KWEZINYE IZINGXENYE
EzaseKenya: UMengameli waleli lizwe u-Uhuru Kenyatta unwebe ngezinyanga ezimbili umthetho wokuhlala ezindlini obubekelwe uzwelonke, okwakuhloswe ngawo ukunqanda ukubhebhetheka kokhuvethe. Kodwa uthambise ukuqala kwalesi sikhathi ngamahora amabili ngokuthi siqale ngele-11 ebusuku. UKenyatta uthe izibalo zabanokhuvethe zinciphile waphinde wakhipha ejokeni izindawo zokudlela nezophuzo oludakayo. Uphinde wathi imikhawulo izobuyekezwa kahle ezinsukwini ezingamashumi ayisithupha lapho ethe ungqongqoshe uzokwandisa isikhathi sokuthanjiswa kwentela okwaqala ngoMbasa kuphethwe ngoMasingana wezi-2021.
Ezase-Afrika: Ukugcwala kwezikhungo zezempilo zomphakathi ezwenikazi i-Afrika, ukungeneli kwezindawo zokuhlola kanye nokugcwala kwezindawo eziyimijondolo kwaholela ekutheni ochwepheshe nezazi babikezele inhlekelele enkulu kuleli zwekazi ngesikhathi lihlaselwa ukhuvethe ngoNhlolanja. Lesi sifo sase sivele siqalile ukudala izinkinga emazweni asezwenikazi i-Asia nase-Europe kwaze uhlaka oluthize lwe-United Nations lwabika ukuthi ngisho abantu bewuhlonipha umthetho wokuqhelelana, lesi sifo siyogcina sibulele abantu abayizi-300 000 ezwenikazi i-Afrika kulo nyaka. NgoNhlaba iWorld Health Organisation (WHO) ixwayise ngokuthi uma ukunqandwa kwalesi sifo kungaphumeleli kwakuzoshona abantu abayizi-190 000 kuleli lizwekazi. Kodwa njengoba sekuvele imibiko ethi emhlabeni jikelele sekushone abantu abayisigidi ngenxa yokhuvethe, izwekazi i-Afrika libukeka lisenza kangcono kunalokho obekulindelekile njengoba linamaphesenti aphansi abashonile ngenxa yokhuvethe kunamanye amazwekazi. Kubalelwa kumaphesenti ama-2.4 okusho ukuthi abantu abayizi-35 000 kulabo abayisigidi esi-1.4 ababetholwe benokhuvethe asebeshonile. ENorth America bangamaphesenti ama-2.9 kuthi e-Europe kube ngama-4.5. Amazwe ashayeke kakhulu yilolu bhubhane afana ne-Italy neBritain abike ukuthi abantu abangamaphesenti ali11.6 kanye nayisi-9.0 ngokulandelana sebeshonile. Izibhedlela eziningi kuleli zwekazi zibike ukuthi izibalo zabantu abangena kuzo benokhuvethe ziyaqhubeka nokuncipha.
EzaseNigeria: Ongoti bezamalungelo ku-United Nations (UN) sebecele ukuba leli zwe likhulule umculi oneminyaka yobudala engama-22 owagwetshwa intambo ngenxa yengoma ayenza okusolwa ukuthi iyahlambalaza. Labo ngoti bathi isigwebo salo mculi sibe ukuphulwa komthetho wamazwe omhlaba. UYahaya Amina Sharif ugwetshwe ngenyanga edlule yinkantolo eseKano, okuyisizinda sezentengiselwano esenyakatho yaleli zwe esinezakhamuzi eziningi ezikholelwa enkolweni yobuSulumane, ngemuva kokuthi ecule le ngoma waphinde wayithumela kubantu enkundleni yokuxhumana uWhatsapp. “Umculo awulona icala,” kusho isitatimende songoti be-UN. Ukusetshenziwa kwesigwebo sentambo kwabezobuciko kuwukwephulwa komthetho wamazwe omhlaba nomthethosisekelo waleli zwe, kusho uMnu uKarima Bennoune oyisishoshovu samalungelo amasiko. Ongoti bathe leli lizwe kufanele liguqule isigwebo sentambo liphinde liqinisekise ukuthi uphephile lo mculi ngenkathi eqala efaka isicelo sokuya eNkantolo Yokudluliswa Kwamacala. Ababhikishi ababedinwe ingoma yalo mculi bashisa indlu yakubo ngoNdasa.
EzaseTogo: IHhovisi likaMengameli selibike ukuthi uNdunankulu wakuleli zwe noHulumeni wakhe ngeledlule bafake izincwadi zabo zokwesula ezikhundleni. Bekulindelwe ushintsho kuHulumeni selokhu uMengameli uFaure Gnassingbe anqoba ukhetho ngoNdasa okwakusho ukweluleka kwesikhathi sakhe sokubusa okuyiminyaka eli15, okwakhe isithombe sokuthi lesi sikhundla siyifa ngenxa yokuthi kwaqala uyise owangena ngemuva kokuvukelwa kombuso ngowe-1967. Kodwa iHhovisi likaMengameli alikuvezanga ukuthi uNdunankulu omusha uzobekwa nini.
EzaseLibya: Ukuhlasela kwakhe eLibya kungenzeka ukuthi kwahluleka, amazwe angaphandle ake azama nokumvalela ngaphandle kepha umkhuzi wamasosha uMnu uKhalifa Haftar usanamandla amakhulu phezu kwezikhumulo zikawoyela futhi uhlome kakhulu aphinde abe nethonya lezepolitiki okungavimba noma yiluphi uhlelo lokuzama ukuthola ukuthula kuleli lizwe. Ngemuva kokwehluleka kwemizamo yakhe yokubusa lonke leli zwe, uHaftar oneminyaka yobudala engama-76, amandla akhe kukhona lapho enciphe khona. Amasosha akhe akhishwa entshonalanga yaleli zwe kwathi lapho enamandla amakhulu okuyisempumalanga, amazwe nabathize abangaphandle ababemeseka sebejikela kuzimbangi zakhe. Kepha indima yakhe ekuphakamisweni kwengxenye ethize yokuvinjezelwa kokukhiqizwa kukawoyela esontweni eledlule kukhombise ukuthi usayinkunzi empumalanga yaleli zwe lapho esandise khona ezokuphepha ngendlela emangalisayo kule minyaka eyisithupha edlule.