Kwenyuswe eyoMalume
OMalume abazisoli ngokwenyusa ngendlela exakile imali ekhokhelwa izimoto ezithutha abafundi osekuqubule ukukhononda okukhulu kubazali bezingane abasebenzisa lezi zimoto.
Uma ungena kusizindalwebu soMnyango Wemisebenzi Yomphakathi kuchazwa ngohlelo i-Expanded Public Works Programme (EPWP) kuthiwa kuhloswe ngalo ukuzama ukuqeda ububha kube khona imali engenayo emzini nomuzi okwesikhashana, kuthuthukiswe amakhono. Ngokolwazi lwalo Mnyango lolu hlelo lusebenzisana neminye iminyango kaHulumeni kanti abasebenza beqashwe ngaphansi kwalo bahola amarandi ali-11 ngehora.
Kodwa izisebenzi ezingaphansi kwalolu hlelo eMnyangweni Wezokuthutha oLundi ezixhumane neBAYEDE ngeledlule zacela ukuba amagama azo angadalulwa, zithi zididekile azilazi usuku lwazo lokuhola.
Omunye walezi zisebenzi uthe: “Inkinga yethu asizazi sihola nini, lo osiphethe u…(emgagula ngengama) uma simbuza uhlezi esitshela ukuthi imali izongena. Uma isingenile kuba nenkinga ngoba asikwazi ukubona size sizwe ngabanye ukuthi isikhona.”
Uthe nawo amakhadi abahola ngawo bawanikwa umqashi abangazi noma nalokho kuwubugebengu yini.
Lesi sisebenzi siqhube sathi banikezwa amakhadi ebhange i-ABSA nenombolo eyimfihlo okuthe uma leli phephandaba lisibuza ukuthi lokhu okudalwanga yini ukuthi babengenawo amabhange abawasebenzisayo kwase kufika ozobabhalisa ukuze bakwazi ukuhola ebhange sithe: “Cha umphathi wethu wafika wasiyalela ukuthi bazosenzela bona amakhadi okuhola ngoba abanye bethu abazokuba nemali, uma sithi siyanqaba wagcizela ukuthi bazosenzela futhi afika sawathola.”
Lezi zisebenzi zithe zihola izi-R2 000 ngenyanga futhi zisebenza izinsuku ezili-12 enyangeni. Leli phephandaba lize lilandela lolu daba nje yingoba lezi zisebenzi bezikhononda ngokungaholi emasontweni amabili edlule kodwa okuthe kamuva zagcina ziyitholile imiholo yazo.
Zithe inselelo ezibhekene nayo nokuzilimaza emalini ngenxa yalesi simo ukuthi uma zibheka emshinini ukuthi isifakiwe yini imiholo yazo, imadlana esuke ikhona ekhadini iyadleka kanti ngesinye isikhathi kusuke kungekho lutho okugcina kuzishiya sezikweleta ibhange. “Sigcina sesibheka ngokuthi singene esitolo ngaphakathi senze sengathi sikhipha imali (cash back). Asifani nabantu abasebenzayo, bangcono nabesibonelelo sikaHulumeni ngoba bayazi ukuthi imali yabo ingena nini thina lutho,” kusho omunye walaba abakhalayo.
Omunye ukhale ngokuthi kula makhadi noma ama-akhawunti abawavulelwa abakwazi ukuthola izitatimende zasebhange. “Asikwazi nokuya ezitolo sihambise izitatimende zethu uma kukhona esifisa ukukuthenga,” usho kanje.
Baqhube bathi bafuna ukusebenzisa amabhange abo abazikhethela wona.
Lezi zisebenzi zikuqinisekisile ukuthi ngesikhathi ingxenye enkulu yezwe ibikumvalelwakhaya zona beziyithola iphelele imali yazo inkinga ukungabi nosuku oluqondile lokuhola.
“Inkinga ngale nto ukuthi awuzazi ukuthi ukudla kwasekhaya ukuthenga nini, asikwazi ngisho ukuhlela izinto zasekhaya ukuze nalo lihleleke, sizizwa sengathi uMnyango awusicabangeli, sidinga usizo ukuthi nathi sizizwe siyizisebenzi,” kusho omunye walezi zisebenzi.
Okhulumela uMnyango KwaZulu-Natal, uMnu uKwanele Ncalane uthe: “Udaba sisazoluphenya kodwa ngokwazi kwethu ezindaweni eziningi lolu hlelo luyimpumelelo. Siqashe intsha engaphezu kwezi-4000 isifundazwe sonke ukuze icijwe ngamakhono namathuba okwenza imsebenzi yokulungisa imgwaqo.”