KWEZINYE IZINGXENYE
EzaseNew Zealand: Sekuvele isithombe sokuthi loyo onguNdunankulu waleli lizwe uJacinda Ardern uzosigcina isikhundla sakhe okhethweni oluzayo ngokusho noma ngokukhombisa kwenhlolovo ebibhekwe yizwe lonke ngesonto eledlule. Ukubhebhetheka kokhuvethe kwenze kwancipha kancane ukwesekwa kwakhe. Kunhlolovo yeNewshub-Reid ekhishwe ngeSonto, kuvele kuthi iqembu lika Ardern iLabour Party lihleli kumaphesenti angama-50.1 kodwa okukhombise ukwehla kunakuqala njengoba ekuqaleni kwalo nyaka ukwesekwa kwaleli qembu bekungamaphesenti angama-60.9 ngesikhathi lapho izwe belituswa njengomholi womhlaba ekulweni nokhuvethe.
Ezase-Ukraine: Indiza yamasosha ebithwele abantu abangamashumi amabili nesishiyagalombili iphahlazeke yagqamuka amalangabi enyakatho yaleli lizwe ngesonto eledlule. Imibiko iveza ukuthi kushone abantu okungenani abangama-22 ababe kule ndiza. UMnyango Wezangaphakathi kuleli lizwe uthe abezokutakula endaweni yesehlakalo bathole abashayeli bezindiza kanye nama-cadet kule ndiza. Ababili kule ngozi basesimweni esibucayi esibhedlela kanti kuyaqhubeka ukuthungathwa kwabanye ababekule ndiza, lokhu kushiwo iSekela likaNgqongqoshe Wezangaphakathi u-Anton Gerashchenko.
Ezase-Italy: Ibhokisi elakhiwe ngegolide nekhristali ebeliphethe igazi likaPhapha John Paul II lintshontshiwe esontweni elisenkabeni yedolobha laseSpain iSpoleto, ngokusho kwababhishobhi baleli bandla. Leli bhokisi elaziwa ngeReliquary, kusolwa ukuthi lintshontshwe ngoLwesithathu lisendaweni engcwele e-althari eyayibekelwe yena uPhapha owashona ngonyaka wezi-2005 ngemuva kokuhola iminyaka engamashumi amabili nesikhombisa.
Ezase-USA: Idolobha iNew York City lizokhokhisa inhlawulo abantu abangafuni ukufaka izinto zokumboza ubuso njengoba izinga lokutholwa kwabantu abanokhuvethe likhuphukile laba ngaphezu kwamaphesenti amathathu okokuqala ngemuva kwesikhathi eside, lokhu kushiwo yiMeya yaleli dolobha uMnu uBill De Blasio ekuqaleni kwaleli sonto. Ngaphandle kwaleli dolobha, ezinye izifunda zaleli zwe ezingama-28 kubonakala nakhona izibalo zabantu abanokhuvethe ziqhubeka nokwanda njengoba nezibhedlela zezifunda ezisentshonalanga zibike ukwanda kwezibalo zabantu abathelelekile abakuzo. UDe Blasio uthe izikhulu kanye nabezomthetho kuleli dolobha bazoqala banikeze izimfonyo noma izinto zokufihla ubuso labo abazotholakala bengazifakile ezindaweni zomphakathi futhi uma umuntu enqaba lokhu akunikwayo uzobhekana nenhlawulo elingakavezwa inani layo.
Ezase-Armenia: Leli zwe kanye neAzerbaijan kuleli sonto basolane ngokudubulana kwagcina eseshaye indiva ingcindezi yokubamba izingxoxo zokuthula njengoba ukungqubuzana kwawo ngendawo yaseNagorno-Karabakh kungase kuqubule impi enkulu. Womabili la mazwe abike ukuthi elinye lidubulile ngaphesheya kwemingcele yawo owabiwe wasentshonalanga yesifunda iNagornoKarabakh lapho okuqubuke khona ukulwa okukhulu phakathi kwama-Azeri kanye namabutho ase-Armenia ngesonto eledlule. Lesi sehlakalo sikhombise ukuqhubeka kokwanda kwengxabano nokusondela kokubhekana ngeziqu zamehlo kwala mazwe ngisho amazwe afana neRussia, i-United States of America (USA) namanye ephakamisa ukuthi kube nokuthula phakathi kwala mazwe.