UMehluleli osolwa ngezinsolo zokufuna ukubulala isekela lakhe
Ukuvela kwezinsolo zokuhlela itulo lokubulala ezibhekiswe kuMengameli Wabehluleli eWestern Cape uJohn Hlophe nokudonsa kwesikhathi ukuba kuphothulwe olwezinye izinsolo ezazibhekiswe kuye kukhathaza izinhlangano ezibhekelele ukusebenza komthetho eNingizimu Afrika.
Ngaphezu kwalokhu kungakha isithombe esingesihle sokuthi amacala noma izinsolo ezibhekiswa kwabezinga elithile lempilo azisukunyelwa ngokushesha ekubeni uma zibhekene nabantukazana kusheshe kusukunywe, kuboshwe osolwayo kuthi kungakapheli sikhathi agwetshwe kanzima.
Ngowezi-2009 uMehluleli osathatha umhlalaphansi uNkola Motata watholwa enecala lokushayela imoto ephuzile iNkantolo Enkulu yaseGauteng wahlawuliswa izi-R20 000.
Lokhu kwenzeka emuva kokushayisa ngonyanyavu lwemoto yakhe yohlobo lweJaguar udonga lomuzi kaMnu uRichard Baird eGoli ngowezi-2007 ebukhile. Waphinde wasolwa ngokusebenzisa ulimi lokucwasa ngobuhlanga.
Kuyithathe iminyaka eli-12 kwenzeka lokhu iJudicial Service Commission (JSC) ukuthi igcine ihlawulise uMotata imali eyisi-R1 100 000 ayalelwa ukuba ayikhokhele iSouth African Judicial Education Institute.
Lapha kuvela ukuhamba ngonyawo lonwabu ekufinyelelweni kwesinqumo ngesijeziso okwakufanele sinikwe uMehluleli uMotata.
Njengamanje uMehluleli uHlophe ufuna ukuba kusungulwe ikhomishini ezophenya ingene ekujuleni kwezinsolo abhekene nazo zokuzama ukubulala iSekela lakhe uMehluleli uPatricia Goliath.
Lokhu kwenzeka nje iJudicial Service Commission (JSC) isihlanganise umbiko emveni kophenyo ngezinsolo zetulo lokusoconga uMehluleli uGoliath.
UMnyango Wezobulungiswa ujube uphenyo ngalezi zinsolo wakuqinisekisa ukuthi igama likaMehluleli uHlophe liyavela embikweni osudluliselwe emaphoyiseni nakwezobunhloli.
UMmeli kaHlophe uBarnabas Xulu uthe ukwenzeka kwezigameko kubalulekile njengoba ethi umbiko ukhishwe lulunye kuMandulo nonyaka, emuva kosuku kuphekwe ngemibuzo ejele laseMgungundlovu ingede eyisiboshwa eveze lezi zinsolo.
Uthe emveni kwezinsuku ezintathu kuthunyelwe imibuzo eHhovisi likaMehluleli Omkhulu uMogoeng Mogoeng ebuzwa ukuthi ngabe uyazi yini ngalezi zinsolo.
Impendulo ekhishwe iHhovisi likaMehluleli Omkhulu ithi: “Lalazi ngezinsolo zesiboshwa esiveze ukuthi saqashwa ukuba sisoconge iSekela likaMengameli Wabehluleli uGoliath. Lezi zinsolo zesiboshwa zedluliselwa ophikweni iCrime Intelligence olwabe selufaka lesi siboshwa imibuzo lwathola ukuthi zingamanga futhi azinasisekelo.”
Uthe awukho umbiko osemthethweni owanikwa iHhovisi likaMahluleli Omkhulu.
Uthi: “Ulwazi esalunikwa alumthinti uMehluleli uHlophe noma omunye umehluleli kulo mbiko ongenasisekelo. Kodwa ngoba sinabantu abamandla emkhankasweni wabo, bebhebhezela lezi zinsolo.”
NgoMsombuluko, iHhovisi likaMehluleli Omkhulu lithe alingeni ekuhlinzekeni ezokuvikela abehluleli. Esitatimendeni, iHhovisi likaMehluleli Omkhulu likubeke kwacaca ukuthi akuyena onquma ngokuqashwa kwezokuvikelwa kwabehluleli kepha kuwumsebenzi owenziwa abehhovisi. Leli hhovisi lithi ilandelwe yonke imigudu ebekiwe, inhloko yezokuphepha yacela amaphoyisa ukuba ahlole ezokuphepha futhi enze izincomo, okwamanje iSekela likaMehluleli selihlinzekiwe.
Sekunesikhathi iSekela likaMehluleli noMengameli Wabehluleli eWestern Cape bedudulana kulandela ukuthi iSekela lisole uMehluleli uHlophe ngokungaziphathi kahle. Kulokhu kubalwa izinsolo zeSekela likaMehluleli zokuthi uMehluleli uHlophe ukhombise ukumbukela phansi ngokunika umkakhe uMehluleli uGayaat Salie-Hlophe umsebenzi omkhulu emkhakheni wezomthetho okwakufanele unikwe yena njengeSekela likaMengameli Wabehluleli.
UMehluleli uGoliath wabhala umqingo onamakhasi ali-14 esola uMehluleli uHlophe kokunye ngokuhlukumeza omunye wozakwabo. Waze wathi umkhuba wakhe uMehluleli uHlophe ukungaziphathi kahle uma kuziwa emsebenzini. Kuwo lowo mnyama kwaqhamuka iCouncil for the Advancement of South African Constitution (CASAC) yathi bobabili abakwaHlophe abamiswe emsebenzini.
Naye uMehluleli uHlophe akazibekanga phansi wasola iSekela lakhe ngokucwasa. Wathi iSekela lakhe limqambela amanga ngoba linezinhloso zokuthi axoshwe emsebenzini.
UMehluleli uHlophe akamusha ezinsolweni njengoba naphambilini kukhona, phakathi kwabo okwakungabehluleli asebathatha umhlalaphansi, ababethi akaphume aphele emabhentsheni ezomthetho bemsola ngokugxambukela ezinqumweni zamacala kaMnu uJacob Zuma.
Sikhuluma nesiteshi somsakazi iCape Talk, iSikhulu Esiphezulu kwaFreedom
Under Law (FUL) uNkk uNicole Fritz sekunesikhathi esicela eshumini leminyaka izinsolo zokuqala ezibhekiswe kuMehluleli uHlophe zavela kodwa azikasonjululwa.
Uthe isikhalo akhuluma ngaso lapha esenziwa aBehluleli baseNkantolo YoMthethosisekelo ngesikhathi esisodwa ngoMehluleli uHlophe bemsola ngokugxambukela nokuwenza abanye babo ukuthi bathathe izinqumo ezizohambela noZuma.
“Kunzima ukubona isikhalo esibucayi ngakanga kodwa singasonjululwa sekuphele isikhathi esingangeminyaka eli-10,” kusho yena.
Uqhebuke wathi: “Nezinsolo zokuthi ukhetha abehluleli emacaleni epolitiki anokukhuluma ukuze bathathe izinqumo ezenzelelayo okungahambisani nombono wokuthi abehluleli kufanele basebenze ngaphansi kokwesaba nokwenzelela.”
Uthe kunzima ukukholwa ukuthi sekunezinye izinsolo zokuthi uMehluleli uHlophe ubeyingxenye yemizamo yokusoconga leli Sekela.
“Lezi zinsolo ngeke zazitshwa futhi kumele kuqhutshekwe ziphenywe.”
Mayelana nokuthi ummeli kaMehluleli uHlophe ufuna kwenziwe uphenyo ngalezi zinsolo uNkk uFritz uthe uyesaba ukuthi kungenzeka kubonakale amanye amaqhinga ezomthetho okuwukubambezela.
Uthe iFUL nezinye izinhlangano eziningi bafuna iJudicial Service Commission iphume nesisombululo esingenzeleli nesiphuthumayo kuzo zonke izikhalo ngoMehluleli uHlophe.
“Kusalindwe lokho kufanele amiswe okuyinto engeyimbi kakhulu kuye kanti uma etholakala engenacala angabuyela emsebenzini futhi angangcolisi igama labo bonke abehluleli. Uma kunesidingo secala elingashushiswa kufanele liphathwe ngohlelo lwezobulungiswa bobugebengu futhi liye enkantolo,” kusho uNkk uFritz egcizelela ukuthi lezi zinsolo zibe nomthelela omubi futhi zahlukanisa phakathi abehluleli baseWestern Cape.