Kushuba isimo e-Ivory Coast ngenxa yehlandla lesithathu
UHulumeni kaMengameli u-Alassane Ouattara usuxhumane nabaphikisi bakhe abakhulu kanye nabaholi bezenkolo ukuthi bangenelele emizamweni yokunciphisa isimo esishubile leli lizwe elibhekene naso ngemuva kwesinqumo sakhe sokufuna ihlandla lesithathu okhethweni lwangenyanga ezayo.
U-Ouattara udlulise isicelo sakhe kubaholi bezenkolo ngesikhathi ehambele empumalanga yaleli lizwe ngesonto eledlule kanti omunye osebenza ehhovisi lakhe ukuqinisekisile ukuthi kube nezingxoxo ezingahlelekile phakathi kwakhe nabanye abaholi bezepolitiki.
Leli lizwe elihamba phambili ngokukhiqiza ucocoa, selibe neqwaba yemibhikisho enodlame eshiye abantu abali-10 beshonile kwathi abangaphezu kwekhulu balimala ngesikhathi ababhikishi bebhekene namaphoyisa selokho u-Ouattara amemezela ukuthi ugaqele ihlandla lesithathu.
Lolu khetho luthathwa njengesivivinyo esikhulu kunazo zonke okwamanje sozinzo kuleli lizwe kusukela ngempi yezakhamuzi eyaholela ekufeni kwabantu abayizi-3 000 kulandela ukhetho olwaluphikiswa ngonyaka wezi-2010 olwagcina lunqotshwe nguye u-Ouattara. U-Ouattara wahlela ukungenela ukhetho lwangoMfumfu ngemuva kokushona kungazelelwe kwaloyo ayemkhethe njengozothatha isikhundla sakhe, uNdunankulu u-Amadou Gon Coulibaly, ngenyanga kaNtulikazi.
Abaphikisana naye bathi umthethosisekelo uyamnqabela ukuba aphinde angenele ukhetho ngenxa yokuthi usewaphathile amahlandla amabili.
UNdunankulu uHamed Bakayoko kulindeleke ukuba ahlangane nabaholi bentsha yamaqembu aphikisayo ngesonto elizayo kudingidwe ngezindlela zokuzama ukumisa udlame kuleli lizwe ngaphambi kokhetho.
INkantolo Enkulu kuleli lizwe kuleli sonto ikhiphe isinqumo sokuthi u-Ouattara angalungenenela ukhetho lobumengameli kodwa umkhandlu womthethosisekelo uvimbele abanye abaphikisana naye ukuthi bangenele lolu khetho okubalwa phakathi kwabo owayenguMengameli uLaurent Gbagbo nalowo owayengumholi wamavukelambuso owagcina eseba nguNdunankulu uMnu uSoro Guillaume. Kodwa lo mkhandlu wakuvumela ukuthi lowo owayenguMengameli uMnu uHenri
Konan Bedie alungenele ukhetho kanye nowayenguNdunankuklu kaGbagbo uMnu uPascal Affi N’Guessan, kanye noMnu uKouadio Konan Bertin, owayeseqenjini iPDCI eliholwa nguMnu uBedie.
IKhomishini Yokhetho kuleli lizwe yathi umuntu owake walahlwa yicala ngaphambilini uzonqatshelwa ukuba angenele lolu khetho. UMnu uSoro unqatshelwe ukulungena ngenxa yokuthi wagwetshwa iminyaka engama-20 ebhadla ejele ngenyanga kaMbasa ngamacala okufihla kokuntshontshwa kwezimali zomphakathi kwathi uGbagbo yena wagwetshwa engekho isikhathi esiyiminyaka engama-20 mayelana nokuphangwa kwegatsha leCentral Bank of West African States ngesikhathi senhlekelele ngemuva kokhetho lwango wezi-2010.