Umthwalo emahlombe kaLampard owokukhetha ngokuyikho
URoman Abramovich oyisikhulu seChelsea FC okungelinye lamaqembu amakhulu kubukeka ecuphele uFrank Lampard umgoga.
ULampard ongumqeqeshi waleli qembu uthengelwe abadlali abaseqophelweni eliphezulu okusho ukuthi akumele neze akhale uma izinto zimubhedela.
Kubadlali asayinelwe bona kubalwa uHakim Ziyech obegijima ku-Ajax Amasterdam yaseHolland, uBen Chilwell osuka kuLeicester City yase-England, uThiago Silva obedlala kuParis SaintGermain (PSG) yaseFrance noMaleng Sarr obekuNice eFrance. Abanye uTimo Werner osuka kuRed Bull Leipzig yaseGermany noKai Havert obekuBayer 04 Leverkusen nayo okungeyaseGermany.
ULampard uma sekumele akhethe iqembu uzophathwa ikhanda njengoba vele enabadlali okusongwe isizini besefomini eyisimanga. Kulabo badlali kubalwa uMason Mount, uChristian Pulisic, uTammy Abraham no-Olivier Giroud.
IChelsea FC njengoba iqinise isikwati sayo nje izobe ibhekiwe naku-UEFA Champions League kwazise iqede namaqembu amane aphezulu kulogi ngesizini edlule.
“Esikuzuze ngesizini edlule kukhulu kakhulu siyiqembu. Akekho obebheke ukuthi singaqeda sibalwa namaqembu amane kulogi kodwa kwenzekile. Sikwazile ukudlala umdlalo wamanqamu weFA Cup. Ukuthola laba badlali esinabo kungijabulise kakhulu kodwa futhi kungiphethe kabi. Okwenza ngisho kanjalo ukuthi kuzomele sibe sembangweni kuyona yonke imiqhudelwano kanye nakuligi imbala. U-Abrahamovic ungenzele konke mina okumele ngimenzele khona ukumlethela izinkomishi,” kusho uLampard.
ULampard uthe akafuni ukuba akhonjwe indlela njengo-Antonio Conte oseqeqesha i-Inter Milan yase-Italy.
“Ngesizini edlule singenelwe amagoli angama-50 okuyinto engeyinhle, kumele lelo phutha singaliphindi kulo nyaka. Mina nethimba lami sihlalile phansi sabuka amavidiyo emidlalo yangesizini edlule. Amaphutha siwabonile nakanjani kumele elungile,” kusho uLampard.
IChelsea FC eteketiswa ngokuthi iThe Blues njengoba ikhuza ibuya iligi ye-English Premier League (EPL) kule mpelasonto, yona iyoze idlale ngoMsombuluko lapho izotholana phezulu neBrighton & Hove Albion. Lo mdlalo uzobanjelwa eFalmer Stadium okuyinkundla yeBrighton.
Obunye ubuso okulindeleke ukuthi bubonakale ku-EPL obukaDonny van de Beek ozogijima kuManchester United esuka ku-Ajax Amasterdam, uJames Rodriguez osuka kuReal Madrid wajoyina i-Everton FC.
IManchester City obekubonakala izosayinisa uLionel Messi, izoqala ixhugela njengoba ezobe engekho u-Aymeric Laporte noRiyad Mahrez okutholakale ukuthi banokhuvethe.
Ompetha beligi iLiverpool FC akekho umdlali abamsayinile kulaba obekuvela ukuthi bayabafuna okunguThiago Alcantara weBayern Munich noKalidou Koulibaly weNapoli.
Ongoti baveza ukuthi kule sizini umbango uzoba mukhulu kakhulu phezulu, ngeke kwenzeke njengoba kwenzekile ngesizini edlule. Ngesizini edlule iLiverpool FC ithathe iligi ihamba phambili ngamaphuzu ali-18.
Khonamanjalo, kusukela namhlanje ngoLwesihlanu iyaqala iligi engaphansi kwe-EPL, i-English Championship.