Izintatheli seziwumhlatshelo embangweni wamazwe
IChina ithathwa njengelinye lamazwe okungelula ukuthi abezindaba basebenze kulo ngokukhululeka ngenxa yemithetho eqinile. Kodwa i-Australia ne-United States of America (USA), okungamazwe azigqaja ngokuba nentando yeningi, nawo asekhombisile kamumva nje ukuthi alihlonishwa ngokugcwele ilungelo lokusebenza ngokukhululeka labezindaba.
Womathathu la mazwe asesebenzise izintatheli ukulwa imibango yawo njengoba ubudlwelwano bezepolitiki buya buntenga. Kusanda kubanjwa intatheli yase-Australia nesebenzela inhlangano yezindaba zethelevishini yaseChina uCheng Lei. UCheng unyamalale eChina ngenyanga edlule ngaphansi kwezinsolo zokubeka engcupheni ukuphepha kwezwe.
Omkhaya bakhe uCheng ababili uBill Birtles noMichael Smith - bona kudingeke baphume ngesamagundwane emveni kokwexwayiswa uHulumeni waseAustralia ngokushuba kwesimo phakathi kweCanberrra neBeijing. Bobabili basebenzela izinkampani zezindaba zaseAustralia. Konke lokhu kusolakala ukuthi kuyisenzo sokuziphindiselela kweBeijing emveni kokuphenywa kwezintatheli zaseChina ezizinze e-Australia ngoNhlangulana. Ngeledlule, iChina isole i-Australia ngokuba nesihluku ngenkathi izikhulu zakhona zigasela lapho kuhlala khona izintatheli zaseChina.
Okhulumela uMnyango Wezangaphandle eChina, uZhao Lijian, uthe iziphathimandla zase-Australia zihlohle ngemibuzo izintatheli ezine ezisebenzela inhlangano yezindaba engaphansi kombuso yaseChina. UZhao uthe kugaselwe ezindlini zalezi zintatheli ngaphansi kwezinsolo zokuthi zephule umthetho ophathelene nokugxambukela kwabangaphandle ezindabeni zaseAustralia. Zozine lezi zintatheli sezibuyele eChina.
“Uhlangothi lwase-Australia belungakayikhiphi incazelo yokuphenya izintatheli zethu kanti futhi bezingakabuyiswa nezimpahla ezashaqwa,” kusho uZhao.
Khathi kugaselwa ezindlini zezintatheli zaseChina e-Australia kwathathwa omakhalekhukhwini, amakhompyutha omsebenzi kanye nezinye izinto. UZhao unxuse i-Australia ukuthi iyeke lokhu akuchaze njengobulwane kanye nezenzo ezingenangqondo. Sekuyisikhathi manje iCanberra neBeijing benokungaboni ngasolinye nokudalwa izinsolo zokuthi iChina izama ukwandisa umthelela nezimfundiso zayo e-Australia. Elinye izwe elidonsisana neChina i-USA, nalapho nakhona izintatheli sezithole khona amachaphazelo.
Kamumva nje izintatheli zase-USA ezizinze eChina kubikwa ukuthi zibhekene nengwadla yokungalulelwa ama-visa okusebenza kuleli lizwe njengoba buya ngokuya buzika ubudlelwano bala mazwe.
UMnyango Wezangaphandle eChina uthe usaphezu kwazo izinhlelo zokubheka izicelo zalezi zintatheli nezisebenzela izinkampani zezindaba ezehlukene zaseUSA.
INhloko yezokuxhumana emnyangweni, uHua Chunying, ibhale kuTwitter ithi izintatheli zeCNN zingaqhubeka zihlale eChina ngaphandle kwenkinga ngesikhathi kusacutshungulwa izicelo zamaVisa azo. Uqhubeke wathi bangathanda ukuqhubeka nokubambisana kahle nezintatheli zase-USA uma ezaseChina ziphathwa ngendlela efanele. NgoNdasa, inqwaba yezintatheli zase-USA yaphoqeleka ukuthi iyifulathele iChina ngenxa yokungaboni ngasolinye phakathi kweWashington neBeijing.
IChina yabe iziphindiselela emva kokuthi i-USA inciphise isibalo sezintatheli zaseChina ezinikwa imvume yokusebenza nezisebenzela izinkampani zezindaba ezingaphansi kombuso. Zilinganiselwa ema-60 izintatheli zaseChina okwaphoqeleka ukuthi zihambe e-USA. Kanti kubikwa ukuthi zilinganiselwa e-17 izintatheli ezixoshiwe eChina esigamini sokuqala sonyaka.