Kuvulwa liphi lona, ebelisavaliwe yini?
Kuphelile ukuqagela uMfo kaSamuel useyikhumulile ejokeni lokuvalelwa
Emveni kwesikhathi eside kulindelwe uMfo kaSamuel ukuba amemezele ukwehliselwa kwezwe esigabeni sokuqala semvalelwakhaya, nebala ngoLwesithathu ukuqedile ukuqagela walehlisa. Baningi abebemagange ngalesi simemezelo sikaMengameli ngoba besisho ‘ukuvuleka’ kwezwe kugeleze nomnotho. Awu amaciko lezi zindaba zehle kamnandi ngoba kade ekhala kuthangi lokhu.
Kanjalo nalaba abafuna ukuvakashela kwamanye amazwe ngesifanayo, kwazise unyawo bese lubaba befuna ukuvakasha bandizele kwamanye amazwe. Kuyamangaza nokho ukuthi bekusenenkulumo ‘yokuvula’ izwe. Uma uhamba lapha phandle izwe livulekile. Ngaphandle kokuthi uHulumeni yena qobo waphasisa ukuba abantu basuke kwenziye izifundazwe, abantu nje sebehamba sengathi akukaze kwenzeke lutho.
Yishwa nje ukuthi phezu kwemizamo emingaka kepha kukhona ubungozi bokuthi ubudedengu kithi sonke bungenza isiqhwaga esilukhuvethe sibuye ngesankahlu.
Njengoba ‘selivuliwe’ nje nesibalo sabavunyelwe ukuhambela imicimbi sesenyusiwe, siyothokoza ukuzwa ukuthi izinhlelo zokuphila esimweni osekuphoqe ukuba sisijwayele ngale kokhuvethe khona zizohamba kanjani.
Phela yiningi imali esichithiwe nempilo esilahlekile ngenxa yalolu khuvethe, uma singehlisa izihlangu ingahle ikhale enhlafunweni kuphele ngathi.