Kusolwa iSadtu
Isiphinde yangena ekukhulumeni inyunyana yothisha njengoba isiphinde yasolwa ngokugxambukela ekuqashweni kothishanhloko ezikoleni.
Kuxabene ubendle phakathi kwabazali bezingane ezifunda ezikoleni zaseMsinga KwaZulu-Natal nenyunyana yothisha iSouth African Democratic Teachers Union (Sadtu) ngenxa yombango wokuqashwa kothishanhloko.
Lo mbango usudale ukuthi kwezinye izikole uhlelo lokwenza inhlolokhono luqalwe phansi ngoba kunomdonsiswano wokubanga amandla okuqasha.
Umbango omkhulu owokuthi iSadtu kuthiwa abaholi bayo bafika sebelawula ukuthi ubani okufanele aqashwe.
Omunye umzali womfundi waseKukhanya koMsinga, ocele ukungadalulwa, uthe abasazi ukuthi kufanele benze njani ngeSadtu ngoba bayibona igxambukela ohlelweni lokuqashwa kothishanhloko.
“Kunabaholi bale nyunyana okuyibo abangobhongoza ezikoleni zalapha eMsinga. Bathathu laba bafana ngakho uma kunesikole esidinga uthishanhloko yibo ababa phambili befuna ukuthi kuqashwe umuntu wabo. Ngikhuluma nje lapha eKukhanya koMsinga benze okufanayo kwathi abantu abebefake izicelo izimvilophi zabo azizange zivulwe kodwa ethathiwe yilena kathisha obefunwa yilaba bafana beSadtu . Siyilwile le ndaba kwaze kwaphoqa ukuba kuphinde kuqalwe phansi kukhangiwe kabusha isikhala. Inhlolokhono yenziwe kuleli sonto okwesibili nakhona asazi kuzogcinaphi ngoba konke kulawulwa iSadtu lapha. Thina singabazali sesiphenduka izichuse kungabi bikho osilalelayo. Kunothisa obebambe lesi sikhundla eKukhanya koMsinga. Uwenze kahle umsebenzi sagculiseka nathi singabazali ngoba isikole sisibona ukuthi siphethwe ngendlela efanele. Sekuthe uma sekufanele aqashwe iSadtu yafika nomunye umuntu wayo okunguye emdinga eqashiwe. Kusithusile lokhu ngoba sonke besibheke ukuthi lona obambile nguye ozothathwa kodwa inkinga kube yiSadtu ebisilande omunye uthisha ukuthi kube nguye ongena kulesi sikhala. Ingxenye eningi yezikole izobulawa iSadtu ngendlela enza ngayo izinto,” kusho lo mthombo.
Kwenzeka lokhu nje iSadtu ikeyakhonjwa ngenjumbane KwaZuluNatal isolwa ngokugxambukela ekuqashweni kothishomkhulu ezikoleni eziningi okungezaseThekwini nezasoGwini.
Lokhu kugcine sekudala ukuthi abanye othishomkhulu besule ngoba bebaleka abanye bebulawa.
Akugcinanga lapho kodwa izinsolo ziqhubekile nokuthe ngowezi-2015 uNgqongqoshe Wemfundo Eyisisekelo, uNkk u-Angie Motshekga, wajuba uphenyo olwaluholwa uDkt uJohn Volmink.
Lolu phenyo lwalumayelana nokugxambukela kweSadtu ezikoleni okuhlanganisa nokugwazisa abanye othisha uma befuna umsebenzi.
Kwaze kwaba nothisha owaphumela obala okunguMnu uNkonzwenhle Mqadi, ongasekho, owayefundisa esikoleni iSophie Phewa Primary.
UMqadi waveza ukuthi wayesefile ukuthi njalo uma kuphele inyanga akhokhele uthisha ababefundisa naye kulesi sikole imali eyinkulungwane.
Lowo thisha owayefundisa ibanga lesibili iSadtu kuthiwa yagcina imumisile ezinhlakeni zayo.
Ngaphandle kwalokho umbiko kaVolmink owawungamakhasi angama-285, waveza ukuthi yize kungekho ubufakazi obukhomba iSadtu ngqo kodwa othisha yibo ababezisholo bona bethi iSadtu iyathinteka ekugxambukeleni nanokudayisa izikhundla ngemali.
UNobhala weSadtu KwaZulu-Natal, uNks uNomarashiya Caluza, uthe inkinga ababhekene nayo ezindaweni zakoMsinga ukuthi abazali basuke bafake ipolitiki bese kugcina kungasebenzeki ngoba bayayizonda le nyunyana.
“Abazali bangapha koMsinga inkinga yabo bayayizonda iSadtu ngoba basayibuka ngeso lokuthi ukungenisa kwayo izofaka i-African National Congress njengoba sidlelana nayo. Yingakho ozakwethu bebanenkinga kuleya ndawo bezithola sebehlukumezeka. Okunye njengenyunyana umthetho useseka ngokugcwele ukuba sibe yingxenye yenhlolokhono uma kunothisha ozoqashwa ngakho akulona iphutha noma ukugxambukela ukuba amalungu eSadtu azibandakanye nalolo hlelo lokuqashwa kothishokhulu. Empeleni zonke izinyunyana zibayingxenye yenhlolokhono kuhlanganisa iNatu nezinye noMnyango ngoba umthetho ogunyaza lokho,” kusho uNks uCaluza.
Uqhube wathi enye inkinga ababhekene nayo eyokuthi abazali bakoMsinga ababafuni othisha bokuhamba bahlale belwa befuna kuqashwe umuntu wendawo.
Uthe yilezi zingqinamba ababhekene nazo neziholele ekutheni uhlelo lokuqashwa kothisha kwezinye izikole lugcine seluqala phansi njengoba ekuKhanya koMsinga kuqalwe phansi.
UNks uCaluza ubuye waveza nokuthi sekukaningi iSadtu isukelwa isolwa ngenkohlakalo eyamaniswa nokuqashwa kothisha kodwa okubajabulisayo ukuthi umbiko kaVolmink wabakhipha phambili.
“Ngisho uNgqongqoshe uMotshekga ePhalamende wakubeka kwacaca ukuthi abukho ubufakazi obukhomba iSadtu kuyona yonke inkohlakalo ebinukwa kuyo ikakhulukazi KwaZulu-Natal. Ngisho lo thisha okuthiwa wamiselwa izinsolo zale nkohlakalo eThekwini, wayengathinteki odabeni lokugwazisa ngezikhundla kodwa siyinyunyana samumisela ezinye izinto ezazithinta izinhlaka zeSadtu,” esho.
Okhulumela uMnyango KwaZuluNatal, uMnu uMuzi Mahlambi, uthe kulolu daba bazongenelela kodwa okuhleli obala ngalo ukuthi nabazali abekho msulwa.
“Uhlelo lokuqashwa kothisha kufanele lube ngolucacile nolungachemi kodwa uyabona lapha eMsinga ukuthi yize kusolwa inyunyana ngokugxambukela kodwa nabazali bayathinteka. Ngikusho lokhu ngoba abazali bafuna umuntu wabo kabalindanga ukuba kuhambe konke ngendlela kodwa sebevele banombono ukuthi ubani abafuna abe nguthishokhulu. Thina njengoMnyango sizongenelela siphenye, sithole nemininingwane kubaphathi behhovisi lesifunda lezeMfundo ukuze sikwazi ukubanolwazi ukuthi kwenzakalani,” kusho uMahlambi.