IThe Playhouse iyihlinzeke ngokwanele eyamagugu
Emasontweni amabili edlule kuboshwe amaciko abebhikisha eThekwini avala umgwaqo owuthelawayeka uN3 ohlanganisa iGoli neTheku ngoba ekhala ngendlala edalwe ukhuvethe futhi efuna uMengameli wezwe uMnu uCyril
Ramaphosa ukuba awavumele enze imicimbi.
Kusukela kwamenyezelwa imvalelwakhaya ngoNdasa nonyaka, ayibangabikho imicimbi ehlanganisa abantu abaningi okubalwa nayo eyamaciko. Lokhu kuphoqe izindawo eziningi ukuba zigcine sezihlela imicimbi okungaba eyasetheatre namakhonsathi ngezindlela zobuxhakaxhaka bobuchwepheshe.
Ngokufika kwalolu bhubhane, emhlabeni wonke kwehla ikhethini ematheatre amakhulu okwaphoqa ukuthi kuhlehliswe imidlalo yeshashalazi, ingqayi nemigidi.
ELondon nje kwavalwa amatheatre angama-25 kanti abangama-250 awase-United Kingdom. Phakathi kwezindawo ezidumile ezaphoqeleka ukuba zivale kubalwa iBroadway, iLondon Theatre, iRoyal Albert Hall, i-Old Vic neWest End.
Lapha eNingizimu Afrika, eState Theatre ePitoli kwamiswa imidlalo eyabe isihleliwe efana noShaka Zulu obhalwe uBongani Linda waqondiswa uMeshack Mavuso wodumo lokudlala indawo kaJavas kuYizo Yizo emdlalweni owashisa izikhotha kuthelevishini.
IPlayhouse Company yahlehlisa iSishaya Ingoma okwakufanele ibanjelwe eCurries Fountain lapho okwakulindeleke ukuba kuqhudelane amaqembu asina kudabuke imbadada kuncintiswana ngezitayela ezifana noMama Besigekle, uShameni, Ingoma Yezinsizwa, Ingoma Yezintombi, Ingoma Sekhuze, Indlamu noMzansi.
Kanti nomdlalo owawuqondaniswe nePhasika, iDurban Passion Play, nawo kwaphoqeleka ukuthi ungabe usaqhubeka. Abebelangazelele ukubona iHady The Creation, bahlanza ngedela imiswa ukukhonjiswa okwakuboshelwe kuyo ikhwaya, i-orchestra, abathathu abacula ngabodwana, ocula ibhesi isoprano nocula itena.
NaseGoli abaphathi beMarket Theatre bamemezela ukuthi yonke imidlalo izokuma kuze kube isimo sibuyela kwesejwayelekile. Phakathi kwezindawo ezasheshe zaqhamuka nesixazululo kulokhu iThe Playhouse Company ayisalanga ngaphandle njengoba kusukela ngoNtulikazi isebenzise izinkundla zokuxhumana ukusakaza imikhiqizo yayo emifushane okuhlanganisa izingxoxo ezakhayo zomphakathi, umculo nemidlalo yetheatre yezingane. Njengoba kuyiNyanga Yamagugu nje, iThe Playhouse Company iyaqhubeka nayo indlela ye-inthanethi ukuguba le nyanga ngemihlabahloso yemicimbi yokuthokozisa umphakathi ngezinhlelo zayo ezahlukene. Lesi sikhungo sithi lo mkhankaso waso we-inthanethi uthole ukwesekwa okukhulu njengoba bebalelwa ezi-10 000 abangene ekhasini laso likaFacebook bebuka esikusakazayo. Lokhu ithi kwenza njengenye yezindlela zokubhekana nezinselelo ezahlukene ezilethwe ukhuvethe emhlabeni jikelele. “Imidlalo yethu esiyenza nge-inthanethi ayigcini ngokuxhumanisa ababukeli neThe Playhouse Company kodwa iphinde igcine indima yezobuciko iphila ngokuthi kube khona okutholwa amaciko ngesikhathi semvalelwakhaya.”
Kule Nyanga Yamagugu lesi sikhungo sihlele imicimbi eminingi eqale zinhlanu kwephezelu lapho inkundla ivulwe yiciko uLu Dlamini oshaya umculo wesintu ophekezelwa umakhweyana okukubeke kwacaca ukuthi nebala isiqalile inyanga yokuzigqaja ngamagugu. Kulandele uSheila Khumalo zili-12 oshaya iJazz enenkosi phakathi ehambisana nebhendi yakhe okhumbuze abaningi ngezamzukwana. Njengoba ngeMigqibelo sekunciphile ukuhanjelwa kwemicimbi okubuswa kuyona ngezidlo neziphuzo, akungabazeki ukuthi kusasa baningi abazongena ku-inthanethi bazitike ngomculo kaKerry Cherry nebhendi yakhe ozobe usakazwa yiThe Playhouse Company. Kufuze ukuthi iningi lalaba kuzobe kungabesifazane kwazise lo mculi uzobe etusa ngengoma imbokodo yaseNingizimu Afrika engamavulandlela endimeni yomculo. Kulindeleke ukuthi adedele amanoni avutshelwe kuleli afana neMy African Dream ne-Umlilo okungangabazeki ukuthi uzovuselela labo imimoya yabo eyehliswe ukhuvethe.
Kwabaphuthwa yi-Annual Ingoma Competition asikho isidingo sokukhathazeka ngoba abashiywanga ngaphandle njengoba kuzophinde kusakazwe amanqampunqampu ayo eminyaka eyedlule. Lapha kuvuselelwa umuzwa wamagugu ngomculo nendlamu okwenziwa amaqembu ahlukene aphuma kuwo wonke amakhona esifundazwe iKwaZulu-Natal okuveza ukuceba kwesiko kwelikaMthaniya. Nabafuna ulwazi lwezendabuko bazohlomula esigcwawini songoti abazobe becobelela ngolwazi baphinde baxoxe ngezigaba zamasiko ezahlukene okuhlanganisa ukukhulelwa nokuzalwa kwengane, izigaba zokukhula kwengane nokuthi ulwazi lwendabuko lungalekelela kanjani ekuthuthukisweni komnotho we-Afrika.
Lesi sikhungo sizoyigoqa iNyanga Yamagugu ngomcimbi osezingeni eliphezulu ozohlanganisa abaculi bakuleli abangaconsi phansi uhlu lwabo oluzomenyezelwa maduze. Lokhu kuzokwenzeka ngoMgqibelo zingama-26.
Konke lokhu kuzobe kukhonjiswa mahhala kanti labo abangeke babe nalo ithuba lokubuka ngezinsuku okuzobe kwenzeka ngazo bangakwazi ukungena emakhasini ezinkundla zokuxhumana zeThe Playhouse Company.