Kusekubi kukhilikithi
Ukhala ngokungaphathwa kahle owoHlanga obephethe isikhundla esibalulekile kukhilikithi yaseNingizimu Afrika othi ushaywe ngesithende kunhlolokhono yesikhundla abesiphethe.
Ngenxa yokuthanda umdlalo wekhilikithi nokungafuni ukuthela usawoti esilondeni esibhibhayo seCricket South Africa (CSA), uLinda Zondi (osesithombeni), obephethe isikhundla sokuba umqoki wabadlali beqembu lesizwe iProteas, uthi ngeke aludlulisele phambili udaba lokunyathelwa kwamalungelo akhe ngesikhathi enza inhlolokhono yokufuna ukubuyela kulesi sikhundla.
Ngowezi-2015 kwaba nenkulu injabulo kwaboHlanga ngesikhathi le nsizwa yaKwaMashu, eThekwini, iqokwa njengozothatha isikhundla sokuba yinhloko yabaqoki babadlali beqembu lesizwe. Inkontileka yakhe iphele ngonyaka odlule.
UZondi, oqale ukuzibandakanya nekhilikithi eneminyaka yobudala eli-11, ubeqokelwa kulesi sikhundla ngenxa yamagalelo akhe abevunywa iwona wonke umuntu.
Impumelelo yakhe egqame kakhulu ngeyaphakathi konyaka wezi2013 kuya kowezi-2015 engumqoki wabadlali eqenjini lesizwe lika-Under 19. Sekuwumlando ukuthi le nqanawe yeqembu ayeyithakile yanqoba inkomishi yeNdebe YoMhlaba ngowezi-2014.
Wayengaqali ukuvelela ngalokhu njengoba phakathi kowezi-2007 kuya kowezi-2009 wayenze umsebenzi oncomekayo eqenjini lakuleli labesifazane.
Wayeqokelwe kulesi sikhundla ngenxa yempumelelo abe nayo esasebenza eqenjini laKwaZulu-Natal nakumaDolphins.
Nakuba ngesikhathi sikaZondi kuProteas ekhiqize ulaza lwabadlali abavunywa umhlaba wonke abafana noLungile Ngidi, u-Andile Phehlukwayo, uKagiso Rabada, uKeshav Maharaj, u-Aiden Markram, uRassie van der Dussen, ukusho ambambalwa, kodwa izikhulu zeCSA ngoMbasa wakulo nyaka zimtshele emakhaleni ukuthi akafakwanga ohlwini okuzoqokwa kulo ozothatha isikhundla sokuba umqoki wabadlali beqembu lesizwe.
Utshelwe ukuthi akanazo izinto noma amava adingeka kulesi sikhundla.
Enkulumeni elaboHlanga elibe nayo noZondi, uthe ngemuva kokuba kuphele inkontileka yakhe nyakenye, kube nesikhangiso salo msebenzi abewuphethe.
NgoLwezi uthe uthole umyalezo ngeWhatsapp obumbizela kunhlolokhono eKingsmead Cricket Stadium, eThekwini. Ubezoyenza ngohlelo lobuchwepheshe iSkype.
Uthe inkinga iqale ngesikhathi ethola ukuthi azikho izinhlelo ahlelelwe zona zobuchwepheshe zokwenza le nhlolokhono. Uveze ukuthi uyena owazihlanganisela lobu buchwepheshe.
Uthe kule nhlolokhono kwakukhona uBeresford Williams oyibamba likaMengameli kule nhlangano, uThabang Moroe owayeyiSikhulu Esiphezulu, uJack Madiseng uMengameli weGauteng Cricket, uTebogo Siko, uShirley Zinn noDawn Mokhobo.
Maphakathi nenhlolokhono uthe kwaba nokunqamuka kwezintambo wangabe esababona laba ayekhuluma nabo.
Bathi akaqhubeke, nabo kabamboni kodwa bayamuzwa. Ngesikhathi eqhubeka uZondi uthe sabuya isithombe salaba.
Uveze ukuthi wabona waphinde wezwa uMoroe naye osekhonjwe indlela noMadiseng bethi “muvale vele kasisamdingi”.
Uthe ngemuva kwalesi sehlakalo wabhalela uWilliams owakuqinisekisa ukuthi ukubonile obekwenziwa uMadiseng noMoroe wabe esexolisela iCSA.
UZondi uveze ukuthi omunye owenza inhlolokhono ngoLwezi uGraeme Smith nokho esikhundleni sokuba umqondisi kuCSA.
Ingakaphumi imiphumela yenhlolokhono, ibhodi leCSA labambisa uSmith oweyedlala eqenjini lesizwe isikhundla sokuba umqondisi. Yena uSmith wabuyisela okwesikhashana uZondi kwesokuqoka iqembu lesizwe elalizodlala ne-England ne-Australia ngoZibandlela. NgoMbasa iCSA yamemezela ukuthi uSmith uzosithatha ngokuphelele isikhundla sokuba umqondisi. Lokhu kuphasiswe yibhodi lale nhlangano. Kuyo le nyanga uZondi uthe waziswa uSmith ukuthi kunhlolokhono eyaba ngoLwezi nyakenye washaya udaka, akanawo amava nobuchule bokubuyela esikhundleni sokuba wumqoki weqembu lesizwe.
Uthe kwamdida lokhu, wazibuza ukuthi uSmith wayembuyisela kanjani okwesikhashana kulesi sikhundla ngoZibandlela uma kuwukuthi ngoLwezi wayeshaye udaka.
“Bona abasho nje ukuthi bese bengasangifuni. Nginazo zonke izinto ezidingeka kulo msebenzi. Bathi bafuna umuntu onesipiliyoni seminyaka emihlanu. Mina ngineminyaka eli-13. Bathi badinga onamava okuhlwaya ikhono. Mina ngineseminyaka engaphezu kweyisikhombisa ngenza lokho. Nginazo neziqu zeSport Management lezi abazifunayo. Ngaphezu kwalokhu sengiziveze kaningi ukuthi ngiyawazi umsebenzi wami kusukela kuUnder 19. Bangufakazi ukuthi ngiluqonda kahle uhlelo loguquko (transformation) nelokuthuthukisa izikwati ezincane,” kubeka uZondi osebenza eMnyangweni Wezempilo.
Uveze ukuthi livele igama leCSA liyanuka ngezinto ezenzeka khona. Ubufakazi balokhu ukuhamba kwabaxhasi. Uthe udaba lokungaphathwa kahle kwakhe ngeke aluqhubezele phambili, okuhle ukuthi owakhe umsebenzi uwenzile.
Uthe okwenzeke kuye ngeke akuhlanganise nobandlululo olubikwa kule nhlangano kodwa ukhala ngokungalandelwa komthetho odabeni lwakhe.
“Ngimfisela inhlanhla ozothatha lesi sikhundla. Kanginanxa naye, engikhala ngakho indlela okuphulwe ngayo amalungelo ami. Kuyangijabulisa ukuthi ngisibuyisile isithunzi sowoHlanga kulo mdlalo. Ngavumbulula abadlali boHlanga osekucacile ukuthi banekhono emhlabeni. Ngiyaziqhenya ukuthi kabafakwanga kwelesizwe ngoba kungaboHlanga kodwa ngoba bekufanele ukudlala kulo”.
Othishwa ukungena esikhundleni sokuqoka iqembu lesizwe uVictor Moisang. Ulandelwa uHussein Manack noPatrick Moroney.