Iphodikasti yelaboHlanga
“Leli phephandaba ngeke lime ukukumangaza,” lawa ngamagama omunye wabafundi abeqala ukulalela iziqephu zansuku zonke zomsakazo iBayede News notholakala ngePhodikasti. Lo mfundi ujoyine isibalo esikhula usuku nosuku sabalaleli bomsakazo welaboHlanga.
Echaza ngalo msakazo uSolwazi uHamilton Simelane oyi Chief Operation Officer ye-Igunundu neshicilela elaboHlanga uthe: “Sethule iZitudiyo ze-Igunundu Podcast (okuyizona ezakhe iBayede News Radio). Ngethimba nestudiyo sethu, sikhiqizela izimvezwa zethu namaphodikhasti afanele abalaleli bethu abalalela imisakazo
yomphakathi kuya kulabo abalalela imisakazo eyaziwayo. Ithimba lethu elikhiqizayo lakha izingxoxo ezivukuzayo ezihambisana nomgudu wokukhethwka kodaba kanye nezingxoxo ezidingakalayo kubalaleli abaqondiwe”, kusho uSolwazi.
Njengengxenye yezinhlelo ezifundisa izakhamuzi iBayede News Radio inoxhaxha lwezimvezwa namaphodikhasti. Kusukela ezindabeni nasezingxoxweni; kumadokhumentari nasekulandeni. Kuzo zonke izimvezwa namaphodikhasti abalaleli abathakaseli ubuntatheli obuhlabahlosile, amadokhumentari nokuhlaziya kuphela kodwa bafunda kabanzi ngolimi.
Kugxilwe kwezepolitiki nepolitiki yezomnotho, izincungeludaba, ezemfundo nezindaba ezishisayo, ezezimali nezamabhizinisi, konke kulandwa ingqikithi yakho. Izimvezwa zethu zihlose ukuqinisekisa ukuthola ulwazi, ukukhuthaza ubakhamuzi nokuzibandakanya ngale ngokhetho. Iphodikhasti ngayinye ithatha imizuzu engama-25 kuya kwengama-45 lapho izindaba zethu zakhiwe ngokwelamana okufanele futhi zethulwe ngendlela yokuthi yonke iminxa yomphakathi ingalalela, iqonde futhi ibe yingxenye yezethulo.
Ukuqinisekisa ukuthi okuqukethwe yile phodikhasti kufinyelela kubo bonke abantu, elaboHlanga selinokubambisana nemisakazo emibili yomphakathi, okuyi-Inanda FM kanye neNongoma FM. Echaza ngalokhu uSolwazi uSimelane uthe: “Le misakazo yomphakathi emibili siyayihlonipha kakhulu, ihlelekile. Kuwumbono wethu ukuthi ekubambisaneni kwethu sonke
sizozuza kepha okumqoka kakhulu wukuthi abafundi kanye nabalalelli nabo bazozuza okuningi. Izinhlelo zethu zizogxila ekufundiseni izakhamuzi ngepolitiki, umnotho kanye nesimomazwe.”
USolwazi uphethe ngokukhuluma ngamava ethimba labahlanganisa izinhlelo. “Ngaphandle kokuthi uMphathi welaboHlanga uMtaka uyazibambela, kepha kukhona abaqashelwe ukubheka umsebenzi wansuku zonke. Laba baholwa nguMnu uSandile Mdlalose. USandile ungunjiniyela wemisindo onolwazi lweminyaka eli-10 kuthelevishini nasemsakazweni. Uhlome ngezitifiketi zobunjiniyela bomsindo, esezifundo zezizindalwazi nethelevishini. Usephathe imisebenzi esemqoka yemisindo ezinkampanini ezifana no-Ukhozi FM, i-Urban Brew Studios, iRadio 702 neDSTV.”