Imithetho yokhuvethe emacaleni ezisebenzi
Ngalesi sikhathi sokhuvethe izingxoxo zokuxazulula ezimayelana nokudilizwa kwezisebenzi eziningi kufanele zenziwe ngobuxhakaxhaka noma zenzelwa endaweni ehlelwe ngumqashi ehambisana nezimiso zokuphepha.
Amanye amacala nezicelo ezenziwa ngamaphepha kuthethwa ngezincingo, ngevidiyo noma ngobuxhakaxhaka. Nezinqumo ezikhishwa nguKhomishana nazo zithunyelwa kanjalo. Ubufakazi bokuthi amaphepha ecala afakiwe ngesikhathi esinqunyiwe nakho sekwenziwa ngezincingo, ngama imeyili nangendlela ebonwa nguKhomishana.
Ongakwazi ukufinyelela noma ukusebenzisa lobu buchwepheshe bethekhinoloji kufanele akubike lokho bese kuba ngumphathi wakwaCCMA oyolawula indlela azoyisebenzisa kulelo cala noma isicelo. Ukuthethwa kwamacala sekufanele kwandulelwe wumhlangano wezinhlangothi olawulwa uMthetho Wenqubo uNombolo 20 lapho kufanele zixoxisane zivumelane ngazo zonke izihloko ezibekiwe. Okubalulekile kulezo zihloko ukuthethwa kwecala ngevidiyo, kungahlangenwe bukhoma, ukwamukela ubufakazi bezitatimende ezifungelwe, yizikhathi zokufaka izitatimende namaphepha ecala. Amaminithi alo mhlangano kumele afakwe kwaCCMA esikhathini esibekiwe ngaphambi kosuku lwecala.
Ukuthethwa kwecala-ke uma kuvunyelwene noma uma kwenzeka, sekuyaye kwenziwe ngobuxhakaxhaka. Uma kufanele kuhlanganwe, lokho kwenzelwa endaweni ehlelwe kwaqikelelwa ukuphepha okubasemahovisi akwaCCMA noma endaweni yomqashi ephephile. Sincishisiwe isibalo sabantu abaya emacaleni okuphoqeleka ukuba aqhutshwe emahovisini akwaCCMA bukhoma. Kuya ngendawo elithethelwa kuyo, isibalo kasedluli kwabali-10 futhi kuqikelelwa nokugqagqana kwabantu. Konke ukuxhumana noCCMA kufanele kwenziwe ngezincingo, ngama-imeyili nokunye kwethekhinoloji. Uma kunesidingo sokuletha amaphepha bukhoma lokho kufanele kuhlelwe nabaphathi beCCMA.
Kunemibandela nemigomo okulandelwayo uma sekuthethwa icala ngevidiyo noma ngocingo. Lokho kuxuba ukuvala izincingo ukuze zingaphazamisi ukuqoshwa kobufakazi nokuthi abethamele bangasukumi kungakaqedwa.
Uma icala seliphothuliwe, isinqumo esibhaliwe sikaKhomishana sithunyelwa ngeposi noma nge-imeyli ezinsukwini ezibekwe umthetho ezili-14 kusukela osukwini okuthethwa ngalo icala.
Noma yiliphi icala: kungaba ngelokuxoshwa, elokubandlululwa, ukuhlukunyezwa, elokungaphathwa ngendlela enobulungiswa namanye aqulwa ezinkundleni zakwaCCMA noma emikhandlwini yamaBargaining Councils, inqubo ithi ummangali nommangalelwa kufanele benikezwe isaziso sosuku lwecala sezinsuku eziyi-14 ngaphambi kosuku lwecala, uma lisesesigabeni sokuxazulula noma sezinsuku ezingama-21 uma sekuwusuku lokuqulwa kwecala.
Emacaleni amayelana nesiteleka nawokudilizwa kwabantu abedlulile kuma-50, isaziso sosuku lwecala yizinsuku eziyisi-7 ngaphambi kosuku lwecala. Uma isaziso sibezinsuku ezincane kunalezi, ongafikanga ecaleni unelungelo lokuba anikwe esinye isaziso esanele. Uma ngabe sekuphume isinqumo lamchitha icala ngoba ehlulekile ukulithamela, unelungelo lokufaka isicelo sokucinywa kwaleso sinqumo ukuze anikwe elinye ithuba ngesaziso esanele. Olunye uhlangothi obeluzuzile ngesinqumo esithathwe lungekho olunye nalo lunelungelo lokuphikisa leso sicelo sokucinywa kwecala. UKhomishana uyocubungula leso sicelo nesiphikiso uma sikhona bese enquma ukuthi uyasicima isinqumo esithathwe lungekho olunye uhlangothi noma uyenqaba, okuyosho ukuthi isinqumo asigudluki.
Enye inqubo engakaguquki ngeyokuhlehlisa icala: Isicelo sokuhlehliswa kwecala esigabeni sokuqulwa kufanele sifakwe kusasele izinsuku ezili-14 ngaphambi kosuku lwecala. Kodwa uma izinhlangothi zivumelana ukuhlehlisa icala, leso sivumelwano esisayinwe yibo bobabili kufanele sifakwe kwaCCMA kusasele izinsuku eziyisi-7 ngaphambi kwecala. Ekugcineni kuba yisinqumo sikaKhomishana futhi esiba ujuqu. Kuyenzeka futhi ukuthi isicelo sifakwe ngalo usuku lwecala uma kunezimo eziphuthumayo eziphoqa lokho. Kulesi sikhathi sobhubhane nje, ziningi izicelo zokuhlehlisa ezenzeka futhi zemukelwe ngaosuku lwecala uma sekutholakala ukuthi ummangali noma ufakazi obalulekile uyagula ngesimo salo ubhubhane. UKhomishana uyaphoqeka ukuzamukela izicelo ngenxa yobhubhane.