Kuxabene ubendle ebuholini be-AIC eMatatiele
Isisho seziZulu esithi izinkunzi ezimbili azihlalelani esibayeni esisodwa sibukeka sifezeka enhlanganweni yezombusazwe i-African Independent Congress (AIC) njengoba abaholi ababili uMengameli weqembu nePhini lakhe uMnu uMandla Galo noMnu uLulama Ntshayisa sebefana nezinkunzi ezimbili ezithibelene esibayeni okuphazamisa inqubekela phambili yenhlangano.
Sekuneminyaka eyisi-8 ingahlali ingqungquthela yeqembu njengoba leyo eyayibanjelwe eKokstad mhla zingama-27 nama-28 kuMbasa wezi2018 yachithwa yiNkantolo Enkulu yaseMgungundlovu ngenxa yokuthi kwavela ukuthi kuningi okungahambanga kahle ngayo njengoba amanye amalungu ayengatshelwanga ngayo okusho ukuthi yabanjwa isinyenyela. Akekho ofuna ukwehlela ngezansi phakathi kwalaba uGalo kuthiwa uyindlovukayiphikiswa kanti uNtshayisa yena kuthiwa usebenzisa kakhulu isinqumo senkantolo esavuna yena esimenza acabange ukuthi kufanele kulalelwe yena. Lokho sekuholele ekutheni kungabi bikho ukusebenza ngokubambisana eqenjini esikhathini lapho bekufaneke ukuthi iqembu libumbene lilungiselela ukhetho lwangonyaka ozayo nokuthi bakwazi nokuya enkomfeni yeqembu njengoba sekuphele iminyaka engaphezulu kweyisikhombisa ingahlali inkomfa yeqembu.
Lokhu sekunomthelela ngisho nakubalandeli balo iqembu asebephelelwe ithemba lokuthi lisamile ezethembisweni elalizibekile okubalwa kuzo ukubuyiselwa kwedolobha laseMatatiele ngaphansi kwesifundazwe iKwaZulu-Natal nokuthi libe iqembu elikwazi ukubamba ngobhongwana i-African National Congress (ANC) ukuthi lifeze izethembiso la maqembu azenza omabili ngesikhathi enza isivumelwano sokusebenza ngokubambisana kwabanye omamsipala okubalwa kubo owaseKurhuleni, eRustenburg, uMkhanyakude neNelson Mandela Bay. Phakathi kwalezi zethembiso kwaba ukulungiswa komgwaqo ophakathi kwedolobha iMatatiele neLesotho ebikade esebenza ngokukhulu ukubambisana ekuthuthukisweni kwezomnotho njengoba nengxenye kagesi bewudonsa ku-Eskom waseMatatiele nokuthi kwakhiwe isikhungo semfundo ephakame sezolimo endaweni.
Kumanje laba bobabili bayakhombana ngezinkinga ezikhona ngaphakathi eqenjini kusolwa uNtshayisa ukuthi usola uGalo ngokuzama ukufaka iqembu endalini. Lokhu kubonakale ngoMsombuluko ngesikhathi uNtshayisa enqaba ukuba yingxenye yomhlangano weSigungu Esiphezulu se-AIC ebesibanjelwe eRoyal Hotel eMatatiele njengoba ebengaphandle kwamasango nezakhe. Uthe okudale angabi yingxenye yalowo mhlangano ngukuthi ubungekho emthethweni ngoba ububizwe uNobhala
Jikelele weqembu uMnu uMahlubi Jafta esikhundleni sokuthi ubizwe uyena njengoba amandla okubiza imihlangano yeSigungu Esiphezulu anikwa.
Uthe ebekwenza angabi ingxenye yomhlangano ukuthi bekusayindwa emnyango okusho ukuthi uma kunezinqumo ezithathweyo ubufakazi buzoveza ukuthi naye wayeyingxenye yawo yingakho enqume ukuthi yena nezakhe babe ngaphandle.
Ufunga uyagomela uthi uphinda enkantolo eyamvuna ngesikhathi ephikisana nemiphumela yenkomfa eyayibanjelwe eKokstad ngowezi-2018.
Ukhala ngokuthi uMnu uGalo usezinhlelweni zokufaka endalini iqembu lakhe njengoba wake wambuza ngaphambilini ukuthi uthini umuzwa wakhe uma ngokudayisa iqembu.
“UMnu uGalo usehamba encoma abaholi be-ANC ezinkundleni zokuxhumana ubabiza ngezinkokheli nokuthi abhale ngokwakhe ukuthi i-ANC uyayazi ukuthi iyikhaya lakhe, uma i-AIC ibinobuholi bangempela bekufanele ngabe ubhekene nokuqondiswa ubugwegwe ngalokho ngoba sekuyacaca umbaxambili, futhi akasenazo izifiso zokukhulisa iqembu kepha ubheke ibhidwe eliconsayo,” kusho uNtshayisa.
Uthe ngale kwalokho kazivumi ukunyamalala izindaba zokuthi uxhaswa ngemali yi-ANC kumvala umlomo njengoba nabanye bavuma kuthina ngesikhathi sibabuza ukuthi kukhona abamxhasa ngako uGalo.
“Kuthiwa wanikezwa izigidi ezimbili yi-ANC yize singenabo ubufakazi obuphathekayo ngalokho kangangoba njengoba ehlela ukudayisa iqembu nje kuthiwa kunemali engange zigidi ezine ebekiwe ekuzothengwa ngayo iqembu ngenhloso yokulibulala.”
Ucingo lukaMnu uGalo kaluphendulwanga ngesikhathi eshayelwa iBAYEDE nomqhafazo awuthunyelelwe kodwa uNobhala Jikelele weqembu uMnu uJafta ukuvumile ukuthi kunezinkunzi ezimbili esibayeni eqenjini.