLwesine intengo kawoyela ongahluziwe, emva kokuba yehle yaba ngamadola ase-USA angama-39,63 ngoLwesithathu, kwavula izimakethe ngoLwesine umphongolo kawoyela ongahluziwe ubiza amadola angama-40,32. Uma ungaqhubeka wehle sinethemba elikhulu lokuthi abanikazi bezimoto bangagcina behlekele nxanye kungekudala.