ISILO sesilahle wonke amadoda kaZulu ngecala
Usekhulumile Omdala, ayiwadle amathimboxo
Kukhona okuhle njalo uma ibubula iMbube. Umuntu lapha usuke azi ukuthi akuzonyanyalatwa kuzokhulunywa into njengoba injalo. Nangela mpelasonto esiphuma kuyo kube ngesifanayo lapho beyifayela nhlangothi zonke ekaBhusha. Ikhulume ngakho konke (bheka inkulumo ekhasini le-10) kepha lapho yenze abaningi babubula yilapho ethinte udaba lokuhlukunyezwa kodadewethu, omkethu, izintombi zethu nomama bethu. Omdala usilahle ngecala enkulumweni yakhe ebuza ukuthi aphi amadoda aKwaZulu?
Lo mbuzo kawulula ubuzwa ngubaba ekhaya ukuthi uhlupheka nje ziphi izinsizwa zakhe kangakanani uma osho kanjalo kuyiSILO sonke?
Kubuzwa lokhu ngoba nembala selibuswa yilabo iSILO esibabize ngamathimboxo, thina imisila isingachinsi. Mathimboxo ndini lawo sonke sizwa ngawo, omkethu bezwa ngawo ngenxa yokwesaba nathi ngobuvaka siyekelela elawo libe ngeligcinayo.
Sithi Zulu usekhulumile Ongangezwe Lakhe. Ayiphakame impi yokulwa nabadlwenguli kulo lonke leli leNdlovukazi uMthaniya. Alingafi ngathi, alingabuyi lilambatha eleSILO. Bona odadwethu bazothi bazalwa nabanjani abayeka badlwengulwe yizinswelaboya kuthulwe nje. Bona laba bantu bahlala kanjani phakathi kwethu khona lapha emakubo baphephile nje abantu noma ibachoboza ibachobozile imamba lena?
Okuhle Omdala akaqali ukukhuluma lokhu kepha ukushumayela njalo ekutheni kithi madoda ake kuvuke indoda le athi iya ngokuphuma kithi kusala inswelaboya.
Khona ziyothini izizukulwane zethu zizwa ukuthi ngesikhathi sethu izinswelaboya zazizenzela kuzimbali zesizwe sangenza lutho?
Umlando uyakusehlulela kabi uma singazange sisukume silwe nalesi sihlava ngisho Ongangezwe Lakhe esekhulume kangaka egxeka lokhu.
Njengezingane zomuzi, kuwumsebenzi wethu ukuvikela ikhaya lethu ngazozonke izindlela.
Impela asisihole iSILO kulokhu nathi silandele ngoba ayidingi politiki nje ingangathi. Kanjalo emphakathini, emaqenjini, emakomitini njalo njalo siyadinga ukuba silwe nalesi sihlava esenza neNkosi yethu izenyeze ngathi.
Sithi: ‘Hhomu hhomu SILO esikhulu! Sesingamane sithethe amacala.’