Baphawula ngeqembu likaMashaba elisanda kusungulwa
Mhleli
Uma umuntu ebatshazwa noma enconywa kakhulu ngabamhlophe ubokwazi ukuthi kukhona okungalungile ngaye, uyindlela yokubawelisa ukuyozuza lokhu abakufunayo.
Iqembu likaMashaba lifuna kuqedwe izinyunyana, izinkampani zikaHulumeni zizimele. kuhlakazwe isigaba somthetho wezokuzebenza kwenkampani iBBBEE ukuze kufezekiswe lokhu akubiza nge-Economic Prosperity.
Umbuzo uthi izinkampani ezizimele njengamanje ezobani?
Alukho oluphathekayo aluphathele aboHlanga uMashaba yingakho abelungu basuka inhlamvu bajoyina babona intuba yokufeza izinjongo zabo. Qaphela muntu omnyama.
- nguSiyanda Miya
Mhleli
Umuntu obehlala ezindaweni ezingaphansi kweJohannesburg Metro kusuka ngowezi-2016 kuya kowezi-2019 uyazi kahle imsebenzi yalo baba. Nangesikhathi esephuma imisebenzi ebiqhubeka eJohannesburg miningi kakhulu futhi abantu bakhona bayayithanda. Kodwa-ke umuntu ongawazi amagalelo akhe uzothi “uzokwenza muphi umehluko”. Ngisho kungabuzwa oMalema bayamazi ngoba basebenze naye ngaphansi kukaMasipala waseGoli.
- nguKhipheyakhe Khipha
Mhleli
Ake sizijwayeze ukuwashintshanisa amaqembu mhlawumbe kungenza bakhuthale bonke. Angazi ubani oyoguqula abantu bakithi bake bakhohlwe izijumbana zokudla nezibonelelo zikaHulumeni siguqule izinto. Iqembu silinika iminyaka emihlanu silibone, uma lenze kahle silinika eminye elandelayo kodwa kungadluli kwelishumi.
- nguNonkuthalo Dlamini
Mhleli
Wonke umuntu uma exakwa izimpi zepolitiki yakubo uvele asungule iqembu lakhe, lokho okunika i-ANC amandla. Kungani singabi namaqembu amathathu okuyokwenza le-ANC esisiphuze inyongo inqindeke amandla?
Inkinga enkulu esibhekene nayo eyokuthi wonke umuntu ufuna ukuphatha. UKhongolose usazobusa futhi abaholi bawo basazokwenza umathanda ngoba bayazi ukuthi okwamanje alikho inqembu eliyobaphazamisa.
- nguLucky Mncane Dube
Mhleli
Ukwanda kwamaqembu epolitiki angeke kusisize ngalutho kodwa sizolokhu siqhubekile nje nokuhlupheka, umuntu engingamuvotela ozoqhamuka nombono wokuthi njengoba amaqembu emangaka nje awahlangane sibe namabili noma amathathu ngoba ukuhamba kuvulwa izicagogwana zamaqembu kukhomba khona ukuthi wonke umuntu uzicabangela isisu sakhe hhayi izakhamuzi zaseNingizimu Afrika.
- nguDidimalang Mathaba
Mhleli
Izokwenza muphi umehluko kuzakhamuzi zaseNingizimu Afrika? Kade ebakhona amaqembu amasha kodwa izimpilo zabantu neqembu elibusayo akukho okushintshile. Usomathuba nje naye ozongena ePhalamende athule ngoba imali izobe isisephaketheni.
- nguDaliwonga David Duma
Mhleli
Ngiyayizwa yona le ndoda futhi amagalelo ayo angiwabukeli phansi, kodwa lena yokubuyiswa komhlaba bese beyanxeshezelwa abamhlophe angiyivumi kahle. Nabo nje abawuthathanga ngokusemthethweni lo mhlaba kungani kumele uthengwe uma usubuyiswa?
- nguCebolenkosi Zulu
Mhleli
Mina elami ivoti liya kule ndoda. Angisho ngoba ngidinwe izenzo zikaKhongolose kodwa ngathatha ithuba ngaphuma kuKhongolose lokulandela umfo kaMashaba esungula iPeople’s Dialogue khona akuwona umsebenzi olula ukuhola izwe lethu. Noma ungaba umholi onaka izidingo zabantu kodwa amankentshane ahlezi ekhona.
- nguMondli Cka Marazor Shoba
Mhleli
Mhla sathola ukuthi obani abalixhasi ngemali siyothola nokuthi lisungulwe ngobani ngoba kungenzeka ukuthi uMashaba abe ubuso balo bese kuthi ngemumva kube nongxiwankulu abalawula ukusebenza kwalo ngenxa yokuthi yibo abathela imali kulo.
- nguNdlovu Orkant Nkosenhle
Mhleli
Impela nami ngizoyinika ivoti lami le ndoda, impangele enhle ekhala igijima. Anginalo iqembu lami ngivotela iqembu kanye bese ngiyathula ngiyabheka ukuthi izethembiso lizozifeza na,uma lingazifezanga, ngivotela elinye ngokuzayo.
- nguSbusiso Kunene
Mhleli
Kunento engingayiqondi kula maqembu epolitiki esinawo evile ema-40 isibalo sawo. Nisho ukuthi ngempela amele abantu abampofu njengokusho kwawo? Nisho ukuthi wonke akukho nje avumelana ngakho wona anemibono ehlukene?
Kosisiza singaboHlanga ukuvula amehlo sibone ukuthi akukho qembu nanhlangano yepolitiki eyoke isize umuntu woHlanga futhi inkohlakalo le ezindelwayo kwezinye izinhlanga iyohlezi ikhona ngeke iphele nokuthi owoHlanga aphathwe njengento engelutho, ubuningi bala maqembu kuyakuvuna lokho.
Abamhlophe bancoma idemokhrasi yakuleli zwe bathi ivuthiwe besenza izilima. Uma kuwukuthi ivuthiwe njengoba besho, awaphele phela lawa amanye amaqembu kusale amaqembu amabili eNingizimu Afrika sibone ukuthi bangakuvuma yini lokho. Ngeke bakuvume ngoba abantu abamnyana abangabavoti bayiningi.
Into engenzeka ukuthi iningi lingagcwala eqenjini elilodwa laboHlanga okungenza ukuthi uma kuba iqembu elilodwa liholwa owoHlanga elinye liholwe umlungu kungaba aboHlanga bebhekene nabamhlophe okungenza ubumbano kwabamnyama bese kudlisa lubhojozi abamhlophe.
- nguAmun-Ra Heru Apis