OwasePalestine ufuna uxolo lwangempela ne-Israel
UMengameli wasePalestine uMnu uMahmoud Abbas (osesithombeni) usecele uNobhala Jikelele we-United Nations, uMnu u-Antonio Guterres, ukuba abize ingqungquthela yamazwe omhlaba ekuqaleni konyaka ozayo ukuze kwethulwe “inqubo yoxolo lwangempela” phakathi kwe-Israel nePalestine.
U-Abbas uphinde wanxusa ukuthi uGuterres asebenze nabalamuli bezindaba zaseMiddle East okuyi-United States (US), iRussia, i-European Union (EU), i-United Nations (UN) kanye noMkhandlu Wezokuphepha we-UN ukuze kuhlelwe le ngqungquthela futhi zonke izinhlaka ezithintekayo zibambe iqhaza ngokugcwele ekutholeni ukuthula.
IPalestine ifuna iWest Bank neGaza Strip bese kuthi iJerusalem ibekwe njengenhlokodolobha yayo yonke le ndawo. Kuzokhumbuleka ukuthi le ndawo yathathwa noma yanqotshwa ngabakwa-Israel ngowe-1967. Abaholi basePalestine benqaba isiphakamiso sokuthula esethulwa nguMengameli wase-USA uDonald Trump lapho uHulumeni wakhe wawubeke ukuthi uzokwamukela yonke imiphakathi yamaJuda esendaweni enqotshwe ngabakwa-Israel njengengxenye yakwaIsrael.
“Ngeke kube khona ukuthula, ukuphepha, ukuzinza kanye nokuhlalisana kulesi sifunda sethu uma ukuthathwa komhlaba kuqhubeka futhi kuqhubeka nokungabi nesixazululo esifanele nesiphelele enkingeni yasePalestine ewumnyombo wengxabano phakathi kwala mazwe wobamili,”kusho u-Abbas etshela amalungu ali-193 e-UN General Assembly ngevidiyo ebiqoshiwe ngenxa yokubhebhetheka kokhuvethe. Uphinde wathi iPalestine isalokhu izinikele enqubeni ye-Arab Peace yangowezi-2002 eyaqhamuka neSaudi Arabia, lapho izizwe zama-Arab zazinikela ukuzinzisa ubudlelwano ne-Israel uma wona ezothola isivumelwano sokuzibusa kuPalestine kanye nokuhoxa okuphelele kwe-Israel ezindaweni eyazinqoba ngowe-1967.
Inkulumo yeNkosi yaseSaudi Arabia, uSalman bin Abdulaziz, ithe uhlelo lwenqubo ye-Arab Peace lwaluyisisekelo “sesixazululo esibanzi futhi esinobulungiswa” kodwa uphinde wakuveza ukuthi uyayisekela imizamo yeUSA yokuthola ukuthula kulesi sifunda.