Abemboni yezinkukhu bakuleli basovalweni
Besilindwe ngabomvu isimemezelo sikaMengameli weNingizimu Afrika, uMatamela Ramaphosa, sokwehlisa izinga lemvalelwakhaya ibe sezingeni lokuqala. Kwabaningi lokhu kusho ukubuyela ezindleleni zabo abebephila ngazo ngaphambi kokufika kokhuvethe emhlabeni. Sekwenzekile lokho, kwemukelwa ngezindlela ezahlukene ezinhleni ezahlukene. Ukugcizelele ukuthi kumele izakhamuzi zaleli lizwe ziyigcine yonke imigomo yokuphepha ezovimba ukuba libuye ngesivinini leli gciwane liqothe imbokodo nesisekelo.
Amabhizinisi abesethubeni elihle lokuvusa izindonga ezidilikile acoshe obesekuphunyukile ngenkathi kusavaliwe. Noma kunokujabula ngokuthi imingcele yezwe iyavuleka, lukhulu uvalo lokuthi akuzukubasiza kangako abakhiqiza izinkukhu. Okhulumela inhlangano iFair Play, uMnu uFrancois Baird, uzwakalise uvalo abanalo abalimi abafuye izinkukhu ngalokhu ukuthi amazwe aseYurophu, iBrazil kanye neUSA anezindodla zezinkukhu esezikade zahlatshwa, esezidlulelwe yisikhathi ezigcinwe emafrijini. Okuzokwenzeka wukuthi la mazwe adayisele amazwe asathuthuka okubalwa kuwo iNingizimu Afrika sakuzilahla ngamanani aphansi. Ukufika kwemikhiqizo eyilolu hlobo, engekho esimweni esigculisayo, abangenakuyidayisela abantu emazweni abo, kulimaza labo abafuye izinkukhu kuleli lizwe ngoba ezabo kumele bazidayise ngamanani asezingeni. Lezi esikhuluma ngazo eziqhamuka kula mazwe zisuke sezilahlwa, sengezidayiswa ngamanani aphansi.
Labo abemukela lezi zinkukhu kabazihluphi ngokucabangela abakhiqizi baseNingizimu Afrika. Into ehamba phambili kubo wukwenza inzuzo.
Lolu hlobo lokuhweba luyaphambana nemigomo yokwethembeka elawula amabhizinisi. Uma le nto ivunyelwa wumthetho wezwe, kunzima kakhulu ukulwa nayo nokuyivimba.
Le ndlela yokudayisa sakulahla izinkukhu kwamanye amazwe ibulala imboni yokukhiqiza yakulelo zwe ezilahlwa kulo, bese kulimala umnotho walo.
Umbiko weBureau for Food and Agricultural Policy wonyaka owedlule wezi-2019 uveza ukuthi, phakathi kweminyaka yezi-2000 nowezi-2010 imikhiqizo yezinkukhu ebeyisetshenziswa eNingizimu Afrika beyibalelwa kumathani ayizi-680 000, Ama-86% ale mikhiqizo beyivela kubakhiqizi bangaphakathi kuleli lizwe, bese kuthi ama-14% itholakale kwamanye amazwe. Kube nezinguquko ekusetshenzisweni kwemikhiqizo yezinkukhu kusukela onyakeni wezi2008 kuya kowezi-2017, lapho imikhiqizo yezinkukhu yenyuke ngamathani ayizi-380 000.
Ingwijikhwebu ibe sekutheni, ngalesi sikhathi imikhiqizo evela ngaphakathi eNingizimu Afrika yehle kakhulu yaba kumaphesenti angama-27 kuphela kanti evela kwamanye amazwe ifinyelele kuma-73%. Lesi simo sibalimaze kakhulu abakhiqizi bezinkukhu bakuleli lizwe.
Kube nesikhathi lapho ukusetshenziswa kwemikhiqizo yezinkukhu kwenyuke ngamaphesenti amabili kuleli zwe. Lokho akubavunanga abakhiqizi bakuleli lizwe kodwa kubonakale kwenyuka amaphesenti emikhiqizo evela emazweni ase-Europe nase-USA. Imbangela enkulu yokwenyuka kwezinga lokudliwa kwenkukhu wukugcizelela kwabezempilo ukuthi inyama yenkukhu inempilo kunaleyo ebomvu. Noma zingakhula izibalo zabadla imikhiqizo yezinkukhu akuyisizi imboni yezinkukhu yaleli zwe ngoba bancintisana namazwe athumela imikhiqizo ngamanani aphansi.
Okwenza isimo semboni yezinkukhu kuleli zwe sibe sibi wukuthi izwe lehlukene phakathi. Kunalabo abangabakhiqizi bezinkukhu abazithola bengaphansi kwengcindezi ngokungena kwemikhiqizo ebiza amanani aphansi kanti ngakolunye labo abasebhizinisini lezinkukhu abazithenga noma yikuphi ukuze benze imali sebehlangene bazibiza nge-Association of Meat Importers and Exporters (AMIE). Njengoba kuvuleka iminyango yokuhwebelana kwamazwe bamagange ukulanda imikhiqizo yenkukhu kunoma yiliphi izwe abazoyithola ngamanani aphansi ukuze benze inzuzo. Sebezihlele kahle balindele noma ngubani ozozama ukubavimba.
Imboni yokukhiqiza izinkukhu iyaxhugela kulesi sikhathi ngenxa zemikhiqizo evela kwamanye amazwe, efika kuleli zwe yemukelwe noma ngabe ayikho ezingeni elifanelekile. Uvalo olukhulu olukhungethe abafuyi bezinkukhu ngelokuthi njengoba kuvulwa emuva kokhuvethe lawa mazwe azoziletha ngobuningi bazo kuleli lizwe. Mhlawumbe imvalelwakhaya bekuyithuba lokubuyekeza izinto ezifuze lezi ezicindezela imboni yakuleli zwe yokukhiqiza izinkukhu. Sekuwumlando ukuthi kunezinkampani ezinkulu ebezifuya izinkukhu ezigcine zivalive kuleli zwe, abantu baphelelwa yimisebenzi bahlala emakhaya. Phakathi kwalezo zinkampani singabala abakwa Rainbow Chicken obekuyinkampani enezindlu zezinkukhu esabalele emathafeni amaningi ezindaweni ezizungeze indawo yaseMgungundlovu. Noma kungenzeka zibe khona ezinye izizathu ezenza abanikazi bale nkampani bavale, angingabazi ukuthi isizathu esiphezulu yileso sezindleko eziphezulu zokukhulisa izinkukhu, okwenza ibe phansi inzuzo eyenziwa ngabalimi abakulo mkhakha.
UBaird uchaze lesi senzo samazwe ase-Europe nelase-USA abaqageli ukuthi siyenzeka ngoba sekube yisikhalo sabalimi isikhathi esingaphezulu kweminyaka eyishumi.
Abafuyi bezinkukhu abancane abakwazi ukuncintisana nemikhiqizo ebiza amanani aphansi edayiselwe leli zwe sakuyilahla. Lesi senzo siwukuwedelela la mazwe, ikakhulukazi ase-Afrika okulahlwa kuwo lezi zinkukhu esezikade zahlala emafrijini, ezingasenakudayiselwa izakhamuzi zalawo mazwe.
Izwe iGhana lingelinye lapha e-Afrika imboni yokukhiqiza izinkukhu ekhahlamezeke kakhulu ngenxa yokuvunyelwa kwezinkukhu eziyilolu hlobo ukuba zingene kuleliya lizwe. Kuyinto eyaziwayo ukuthi iningi labathenga ukudla ezitolo, alibuzi imibuzo eminingi uma lifika amanani enyama ephansi. Amukho umuntu ofika esitolo abuze ukuthi inkukhu azoyithenga ikhiqizwe kuliphi izwe. Batshelana beze ngobuningi kuzothengwa leyo mikhiqizo kanti ngokwenza njalo badicilela phansi abakhiqizi bakuleli zwe futhi baziqedela bona amathuba emisebenzi ezweni labo.
Ayadingeka amasu aphuthumayo azovikela abakhiqizi bakuleli bangacindezelwa ngamanye amazwe angaqonde buhle ngaleli lizwe.