KWEZINYE IZINGXENYE

Bakhale ngesiteleka

Babuyele emsebenzini izolo ngoLwesine abangcwabi ngemva kwesiteleka sabo esithathe izinsuku ezintathu. Lesi siteleka siqale ngoMsombuluko saze saphela ngoLwesithathu.

UMengameli weNational Funeral Practitioners Association of South Africa (Nafupa SA) uMnu uMuzi Hlengwa uthe ukusebenza kuqalile izolo. “NgoLwesithathu bekuwusuku lokugcina sibeke amathuluzi phansi, ukusebenza kuzoqala ngoLwesine (izolo)” kusho uHlengwa. Yize bekutelekiwe kodwa amanye amakhaza ebesebenza okungehlanga kahle kuHlengwa njengoba esho ukuthi wayecele ukuba wonke amakhaza avalwe.

Ukuteleka kushaye kakhulu kosomabhizinisi abangabangcwabi. Yize abanye bebezeseka izimfuno ezidale iziteleka, kodwa bakhale kakhulu kwazise kwenzeka lokhu nje izwe belibhekene nokuvalwa okwenzeka kusukela ngoNhlaba nonyaka kuqala ukusabalala ukhuvethe.

Umndeni uswele imali yokungcwaba

Kuze kube imanje umndeni wakwaNzimande usahlezi emakhandleleni njengoba ungakalingcwabi ilungu lawo. Lo mndeni waseSiyanda “A” kwaMashu, utshele leli phephandaba ukuthi uPhindile Nzimande obeneminyaka yobudala engama-28 wadlula emhlabeni mhla lulunye kwephezulu emva kokugula isikhathi eside.

Okwenza ukuthi angangcwatshwa ubengenawo umazisi, okwesibili abanayo imali yokuba bamngcwabe. “Kubuhlungu ukuthi kuze kube imanje udadewethu asimngcwabile kunzima nokuthi sidlulise ngoba asikambeki endaweni yakhe yokugcina, Sifisa udadewethu ukuba aphumule manje,” kusho uMandisa Nzimande.

UPhindile ushiye izingane ezintathu okubalwa nenenyanga eyodwa. Lo mndeni uthi uyaludinga usizo kwabangawusiza ukuze bangcwabe.

Kusabhekwe izithembiso zikaKaunda

Kuthiwa isifundazwe iKwaZuluNatal sihamba phambili ngezikhulu ezibandakanyeka enkohlakalweni yezizumbulu zemali. Kanti iTheku alipheli kwabezindaba kubikwa ngenkohlakalo eyenzeka khona.

Nyakenye mhla ziyisihlanu kuMandulo uMnu uMxolisi Kaunda eqokwa njengeMeya yeTheku emva kokwehla kowayeyiMeya uNkk uZandile KaMajola Gumede, enkulumeni yakhe yokuqala wakubeka kwacaca ukuthi uzolwa nenkohlakalo eyayidla lubi kuleli dolobha kodwa kuze kube yimanje ilokhu iqhubekile.

UKaunda uqeda unyaka esesihlalweni nje izinto ayethembise ukuthi uzolwa nazo kubukeka engathi uyahluleka ukuziqeda. Iyona inkohlakalo, ukuhlinzekwa kwabantu ngentuthuko kanye nokusimamisa umnotho futhi kuqiniswe nezokuphepha. Uma kuyiwa eThekwini mincane imigwaqo ehlanzekile, ezindaweni eziningi kunezigemegeme ezenza abantu bangaphephi okubalwa nokudlwengulwa kwezingane.

Kuhlalelwa olwezithuthuthu

UMphathiswa Wezempilo e-Eastern Cape uSindiswa Gomba uzovela phambi kweSigcawu Esiyisipesheli namuhla ngezinsolo zokungasetshenziswa kahle kwemali uMnyango wakhe ngesikhathi kuthengwa izithuthuthu ngemali eyizigidi ezili-R10.

Kuthiwa uMphathiswa uGomba, uNsumpa woMnyango uDkt uThobile Mbengashe, obhekele izimali uM Daca nenkampani iFabkomp (Pty) Ltd kulindeleke ukuthi bavele phambi kwalesi sigcawu. Ukuthengwa kwalezi zithuthuthu okwaqala kwathiwa zizosetshenziswa njengama-ambulensi kamuva kwajika ukukhuluma, kwasusa umsindo omkhulu emphakathini.

Intsha kaKongolose yeseka uLungisa

Lowo owayengumholi we-African National Congress Youth League (ANCYL) uMnu u-Andile Lungisa uqale ukudonsa isigwebo sakhe seminyaka emibili izolo. ULungisa uboshwe ejele lasePort Elizabeth, elibizwa ngokuthi iNorth End Prison. Lezi zindaba ziqinisekiswe abeNational Prosecuting Authority (NPA).

Isigwebo sakhe siqale ukubala kusukela izolo. Okhulumela iNPA e-Eastern Cape u-Anelisa Ngcakani uthe: “Singakuqinisekisa ukithi useqalile ukudonsa isigwebo sakhe uLungisa.” UThandi Mahambehlala oyilungu leANCYL uthe bazoqhubeka bemuseke uLungisa. “U-Andile ungomunye wethu sohlezi simuseka. Laba akade bengekho ukuzomuseka luzofika usuku labo. Sifuna azi ukuthi akayedwa, somuseka ngisho ekulezi zindonga akuzona manje” kusho uMahambehlala.

ULungisa uboshwa nje ingoba ulahlwe icala alenza ngonyaka wezi-2018 ngesikhathi eshaya ngengilazi ilungu lenhlangano ephikisayo iDemocratic Alliance (DA) uRana Kayser, emva kwengxabano eyenzeka emhlanganweni womkhandlu.