Ufike lapho seziqala zindiza iZinyoni uChagi
Kuyinto angasoze ayikhohlwa emlandweni wakhe kunobhutshuzwayo ukuba yingxenye yalabo abaqophe umlando ekutheni babuyisele iMoroka Swallows (Swallows FC) kuligi enkulu yakuleli.
Lowo nguMbonisi Chagi ojoyine iZinyoni nyakenye. Ibuya iSwallows nje ngesikhathi idliwa izembe ngesizini yangowezi-2016/2017 kuNational First Division (NFD) esibizwa ngeGladAfrica Championship isiya ku-ABC Motsepe League, baningi abasebethi ngeke iphinde ibuye ebholeni elikhokhelayo.
Konke lokho sekuwumlando njengoba yathenga amaphepha kuMaccabi FC ayeyinika igunya lokudlala kuGladAfrica Championship kwaze kwaba ukuthi inyukela kuligi enkulu kuleli.
“Konke lokhu kumina ngathi kuli phupho, lo mlando engibe yingxenye yawo ngicabanga ukuthi uyongivulela iminyango eminingi kunobhutshuzwayo. Ngijabula kakhulu ukuthi iqembu elibalwa namakhulu kuleli libuyele kuligi enkulu lapha eNingizimu Afrika,” kusho uChagi.
Le nsizwa eteketiswa ngokuthi uBhasera yazalelwa e-Eastern Cape, eBizana, ineminyaka yobudala engama-23. Ikhulele eMayville, eThekwini, yafunda eNsimbini Primary School naseWiggins Secondary School ngaseMayville.
Ngokusho kwakhe uthi wawuqala unobhutshuzwayo eneminyaka yobudala eyisi-7 nalapho ayedlalela iPJ Stars okuyiqembu lakhona eMayville.
Ekuhambeni kweminyaka wabe esezama inhlanhla eqenjini labaneminyaka eli-17 leLamontville Golden Arrows, ngokuzimisela kwakhe nangekhono analo yabe isimthatha.
“Ukuthola ithuba lokudlala kuArrows kwaletha inhlansi yethemba kimina ukuthi ngizophumelela. Baningi abadlali ababezama kodwa behluleka kuyona kodwa mina ngalithola ithuba, lokho kwangigqugquzela ekutheni ngisebenze ngokuzikhandla,” kusho uChagi odlala emumva kwesobunxele.
Emva kwalokho ube esejoyina iSpears FC okuyiqembu eligijima kuABC Motsepe League e-Eastern Cape wangahlala isikhathi eside wabe esejoyina i-Acornbush United edlala ku-ABC Motsepe League eMpumalanga.
Nyakenye ube esethola ithuba lokuba abe ngabanye babadlali abahlolwa iZinyoni, wabe esethola inkontileka yokuqala ebholeni elisesigabeni esiphezulu.
Efika kuSwallows ibisidlale imidlalo emithathu, owakhe wokuqala babebhekene neRoyal Eagles edliwe izembe. Udlale imidlalo eyisi-6 eyiqala wangena eqhamuka ngaphandle kowodwa.
ISwallows eqeqeshwa uBrandon Truter inyukela kuligi ebibizwa ngeAbsa Premiership nje ibigabe ngabadlali abanamava lapho kubalwa uLebohang “Cheese Boy” Mokoena ongukapuetni owazakhela udumo ku-Orlando Pirates, uVuyo Mere owadlalela kakhulu iPlatinum Stars, uTsapelo Tsilo owayegijima kuJomo Cosmos, uVirgil Vries ovimbele iMaritburg United neKaizer Chiefs, kube uPhumelele Bhengu eminyakeni edlule owadlala kuyona iSwallows.
ElaboHlanga libuza uBhasera ngokuthi ngabe kukhona yini akufundile kusizini yakhe yokuqala ebholeni elikhokhelayo edlala nabadlali abanamava uthe: “Ngasayina kuSwallows kanyekanye noMere, kusukela lapho ubehlezi engigqugquzela ekutheni ngenze kahle enkundleni. Laba badlali abadala baklame indima enkulu kithina, bebesiseka ngaso sonke isikhathi besikhuthaza. Uma ubheka bonke abadlali bethu abancane batshengisa ukukhula ngendlela eyisimanga lokho kungenxa yalaba badlali abanamava.” Lo mdlalo othi ubukela kuThami Mkhize odlalela iCape Town City esonga, uthe isifiso sakhe ukuba athole ithuba lokuzibonakalisa ngesizini ezayo, ngelinye ilanga adlalele iqembu lesizwe.