Ukulahlwa yicala enkantolo akusho ukuphela komhlaba
Ukungena kwenkululeko eNingizimu Afrika kudale ukuthi abantu bawaqonde amalungelo abo futhi bayazi neminyango yezomthetho okumele bangene kuyo uma bedinga izimpendulo.
Kulezi zinsuku ukulahlwa yicala enkantolo akusasho ukuphela komhlaba ngoba usuyakwazi ukudlulisela phambili kwenye inkantolo okungenzeka iphume nesinqumo esehlukile. INkantolo YoMthethosisekelo iyona enamandla amakhulu futhi esikhathini esiningi abantu asebephephela kuyo uma kukhona lapho bengenelisekile khona ngezinqumo zezinkantolo ezingaphansi kwayo.
Lokhu kwabonakala kahle ngesikhathi le Nkantolo ikhipha isinqumo ngowayenguNgqongqoshe Wezokuthuthukiswa Komphakathi uNks uBathabile Dlamini ecaleni elalifakwe iBlack Sash neFreedom Under Law ngokungakhokhelwa ngesikhathi kwabantu imali yempesheni. UMehluleli uJohan Froneman wayalela uNks uDlamini ukuba akhokhele lezi zinhlangano ingxenye engamaphesenti angama-20 yemali yezindleko zecala ngokwesiqu sakhe angafaki phakathi uHulumeni.
UNks uDlamini, iSA Social Security Agency (Sassa) neSikhulu Esiphezulu sakhona babuye banxuswa ukuba bakhokhe izindleko ezingama-80% zecala.
Le Nkantolo yabuye yayalela uMqondisi Wezokushushiswa Komphakathi ukuba athathe isinqumo ngokuthi uNks uDlamini angabekwa yini icala ngokuqamba amanga engaphansi kwesifungo. Ukuba namandla amakhulu kweNkantolo YoMthethosisekelo kwadalwa isigaba sokuchitshiyelwa koMthethosisekelo esibizwa ngokuthi Ukuchitshiyelwa KoMthethosisekelo kwe-17. Abawulandelayo umthetho bazokhumbula ukuthi emuva kwesichibiyelo lesi sigaba sibe sesinika amandla iNkantolo YoMthethosisekelo ukuba ivumeleke ukucubungulisisa amanye amacala adluliselwa kuyo njengalo elikaNks uDlamini nezikhulu zakwaSassa. Lokhu kuchaza ukuthi le Nkantolo yabe isikwazi nokuthatha nezinqumo ngokushesha ngaphandle kokunqunyelwa isikhathi.
ISigatshana 167 (3) soMthethosisekelo kuthe emuva kokuba sekwenziwe isichibiyelo kusukela ngoMandulo wezilulunye 2013 izinto zaguquka njengoba lo Mthetho usuthi iNkantolo YoMthethosisekelo iyiNkantolo eNkulu ezweni. Iyona le Nkantolo enamandla okukhipha izinqumo ezindabeni ezithinta uMthethosisekelo nanoma yiziphi izindaba inqobo nje uma iNkantolo YoMthethosisekelo iqoma ukuludlulisela phambili udaba ngoba kukhona lapho ingazwisisi kahle khona. Iyona enamandla okukhipha isinqumo esiwujuqu sokuthi ngabe udaba lolo, lungena ngaphansi kwayo noma cha.
Isibonelo ecaleni likaNgcobo J wenkampani iLufuno Mphaphuli and Associates no-Andrew nabanye lowezi-2009 kusuka emshweni wama-293 kuya kowama-299 lapho kudingidwa khona ngobudlelwano phakathi kweNkantolo Yokwedlulisela
Amacala neNkantolo YoMthethosisekelo ngaphambi kokuba kwenziwe isichibiyelo, Ukuchitshiyelwa KoMthethosisekelo kwe-17 yowe-1996, kwahlaluka ukuthi iNkantolo YoMthethosisekelo akuyona nje inkantolo ejwayelekile kodwa ineqhaza elibalulekile elibambayo ezindabeni ezithinta uMthethosisekelo, hhayi noma yiziphi izindaba.
Nakuba kunjalo isichibiyelo Ukuchitshiyelwa KoMthethosisekelo kwe17 sakuguqula lokho ngenxa yokungenelela kwePhalamende. Udaba lwecala likaNgcobo J nabanye kwacaca ukuthi kwakuwudaba okwakungenasidingo sokuthi lwalungaze ludluliselwe eNkantolo YoMthethosisekelo kodwa lwalungadingidwa luphele nakwezinye izinkantolo. - nguSabelo Mbatha