Ummeli womndeni uwusizo ekusebenzeni kwenkantolo yemindeni
Sekujwayelekile ukuthi kube nemibango yezingane uma abakade beshadile sebehlukanisa noma izingane lezo zizalelwe ngaphandle komshado.
Kwezinye izimo lezi zingxabano zize ziphelele ezinkantolo kusetshenziswe imali eshisiwe yabameli. Kuwulwazi olungeyona imfihlo ukuthi ikhona indlela yokuxazulula umbango wezingane engenazindleko ngeshwa abaningi boHlanga abanalo ulwazi ngayo.
Kunommeli oqashwe uMnyango Wezobulungiswa ofana nomele izingane embangweni futhi
obhekelele ukuxazulula le mibango obizwa ngeFamily Advocate osiza izinhlangothi ukuba zifinyelele esivumelwaneni embangweni wokuba ngumgcini wengane nokukwazi ukuyithola uma uyidinga.
Uma izinhlangothi ezithintekayo zingakwazi ukufinyelela esivumelwaneni, lo mmeli ubuka izimo zabazali ukubona okufanele ingane bese enza izincomo enkantolo maqondana nokugcinwa kwengane nelungelo lokuyibona.
Ummeli ukwenza kanjani lokhu?
Uma izinhlangothi sezifake isicelo, ube esenza uphenyo asizwe yilowo oluleka umndeni okungaba usonhlalakhle oqeqeshiwe, kufakwe abathintekayo imibuzo ukuthola izimo zabo nolwazi ngomsuka wodaba. Ummeli ube esepheka ingane noma izingane ngemibuzo ukuze nazo zithole ithuba lokulalelwa. Lokhu kwenzelwa ukugwema ukuthi ingane iye enkantolo.
Kubalulekile ukuba kucace ukuthi iFamily Advocate ayinalo ilungelo lokuba yingxenye yodaba oseluphothulwe enkantolo, ngeke yabizelwa enkantolo njengofakazi ukuyokwethula ubufakazi obeseka olunye uhlangothi noma ngabe izincomo zakhe ziyalweseka lolo hlangothi. Izincomo zakhe kuhloswe ngazo ukusiza inkantolo ekufinyeleleni esinqumweni ngodaba. Naso isincomo akuphoqelekile ukuba silandelwe ngaphandle uma siwumyalelo wenkantolo.
Lo mmeli uyisikhungo esingathathi hlangothi futhi ngeke asebenze njengommeli wolunye uhlangothi odabeni. Imibango exazululwa iFamily Advocate ayihlalelwa njengecala okusiza ababangayo ukuthi bangangeni ezindlekweni, bonge isikhathi futhi bangahlangabezani nezinselelo ngokwengqondo okuhambisana namacala asenkantolo.
Nokho izinhlangothi kungadingeka kwesinye isikhathi ukuba zikhokhele izindleko zongoti njengocwaningo lukadokotela wengqondo nokunye ukuxilongwa okusemthethweni okubalulekile ukuba kwenziwe ukuthola okufanele nokulungele ingane ethintekayo.
Okuhle ngokusebenzisa iFamily Advocate
Lo mmeli angachibiyela noma anqamule amalungelo obuzali nezivumelwano zokufanele umzali akwenze maqondana nokunakekeleka kwengane okubhaliswe yiHhovisi leFamily Advocate. La malungelo nezivumelwano okubhaliswe kuleli Hhovisi kunamandla ezomthetho afanayo nawomyalelo wenkantolo. Lokhu kusho ukuthi asikho isidingo sokuthi izinhlangothi ziye enkantolo uma zifuna ukuchibiyela isivumelwano uma kuqhamuka isidingo. Ngesikhathi kusaxhunywanwa, uma izinhlangothi zifinyelela esivumelwaneni udaba alube lusadlulela enkantolo.
Umthetho uphoqa izinkantolo noma izisebenzi zazo ukuba zibheke umbiko okanye izincomo zeFamily Advocate uma sezithatha izinqumo ngokufanele noma okulungele ingane.
Izinkantolo azinakukwazi nje ukuphasisa isicelo sesahlukaniso uma kuthinteka izingane ezisadinga ukunakekelwa zingawubhekanga umbiko noma izincomo zeFamily Advocate.
Kubalulekile ukukugcizelela ukuthi lo mmeli unika ingane ithuba lokubeka uvo lwayo odabeni lwesahlukaniso sabazali bayo. Njengoba sishilo ngenhla, lo mmeli akathathi hlangothi kodwa ubheka okuzosiza ingane. Ihhovisi leFamily Advocate alinaso isandla esiqinile njengenkantolo okwenza kubelula ezinganeni ukulisebenzisa kanti nommeli womndeni usebenzisa amaqhinqa athile ukusombulula umbango okunciphisa ukuklwebhana nokubhekana ngeziqu zamehlo kwababangayo.
Amhhovisi abammeli bomndeni akhona kuzona zonke izifundazwe eNingizimu Afrika kanti usizo lwabo lumahhala. - nguSabelo Mbatha