Sibuka indlela kasomankomane uMoruti Mthalane yeminyaka
Iwumhlane wengwenya, imazombezombe, inezinyembezi zenjabulo nezendumalo inyathuko kaMoruti esibhakeleni
Kuxubene izigemegeme ezinhle nezimbi eminyakeni yakhe engama-20 engusomankomane esigabeni esikhokhelwayo.
Loyo nguMoruti “Baby Face” Mthalane (osesithombeni). Lo somankomane oneminyaka yobudala engama-38 ube nengxoxo ekhethekile nelaboHlanga.
Ekhuluma naleli phephandaba uMthalane owazalelwa eLotheni, eMpendle, uthe lo mdlalo wawuqala esamncane kakhulu.
“Ukuba ngusomankomane ngakuqala sakudlala ngimncane, ngeke ngaqamba amanga ngithi kwakuwumdlalo engangifisa ukuwudlala. Ngangiwumuntu odlala unobhutshuzwayo njengabafana abaningi kodwa abafowethu abadala yibona abangenza ngize ngiqale ngiwudlale kwazise bona babevele kade bawuqala. Ngathi nami angibajoyine, ekuwudlaleni ngazilolonga kwaze kwaba ukuthi ngiwuzwa egazini kanti nabantu abasemaceleni ikhono bayalibona kimina,” kubeka uMthalane.
Uqala lo mdlalo esigabeni samaamesha nje kwakuwunyaka we-1995 lapho wayeneminyaka yobudala eli-13. Kusukela lapho akabange esabheka emumva njengoba ngonyaka wezi-2000 wabe esenyukela esigabeni esikhokhelayo eneminyaka yobudala eli-18.
Empini yakhe yokuqala esigabeni esikhokhelayo wabhekana noWiseman Mnguni eThe Arena, eThekwini mhla zili-10 kuZibandlela ngonyaka wezi-2000. Sekuwumlando ukuthi le mpi wayinqoba kalula ngomlalisaphansi, iKO.
ElaboHlanga limbuza ngobuhlungu obukhulu aseke abuzwa esekulo mdlalo uthe: “Ngaba ngumpetha we-International Boxing Federation (IBF) Flyweight kusukela ngonyaka wezi-2009 kuya kowezi-2013, ngingayitholi impi yokuba ngivikele ibhande lami. Kwaba buhlungu ukuthi ngize ngiphucwe lona etafuleni. Imizwa yalokhu kuze kube imanje uma ngicabanga ngayo ingifikisela izinyembezi.”
Yize kwamphula umoya ukuphucwa ibhande lakhe etafuleni, lokho akumthenanga amandla njengoba aqhubeka walwa futhi enza kahle ezimpini zakhe. Njengoba kwathi ngonyaka wezi-2018 kuwuNtulikazi wakwazi ukubuyisa ibhande lakhe ngesikhathi ebhekene noMohamed
Waseen ongusomankomane odabuka ePakistan. Le mpi yayibanjelwe e-Axiata Arena, eKuala Lumpur, eMalaysia.
“Le mpi yami noWaseen iyona engingangabazi ukuthi ayikho efana nayo kweseke ngazilwa kule minyaka engama-20. Baningi abantu abase bethi kuphelile ngami ngeke ngiphinde ngibe umpetha kodwa akwenzekanga ngokwezifiso zabo njengoba nganqoba ngatshengisa ukuthi ngaphucwa kungafanele ibhande ngonyaka wezi-2013. Nginqoba nje kwakuyimpi yami yokuqala ngilwela ngaphandle kwaseNingizimu Afrika,” kusho uMthalane.
Ngokomlando ezimpini aseke azilwa zingama-41, wanqoba ezingama-39 ezingama-26 wazinqoba ngeKO induku useke wayithola ezimpini ezimbili. Ezimpini ahlulwa kuzona wahlulwa ngeKO kweyokuqala ngonyaka wezi-2004 wahlulwa uNqubela Gwazela empini eyayibanjelwe eGraceland Hotel Casino, eSecunda, kweyesibili wahlulwa uNonito Donaire ngonyaka wezi-2008 ayetholene naye eMandalay Bay Center, eNevanda.
Impi agcine ukuyilwa ibi mhla zingama-23 kuZibandlela nyakenye lapho ayebhekene khona no-Akira Yaegashi waseJapan, wamginqa emzuliswaneni wesi-9. Le mpi yayibajelwe eYokohama Arena, eJapan.
Nyakenye emncintiswaneni weSouth African Sports Awards unqobe umklomelo weSportman of the Year, lapho ayeqokwe khona no-Andrew Birkett osenqobe umjaho weDusi kayisi-9 kanye noChad le Clos osenqobele iNingizimu Africa izindondo zegolide eziningi kwezokubhukuda.
UMthalane uthe iwona mklomelo omkhulu aseke wahlonishwa ngawo.
ElaboHlanga limbuza ukuthi ngabe ukhuvethe alumphazamisanga yini ezinhlelweni zakhe nokuthi kuliqiniso kangakanani ukuthi kungenzeke avikele ibhande lakhe ngoZibandlela uthe: “Leli gciwane liphazamise wonke umuntu. Ngikhuluma nje kulo nyaka angikaze ngilibhade eringini. Kufuze engabe ngilwile kabili noma kathathu. Kodwa kuyisimo ebesiphoqa ngoba bekwenzelwa ukuba siphephe kuleli gciwane elidlule nemiphefumulo eminingi emhlabeni wonke. Ikhona impi ehlelwa abaphathi bami kodwa anginayo imininingwane ephelele ngayo engikwaziyo ukuthi kungenzeka ibe ngawo uZibandlela.”
Ngokusho kwakhe u“Baby Face” ukhule ebukela kusomankomane ongasekho Jacob “Baby Jake” Matlala ngoba wayemfushane abantu babemthatha kancane kodwa anqobe. Naye uMthalane mfushane athi kwenza osomankomane bazitshele ukuthi bazozidlela amahlanga kuyena. Uthi yize ayengajwayelene kakhulu noMatlala kodwa ukudlula kwakhe emhlabeni kwamshaya kakhulu ngoba kuningi ayekufunda kuyena.
Lo somankomane osezinze eGoli ubuye aqeqeshe abantu bazo zonke izinhlanga futhi beminyaka yobudala eyahlukene ukuze bahlale bewumqemane.
Ephetha uthe: “Uma ubheka indlela esasiyisona isibhakela ngeminyaka yangowezi-2000 kuya kowezi-2006, ngoLwesihlanu kwakuba nezimpi ezinkulu ezazenza abantu lo mdlalo bawuthande kakhulu kodwa manje izinga lehlile sekuvele kuthiwa kunempi ubone idlanzana lababukeli. Ngiyafisa ukuthi kubuye izinsuku zakudala kulo mdlalo. Ngibonga kubona bonke abangisekayo ezikhathini ezinzima nezinhle, ngiyathembisa ngisazoliphatha ibhande”.
NgoLwesibili kuvele ukuthi uWaseem uyafisa ukuba athole impinda kuMthalane, ubona okwenzeka ngowezi-2018 kwaba iphutha ekutheni amuhlwithe ibhande.
“Kusukela angiphuca ibhande ngangifuna impinda kodwa ngingayitholi, lokho okungitshela ukuthi akafuni ukulwa nami. Kodwa kubukeka engathi kuzomphoqa ukuba alwe nami okungenani uzonikezela ngalo ibhande njengoba enza eminyakeni edlule. Ngisafuna ukuchitha izinyanga ngizilolonga ngaphambi kokuba ngibuyele eringini kodwa ngiyayifuna impinda,” kusho uWaseem.